VOV4.Xơ Đăng - Hơnăm 2021, sap ing Khu râng liăn “Hngêi hơtô Kong đoân” rêm râ Kong đoân a kong pơlê hiăng teăm tŏng kum mơjiâng pro, ‘mâi rơnêu 120 toăng hngêi ăm đoân viên ki ai tơdroăng rêh ối xơpá ‘na hngêi ối ƀă tâi tâng kơxô̆ liăn kum lối 4 rơtal 500 rơtuh liăn.

Kơnốu hiăng hlâ, nâ Nguyễn Thị Loan, ối a cheăm Rốt, tơring Ea Súp, kong pơlê Dak Lak chiâng ngế ki tŏng kum ăm kuăn ối tơxĭn ƀă jâ, cho nôu peăng  kơnốu hiăng krâ. Tơdroăng rêh ối rơpŏng hngêi xơpá mê tơdroăng púi vâ ai môi toăng hngêi meăn pro lĕm ƀă nâ Loan cho hơngế păng ‘nâng. Nâ Loan tối: tơdroăng chĕn hngăm hngo xua mung pơlât dêi kơnốu, tô tuăn ‘na hmê kâ hmân ếo xâp ăm dêi rơ pŏng hngêi ƀă tơdroăng hriâm ăm dêi kuăn pro nâ trâm hên xơpá. Rêh tung hngêi pơtân hiăng tơ’nhiê nôu prếi kuăn, ƀă cháu tô tuăn xâu khât ‘nâng rêm hdrôh kong mêi khía xâu tơhnâp.

“Hlối khéa kho kơnốu hiăng hlâ, hlối khéa hơ’nêng tô tuăn ‘na cheăng kâ, la mơhúa ai mâu ngoh o tung Liên đoân ngăn cheăng pêi dêi tơring hlo tơdroăng rêh ối a xơpá mê hiăng tŏng kum má kuăn á ing hâi rơpŏng hngêi trâm pá puât. Malối, vâi ngoh o hiăng kum má kuăn a ai hngêi ối tơtô lĕm’’.

Diâp hngêi tơtô Kŏng đoân ăm mâu ngế ki pêi cheăng ki xơpá

Hơnăm 2021, nâ H’Ni Wong ɃKrông, đoân viên kŏng đoân cheăm Čư Huê, tơring Ea Kar, hâk phiu ro kơpuih krúa dêi hngêi nếo xua Liên đoân ngăn cheăng pêi dêi kong pơlê pro ăm. Hngêi nếo mê châ mơjiâng 70m2, kơnâ 180 rơtuh liăn. Tung mê, Liên đoân ngăn cheăng pêi kong pơlê kum 50 rơtuh liăn, khu pơkuâ ngăn lêng tơring Ea Kar kum 10 rơtuh liăn, kơxô̆ liăn u ối xua rơpŏng hngêi broăng ƀă mung ki nhŏng o xiâm.

Nâ H’Ni Wong hơ’muăn tối: Lối 10 hơnăm kố tơdroăng rêh ối dêi rơpŏng hngêi trâm hên xơpá mê má on veăng ối tơchoâm ƀă nôu pâ ƀă vâi o. Nôkố hiăng ai hngêi nếo kum rơpŏng hngêi ai tíu hding, tíu ối vâ mơ-eăm pêi cheăng kâ, mơnhông tơdroăng rêh ối.

“Xua kơxô̆ liăn pêi lo ôh tá hên, ôh tá châ mơjiâng pro hngêi ối mê chiâng ối tơchoâm ƀă vâi krâ dâng 10 hơnăm. Nôkố hiăng ai hngêi ối mê á mơnê tơdroăng veăng kum dêi mâu khu râ Đảng, ing mâu cheăm bêng tơring xuân môi tiah kong pơlê hiăng tơmâng kum pro tơ’lêi hlâu ăm má on veăng á  tơniăn tung rêh ối, vâ ngin hmiân tuăn pêi cheăng’’.

Diâp liăn kum mơjiâng pro hngêi ăm đoân viên ki xơpá

Tiô riên ngăn dêi Liên đoân ngăn mơngế pêi cheăng kong pơlê Dak Lak, tung hơnăm 2021, ing kơxô̆ liăn ‘măn kơdĭng “hngêi tơtô Kŏng đoân’’ rêm râ Kŏng đoân tung lâp kong pơlê hiăng teăm tŏng kum mơjiâng, ‘mâi rơnêu pro 120 toăng hngêi ăm đoân viên ki xơpá ‘na hngêi ối ƀă tâi tâng kơxô̆ liăn  tŏng kum pro lối 4 rơtal 500 rơtuh liăn.

Pôa Nguyễn Công Bảo, Kăn xiâm hnê ngăn Liên đoân pêi cheăng kong pơlê Dak Lak ăm ‘nâi: Tơdroăng “Hngêi tơtô Kŏng đoân’’ mâu hơnăm hdrối hiăng tâng tơdroăng môi tuăn dêi rêm râ Đảng, mâu kăn, khu râ kơvâ cheăng khu grup a cheăm tơring, mâu tíu pêi cheăng, khu mơdró tung kong pơlê kố ƀă kong pơlê ki ê.

Tơdroăng hiăng kum ăm mâu đoân viên, mơngế pêi cheăng ki xơpá hmiân tuăn pêi cheăng, rơtế hmâ tâ khu tơrŭm kŏng đoân, veăng ‘no hnoăng pro tơniăn rêh ối tung kong pơlê.

“Tung hơnăm kố nah, Hngêi tơtô kŏng đoân môi tiah mâu tíu pêi cheăng xuân pêi tro tơdroăng mơhnhôk mơngế pêi cheăng veăng kum, tơlo liăn ‘măn kơdĭng. Tiô pơkâ dêi ngin tung môi ngế đoân viên môi khế tơlo 5 rơpâu liăn. Ƀă kơ’nâi mê ngin ăm kŏng đoân râ kơpêng ƀă râ pá xôp 90% vâ xo kơxô̆ liăn mê mơjiâng tơdroăng pơkâ ƀă tơbleăng. Ối 10% ngin lôi ti mê vâ ăm mâu tíu pêi cheăng ki xơpá tâ. Pakĭng mê Liên đoân pêi cheăng kong pơlê ối mơhnhôk mâu tíu pêi cheăng ki ê veăng tơlo”.   

Mâu hngêi tơtô dêi kŏng đoân châ pơcháu hiăng pro tơdroăng sôk ro ăm tung đoân viên kŏng đoân, ing mê, vâi khên tơnôu mơjiâng hngêi trăng ăm dêi  rơpŏng hngêi.

Tuấn Anh chêh

Gương tơplôu ƀă tơbleăng