Mâu tơdroăng pro pơro, pro kĭch ‘na tơdroăng prôk troăng, mâu tơdroăng hơ’muăn pro hêng tó lơ mâu tơdroăng kơ-êng po tối mâu tơdroăng ‘na rak tơniăn troăng klông châ pơtâng hnê tối hlê plĕng, tơ’lêi pâ, pro ăm roh hriâm pa kŏng chôu hriâm chư ‘na tơdroăng pơtâng luât rak tơniăn troăng klông ƀă rơxế kơtâu thăm phiu ro, ai pơxúa.

Ki nhên ga, a Hngêi trung râ má péa Độc Lập, bêng Trung Thành, Khu pơkuâ Đoân Droh rơtăm Thái Nguyên tơrŭm ƀă Kŏng an pơlê kong kơdrâm Thái Nguyên, Kŏng ti tơlo liăn tê rôe tơmeăm ngi kong têa ê Thái Nguyên tơkŭm po pơtâng tối rak tơniăn troăng klông ƀă hnê mơhno vê rơxế tơniăn ăm vâ chê 1.200 ngế hok tro Hngêi trung. Lơ môi tiah roh pơtâng tối ‘na rak tơniăn troăng klông ăm lối 1.300 ngế kăn ƀô̆, thái cô, hok tro hngêi trung râ má pái phôh thong Điềm Thụy, tơring Phú Bình, xua Ƀơrô Kan sát rak tơniăn troăng klông, Kŏng an kong pơlê tơrŭm ƀă Khu rak tơniăn troăng klông kong pơlê ƀă Khu pơkuâ ngăn Đoân Droh rơtăm Thái Nguyên tơkŭm po.

Tơdrêng amê, vâ chê 800 ngế kăn ƀô̆ thái cô ƀă hok tro hngêi trung râ má pái Trần Quốc Tuấn (tơring Đồng Hỷ) xuân hiăng veăng roh trâm mâ tơpui tơno, tí tăng plĕng luât ‘na rak tơniăn troăng klông ƀă tơdroăng tŏng kum dêi Kŏng an tơring Đồng Hỷ. Hngêi trung râ má pái phôh thong Lưu Nhân Chú, tơring Đại Từ, hngêi trung tơrŭm rơtế Kŏng an tơring Đại Từ tơkŭm po Leh kĭ tơkêa troăng pơkâ tơrŭm rak tơniăn troăng klông, tơniăn pơlê pơla, tơniăn hngêi trung. Veăng kĭ tơkêa pơkâ tơrŭm ối ai kăn teăng mâ khu râ kăn pơkuâ 8 to cheăm cho tíu ai hok tro dế hriâm a hngêi trung.

Ƀă tơdroăng ki ƀeăn ƀĕng, rơkê tung pêi tơdrêng pơla mâu tơdroăng pơtâng tối ƀă um mơhno pro, mơ-éa chêh tối tơbleăng, ki rơhêng vâ tối mơđah tơbleăng, mâu tơdroăng pro pơro, roh trâm mâ tơpui tơno hiăng tơdah châ tơdroăng ki tơmâng, veăng hên dêi hok tro lâp hngêi trung. Mâu vâi o hâk vâ drêng châ trâm mâ tơpui tơno, tiâ rơkong kơ-êng ki tơdjâk troh kơvâ troăng klông ƀă châ hnê mơhno tơdroăng ki veăng prôk troăng tơniăn, truâ muâk tro tơdroăng ƀă hía hé.

Tiô tối dêi o Đỗ Ngọc Ánh, lâm 11A1, hngêi trung râ má pái Trần Quốc Tuấn:

“A lâm mê ngin xuân châ tí tăng plĕng ‘na rak tơniăn troăng klông, laga mê cho tơdroăng ki hnê ôh tá ai hlo ƀă mâ. Roh trâm mâ tơpui tơno ‘na ti tăng plĕng luât rak tơniăn troăng klông kố ngin hlo hâk ‘nâng, tơdroăng pơtâng mơđah tơbleăng, mâu tơdroăng ki phiu ro laga kơnâ, ing mê, ngin o hiăng xo vế hên túa ki rơkê tơtro tung prôk drô troăng kân’’.

Ƀă o Đỗ Như Ngọc, lâm hriâm nâl kong têa Ăng-glê 12A1, hngêi trung râ má pái Chuyên Thái Nguyên tối ăm ‘nâi:

“Troăng tơpui, xuân môi tiah tơdroăng xiâm tơpui tơno achê hlê plĕng, thăm pro ăm dêi châ hlê plĕng ‘na luât prôk drô troăng kân, kơ’nâi mê mơhno tơdroăng ki nhuô̆m pâ ƀă tơdroăng pêi pro tro, nhuô̆m dêi châ tơná, rơpŏng ƀă pơlê pơla’’.

A mâu tơdroăng, hok tro ƀă kăn ƀô̆, thái cô Hngêi trung châ tơmâng tơdroăng ki rĕng ‘na tơdroăng gâk kring, rak tơniăn troăng klông ƀă rơxế kơtâu tung kong pơlê, pơlê kong kơdrâm; tối mâu tơdroăng xiâm dêi Luât troăng klông ƀă rơxế kơtâu; mâu tơdroăng pro xôi cho xiâm kối chiâng pro tơklâm rơxế; tơdroăng rơkê tung veăng prôk drô troăng kân, mâu tơdroăng prôk lăm ai khôi túa lĕm tro drêng veăng prôk drô troăng ƀă rơxế kơtâu, môi tiah: Pêi kơtăng mâu pơkâ thế ‘na troăng klông; mâu kơƀăng tối tơbleăng ƀă on hnê prôk troăng kân; troăng vâ hbrâ ví drêng ai tơdroăng tơklâm rơxế; tơdroăng ‘na luât rak tơniăn troăng prôk ƀă rơxế kơtâu ƀă hnê mơhno tơdroăng vê rơxế tơniăn ƀă hiá hé.

Mâu hngêi trung xuân kĭ tơkêa ƀă Ƀơrô Kan sát rak tơniăn troăng klông pêi pro mâu pơkâ ‘na rak tơniăn troăng klông ƀă rơxế kơtâu. Thiê̆u tă Nguyễn Nam Hưng, Ƀơrô Kan sát rak tơniăn troăng klông, Kŏng an kong pơlê Thái Nguyên tối ăm ‘nâi:

“Pơtâng tối ƀă troăng mơ’no tơdrêng tung um tiô troăng hyôh măng, pơtâng tối ing măng, pakĭng mê, pơtâng tối tơdrêng ngin xuân pơ’lêh nếo tơdroăng xiâm pơtâng tối, pro ti lâi ăm tơ’lêi plĕng, tơ’lêi tơmâng’’.

Klăng roh kố, Ƀơrô Kan sát rak tơniăn troăng klông hiăng tơkŭm po mơđah tơbleăng um “Tơklâm rơxế, tơleăng tơdroăng pro xôi’’; xing xoăng 1.000 kơtâ mơ-éa pơtâng tối ‘na rak tơniăn troăng klông ƀă rơxế kơtâu, diâp 20 to môk rak vế ko Honda tro tiô pơkâ ăm mâu vâi o hok tro. Tơdroăng diâp kơxuô tơmeăm ăm mâu hok tro cho ‘’kăn teăng mâ mơhno khôi túa lĕm rak rak tơniăn troăng klông ƀă rơxế kơtâu’’ ƀă mâu vâi o ai tơdroăng rêh ối pá puât.

Kố cho tơdroăng châ Khu pơkuâ Đoân Droh rơtăm Thái Nguyên tơrŭm ƀă mâu tíu cheăng tơkŭm po đi đo, ƀă hên troăng pêi, pơxúa. Ing mê, vâ hbrâ ăm hok tro mâu tơdroăng ki rơkê vê rơxế tơniăn, kum mâu vâi o mơdêk hlê plĕng, ‘nâi nhên tung pêi pro Luât rak tơniăn troăng klông ƀă rơxế kơtâu. Tung la ngiâ, Khu pơkuâ Đoân Droh rơtăm pơlê kong kơdrâm Thái Nguyên pơtối tơkŭm po a mâu hngêi trung hriâm tung pơlê kong kơdrâm.