VOV4.Xơ Đăng - Măng tĭng hdrối, a Hngêi Kuô̆k hô̆i, hiăng po Rôh hôp má 9 dêi Vi ƀan pơkuâ Kuô̆k hô̆i. Rôh hôp kố châ klâ pro 2 rôh ƀă tai tâng hâi pêi cheăng ai 7 hâi tơdế. Ki rơhêng vâ tối, a rôh hôp kố, Vi ƀan pơkuâ Kuô̆k hô̆i mơdoh 1 hâi pêi cheăng vâ tơkŭm êng ƀă tiâ dêi Kuô̆k hô̆i ƀă 2 ngế cheăng tung Chin phuh. Xuân a Rôh hôp kố, Vi ƀan pơkuâ Kuô̆k hô̆i ăm rơkong tơpui tối ‘na kơxop hlá mơéa luât tiô troăng, hlá mơ-éa séa ngăn, pơkâ ăm mâu ngế ki pâk chik xúa trếo ma tŭi sap ing 12 hơnăm troh pá xôp 18 hơnăm mot tung tíu ki mơdât ki châ pơklât thế; ƀă mâu tơdroăng kal ki ê.

Tối tơbleăng a hâi pơxiâm po hneăng hôp, pôa Vương Đình Huệ, Kăn xiâm hnê ngăn Kuô̆k hô̆i  ăm ‘nâi: Vi ƀan pơkuâ cheăng Kuô̆k hô̆i  hiăng pêi pro tơdroăng pơkâ ƀă pâ hnê tối 6 khu tơdroăng. Ngăn a phĭu vâ hiăng pơkâ 2 khu tơdroăng kơ-êng pôa Nguyễn Hồng Diên, Ngế xiâm pơkuâ ngăn tê mơdró ƀă pôa Trần Hồng Hà, Ngế xiâm ngăn tơmeăm khoăng ƀă Hyôh kong prâi. Tơdroăng kơ-êng  Ngế xiâm ngăn tê mơdró tơkŭm a tơdroăng pêi pro, rôe ‘măn têa châu têa kơxăng; tơdroăng pơkuâ yă têa kơxăng tung pơla hdrối kố nah.

Tơdroăng rak ngăn tê mơdró, hbrâ mơdât tê mơdró liu, tê tơmeăm ôh tá xê khât, tơmeăm ôh tá krá lê̆m, ôh tá ‘nâi xiâm ulâi ƀă hên ki ê. Pôa Trần Hồng Hà, Ngế xiâm ngăn tơmeăm khoăng ƀă hyôh kong prâi tiâ tơdroăng pêi pro tiô pơkâ kơ êng ƀă séa ngăn tơdroăng dêi Kuô̆k hô̆i ki tơdjâk troh pơkâ, rak ngăn, xúa tơnêi tơníu a kơphô̆. Hnoăng cheăng ƀă troăng rơhlâ mơdât ki xúa tơdroăng pâ kơdroh yă tung mâu rôh tơbleăng yă tơnêi ƀă kơlo tâk luâ tơdroăng pơxúa ‘na tê mơdró bro yă tơnêi a mâu kơpong a chê to kơnâ ó xua vâ tí tăng pro pơxúa ăm tơná. Pôa Vương Đình Huệ, Kăn xiâm hnê ngăn Kuô̆k hô̆i tối:

‘’Tơdrêng ƀă tơdroăng tối tơbleăng, séa ngăn tơdroăng ki kân dêi Kuô̆k hô̆i ƀă Vi ƀan pơkuâ cheăng Kuô̆k hô̆i mê mâu tơdroăng pơ’lêh tơ-ƀrê ‘na kơ êng tiâ mâu tơdroăng kơ-êng hiăng mơhno kố cho tơdroăng séa ngăn tơdrêng, tơ-ƀrê dêi Kuô̆k hô̆i, veăng tơbleăng troh lâp lu tơdroăng pêi pro ki lê̆m tung mơ-eăm pơ’lêh nếo ‘na séa ngăn ƀă pro ăm tơdroăng cheăng dêi Kuô̆k hô̆i pêi tro tiô tơdroăng ai khât ƀă tung tơdroăng rêh ối; ai tiô púi vâ  dêi kuăn pơlê ƀă dêi kuăn pơlê pơkâ thế mơjiâng tơnêi têa tro tiô Luât xah hô̆i chuh ngiah dêi kuăn pơlê, xua kuăn pơlê ƀă ing tơdroăng vâ kum kuăn pơlê’’.

Pôa Vương Đình Huệ, Kăn xiâm hnê ngăn Kuô̆k hô̆i

Rôh kơ-êng tiô tối hdrối kô po a hâi lơ 16/3, châ tơkŭm po a Hngêi hôp kân Diên Hồng, Hngêi Kuô̆k hô̆i ƀă hlối mơ’no tơdrêng tung um tiô troăng hyôh Internet ƀă 63 Khu kăn Kuô̆k hô̆i hlối châ mơ’no tơdrêng vâ ai hên kuăn pơlê châ tơmâng ngăn.

Xuân tung măng tĭng hdrối, klêi pơxiâm po hneăng hôp roh má 9, Vi ƀan pơkuâ cheăng Kuô̆k hô̆i hiăng vâ môi tuăn ƀă tơdroăng kal pơkâ Luât ‘na rak tơniăn, tơdroăng séa ngăn, pơkâ djâ mơngế ki ôh tá ai mơgât pâk chik ma tŭi ki sap 12 hơnăm troh 18 hơnăm mot a tíu hnê mơgât ki pơklât thế tung mâu ngế: Ngế ki ôh tá kâi gât ma tŭi ôh tá chêh inâi, ôh tá vâ pêi pro tro pơkâ lơ hmôu pơ pơtê lôi mơgât ma tŭi; mơngế ki ôh tá kâi gât ma tŭi tung pơla dế mơgât ma tŭi ki tiô tơná vâ châ hlo gá ôu pâk ma tŭi nếo; ngế ôh tá kâi gât ma tŭi mâu túa ki xúa trếo aphiê̆n ôh tá chêh inâi, ôh tá pêi pro lơ hmôu pơ pơtê mơgât.

Laga, tiô mâu kăn, mâu ngế ki châ ‘mâi pơ’lêh chêh tung hlá mơ-éa luât cho mơngế ki pâk chik ma tŭi hiăng tŭm ing 12 hơnăm troh pá sôp 18 hơnăm ƀă kô djâ vâi lăm mơgât ki pơklât thế ôh tá tá xê tơdroăng ‘mâi pro ‘na hlá mơ-éa, mê thế pêi tro tiô tơdroăng cheăng ki mê, túa pro thế tơ’lêi hlâu ‘na pro hlá mơ-eá hmâ, pro tro ƀă tơniăn pơxuá ăm mơngế ki pâ thế pro.

Ngế pơkuâ Vi ƀan cheăng lêng- Kring vế tơniăn dêi Kuô̆k hô̆i, pôa Lê Tấn Tới tối:

‘’Ai mâu ngế tí tăng prôk hmâng vâ, tí tăng ‘nâi hồ sơ lĭ lịch, tơdroăng ‘na ngế ki mê gá pá, hâi teăm tối ‘na tơdroăng xôi nếo, xôi nah, dêi mơngế pá xôp 18 hơnăm. A tô tuăn khât, drêng dế pro hồ sơ, vâ ‘nâi nhên ngế ki mơdât pâk chik, vâi tối ‘’kuăn á chêh inâi mơgât pâk chik ki tơná gá vâ xêh’’ mê thế pơtê tiah mê mơ’nhiê hnoăng hiăng ‘no. Kố cho tíu ki pro pơhôi tơ’lêi vâ ai mâu ki ê tí tăng pro pơxuá xêh’’.

A rôh hôp, pôa Trần Văn Thuấn tối tiah kố: Ôh tá kâi gât ma tŭi cho pơreăng châi tiô rơnó dêi ngôa châ WHO mơnhên tối cho tơdroăng châ tiô rơnó ki hâi teăm ai pơkeăng pơlât prêi. Khu xiâm ngăn pơkeăng pơlât vâ môi tuăn tơ’nôm mơngế ki ôh tá chêh inâi mơgât pâk chik ki tơná vâ xêh tiô pơkâ dêi luât la tung pơla séa ngăn Hngêi tơleăng séa ngăn pơkâ ăm mơgât ki pơklât thế, lơ nôu pâ mơngế ki păn roăng dêi ngế ki mơdât pâk chik ma tŭi ki vâ lăm mơgât xêh.

Tung rôh má 1 kố, Vi ƀan pơkuâ cheăng Kuô̆k hô̆i ối ăm hnê tối ‘na Tơbleăng tơdroăng pêi pro apoăng dêi Khu kăn séa ngăn tơdroăng ‘na tơdroăng xĭng xoăng tíu pêi cheăng râ rơring, râ cheăm tung pơla hơnăm 2019-2021. Tối tơbleăng ăm ‘nâi rôh apoăng dêi Khu kăn séa ngăn mâu tơdroăng ‘’Tơdroăng pêi pro tiô luât ‘na tơdah kuăn pơlê ƀă tơleăng tơdroăng săm phoăng săm tơkêng ing hâi lơ 1/7/2016 troh lơ 1/7/2021’’. 

Pakĭng mê, a rôh hôp mê, Vi ƀan pơkuâ Kuô̆k hô̆i ối thế veăng hnê tối tơbleăng dêi Chin phuh ‘na mơgêi mâu tơdroăng, tối tâi tâng tơdroăng pêi pro tiô troăng rơhlâ ‘no liăn mơjiâng pro troăng Hồ Chí Minh; séa ngăn tơ’nôm tơdroăng tơkêa bro ‘na riân liăn ngân tơnêi têa ki tŏng kum ôh tá xo tơvêh dêi mâu kong têa ê;  tơdroăng pro ton hâi xo liăn ngân ‘no mơjiâng tơmeăm khoăng liăn ngân xiâm tơnêi têa hơnăm 2021 troh hơnăm 2022; ăm hnê tối ‘na tơdroăng tối hdrối pơkâ apoăng ‘no liăn cheăng ton hơnăm pơla hơnăm 2021-2025 ăm mâu tơdroăng tơkêa, mâu kơxô̆ liăn hâi xing xoăng.

VOV1

Gương tơplôu ƀă tơbleăng