VOV4.Xơ Đăng - Hâi lơ 19/8, Hô̆i đong hnê ngăn kong pơlê Dak Lak hneăng  X, hơnăm 2021-2026 hiăng tơkŭm po Hneăng hôp má 5 vâ hnê, pơkâ mâu tơdroăng, troăng tơdjâ ki kal kân. A chôu phut hôp mê, mâu kăn hiăng vêh seá ngăn, tối tơbleăng 12 tơdroăng ki kal, tung mê, ai 7 tơdroăng ki ai tơdjâk troh hnoăng cheăng xiâm dêi tơnêi têa tung mơnhông pêi cheăng kâ rêh ối pơlê pơla kơpong pơlê cheăm dêi hdroâng kuăn ngo ƀă kong ngo, tơdroăng kơdroh kơklêa-kơtiê xahpá vâ kơ tơniăn, mơjiâng thôn pơlê nếo pơla sap ing hơnăm 2021-2025.

Tâ tá hneăng hôp

Ki nhên ga, tơdroăng pơkâ ‘na mơnhông pêi cheăng kâ, rêh ối pơlê pơla kơpong hdroâng kuăn ngo ƀă kong ngo hơnăm 2022, kong pơlê kô kơdroh 3,5% kơxô̆ rơpŏng kơtiê. Tâi tâng kơxô̆ liăn ki pêi pro mâu hnoăng cheăng ki kố ai lối 443 rơtal liăn. Tơdroăng pơkâ rak vế, pêi pro hnoăng cheăng xiâm dêi tơnêi têa tung veăng mơjiâng thôn pơlê nếo, troh a hơnăm 2025, Dak Lak kơdo mơ-eăm kô ai 4 khu ối a râ tơring, 100 to cheăm châ plah thôn pơlê nếo.

Vâ khoh châ chiâng pêi pro hnoăng cheăng mê, Hô̆i đong hnê ngăn kong pơlê Dak Lak vâ môi tuăn kô mơ’no liăn cheăng, veăng kum tơ’nôm ing liăn kơdĭng dêi Tơnêi têa hneăng má 5 hơnăm 2201-2025 ai 1.557 rơtal liăn, tung mê, kơxô̆ liăn dêi Tơnêi têa ai 657 rơtal liăn, kơxô̆ liăn dêi kong pơlê ai 900 rơtal liăn.

Nhat Lisa tơplôu ƀă tơbleăng