VOV4.Xơ Đăng - Hâi lơ 4/4, a pơlê kong kân Cần Thơ, Khu pêi cheăng kăn teăng mâ hiăng tơkŭm po hneăng hôp ‘’Troăng séa ngăn ăm kăn teăng mâ kuăn pơlê rah xo’’ ăm mâu Kăn teăng mâ Kuô̆k hô̆i hneăng má XV, kăn teăng mâ hnê mơhno má môi Hô̆i đong kuăn pơlê, mâu ngế tơbleăng tơdroăng cheăng, ngế tơrŭm cheăng, kŏng chưk mâu ƀơrô Khu râ kăn teăng mâ Kuô̆k hô̆i ƀă Hô̆i đong kuăn pơlê mâu kong pơlê, pơlê kong kơdrâm peăng hdroh.

Pôa Trần Thanh Mẫn, Kăn phŏ hnê ngăn Kuô̆k hô̆i veăng ƀă hnê mơhno hneăng hôp. Hneăng hôp vâ ăm mâu kăn teăng mâ tơdroăng ‘na séa ngăn, mâu tơdroăng ki kal ăm tơdroăng séa ngăn, môi tiah: Troăng mơnhên tơdroăng, troăng kơ-êng, troăng séa ngăn tơdroăng, troăng tơbleăng tung tơdroăng séa ngăn ăm khu tơbleăng cheăng kum tơdroăng cheăng tung kơ koan kuăn pơlê rah xo. Hneăng hôp roh kố châ klâ chiâng 2 râ môi râ ăm mâu kăn teăng mâ Kuô̆k hô̆i ƀă kăn teăng mâ Hnê mơhno má môi Hô̆i đong kuăn pơlê.

Troh nôkố, Khu pêi cheăng kăn teăng mâ hiăng tơkŭm po 4 Hneăng hôp hnê tơ’nôm ăm kăn teăng mâ Kuô̆k hô̆i ƀă kăn teăng mâ Hô̆i đong kuăn pơlê a mâu kong pơlê Hà Nội, Huế ƀă Tuyên Quang.

A Sa Ly tơplôu ƀă tơbleăng