VOV4.Xơ Đăng - Măng tĭng hdrối, a Hneăng hôp má 4, Hô̆i đong hnê ngăn kong pơlê Dak Lak hneăng 10, mâu kăn hiăng tơkŭm tơpui tơno hên tơdroăng ki kal ai tơdjâk troh mâu troăng hơlâ pêi pro mâu tơdroăng pơkâ, hnoăng cheăng mơnhông mơdêk cheăng kâ reh ối pơlê pơla, rak vế tơniăn ‘na gâk kring pơlê pơla, cheăm bêng 6 khế mơ’nui hơnăm, mâu tơdroăng ki ai tơdjâk troh tơdroăng rêh ối dêi kuăn pơlê.

Tơbleăng a rôh hôp, 6 khế apoăng hơnăm, mơhé xuân ối tơdjâk troh pơreăng COVID-19, la tơdroăng cheăng kâ a kong pơlê Dak Lak hlo pơxiâm tơ-brê drêng tâi tâng kơxô̆ tơmeăm pêi lo tâk 7,37%, xo liăn ngân nâp ăm hngêi rak liăn tơnêi têa châ 4.860 rơtal liăn, tâk vâ chê 40% tâng vâ pơchông ƀă hơnăm hdrối; tê ăm kong têa ê châ 845 rơtuh dollars Mih, tâk lối 61%.

Mâu tơdroăng ôm hyô, mơdró kâ, pêi chêak deăng pêi lo kế tơmeăm lo hên ki tơ-brê. Laga, vâ xo liăn ngân mung mơjiâng pro tơmeăm khoăng tơnêi têa iâ, bú lối 20%; tơdroăng tăng cheăng pêi hâi ai tiô pơkâ, kơxô̆ mơngế lăm pâk vaccine hbrâ mơdât COVID-19 trum má 3 má 4 iâ, mâu tơdroăng pơkâ dêi tơnêi têa tơbleăng pêi ối hrá ƀă hên ki ê.

Klêi tơpui, mâu kăn vâ môi tuăn ƀă hlá mơ-éa chêh tơbleăng tơdroăng hiăng pêi pro 6 khế apoăng hơnăm, hlối pâ thế mâu tơdroăng veăng hnê tối vâ tơbleăng pêi châ tơ-brê 6 khế mơ’nui hơnăm, mê cho: Pro rơdêi ‘mâi pơ’lêh túa pro hlá mơ-rá ƀă tơdroăng tơ’mot mâu khu ‘no liăn cheăng; tơmâng khât ‘no liăn cheăng mơjiâng tơmeăm khoăng, mơnhông mơdêk pro troăng prôk tơdjâk tơdâng tơ’mô, tiô túa nếo.

‘Na kơvâ chiâk deăng, tơdjâk troh  tơdroăng plâi sầu riêng Việt Nam châ tê ăm kong têa Sinuâ ing hâi lơ 11/7/2022, pôa Trần Tiến, Kăn hnê ngăn Đảng tơring Krông Păč ai tối tiah kố: Kố cho rôh hlối cho ki apoăng mơnúa pơkâ ƀă ‘na tơmeăm pê lo ing chiâk deăng kong pơlê tung la ngiâ.

“Ngin púi vâ Vi ƀan kong pơlê ƀă rêm kơvâ cheăng malối cho kơvâ ’na chiâk deăng pơkâ mâu troăng rơhlâ, mâu tơdroăng ki hbrâ kum kuăn pơlê. Kuăn pơlê tung kong pơlê tơmâng khât xua nôkố pin hiăng ai dâng 12.000 ha loăng plâi sầu riêng hiăng ai plâi ƀă lối 125 rơpâu tâ̆n plâi kô thế châ tê tâng pin, tâng pin pêi ôh tá tro kô xơpá’’.

Tâ tá rôh hôp

Tơmâng troh ‘na mơnhông mơdêk krá tơniăn ton ăm kơpong hdroâng kuăn ngo, pôa Y Ca Eñuôl, Kăn phŏ hnê ngăn kuăn ngo dêi Hô̆i đong hnê ngăn kong pơlê Dak Lak tô tuăn drêng tiô pơkâ kơtiê ki nếo kơxô̆ rơpŏng kơtiê tung kong pơlê tâk hên. Tung mê, kơpong hdroâng kuăn ngo tâk troh 65%. Pôa Y Ca Eñuôl pơkâ thế, kal ai luât pơkâ tơmâng khât tâ nếo troh mâu ki mê:

“Pơkâ thế Vi ƀan hnê ngăn tơmâng hnê mơhno ƀă ai luât pơkâ pêi kơtăng tâ nếo tung tơdroăng xăm kơtiê. Pêi pro tiô pơkâ xăm kơtiê châ tơ-ƀrê, pêi ahdrối mâu luât pơkâ tŏng kum ƀă kơpong hngế hngo vâ xăm kơtiê rĕng krá ton. Xăm kơxô̆ rơpŏng kơtiê tung kơpong kuăn ngo, malối cho mâu rơpŏng kơtiê tung kuăn ngo ki rêh ối a pơlê, pêi pro tơdrêng ƀă mâu tơdroăng ki ê’’.

Tơpui tơno ‘na tơdroăng  pơkeăng, ‘na cheăng khăm pơlât, pôa Nguyễn Ngọc Hùng, kăn phŏ ngăn ‘na lĕm tro rêh ối pơlê pơla dêi Hô̆i đong kong pơlê Dak Lak tô tuăn ‘na tơdroăng ƀok thái pơkeăng ngăn a mâu hngêi pơkeăng tơnêi têa pâ pơtê cheăng ƀă tơdroăng tăng tơbriât mơjiâng pơkeăng, tơmeăm xúa tung khăm pơlât hrá, chiâng tơdjâk troh ivá kuăn pơlê. Xua mê, pôa pâ thế tơmâng khât tâ troh tơdroăng tơleăng mơnhên 2 tơdroăng kal ki tối mê:

“Tâng tơdroăng mê ôh tá ai troăng hơhlâ tơleăng mơnhên vâ xúa ăm tơtro, a xâu tung la ngiâ mâu hngêi pơkeăng tơnêi têa, malối râ kong pơlê kô ôh tá tŭm, ôh tơniăn ‘na mơngế cheăng ngăn pơkeăng khăm pơlât. Xua mê, pin thế ai troăng rơhlâ tơleăng mơnhên pêi pro ti lâi vâ mâu ngế ki pêi cheăng mê hmiân tuăn pêi cheăng ăm tơnêi têa a mâu hngêi pơkeăng ki vâi dế pêi, mê pin nếo kâi rak vế hnoăng cheăng pơkuâ tơniăn tro mâu tơdroăng cheăng’’.

Pôa Y Vinh Tơr - Kăn hnê ngăn ki hbrâ dêi Tíu xiâm Đảng- Kăn phŏ pơkuâ Vi ƀan ngăn hdroâng kuăn ngo, Ngế pơkuâ djâ khu kăn Kuô̆k hô̆i kong pơlê Dak Lak xông tơpui pơxiâm po rôh hôp

Tung 6 khế mơ’nui hơnăm, Vi ƀan kong pơlê Dak Lak nếo pơtối tơkŭm hbrâ mơdât pơreăng COVID-19 hlối ‘mâi mơnhông cheăng kâ – rêh ối  pơlê pơla. Vâ pê klêi mâu pơkâ mơnhông mơdêk hơnăm 2022, pôa Trần Phú Hùng, Kăn  phŏ hnê ngăn Hô̆i đong kong pơlê Dak Lak pơkâ thế Vi ƀan kong pơlê tơkŭm tăng troh tâng ki ‘’Xơpá tơvâ tơvân‘’, tung tơdroăng mung liăn vâ ‘no mơjiâng tơmeăm khoăng tơnêi têa:

“Pâ thế Vi ƀan tung tung pơla kĭ pơkâ mâu tơdroăng tơkêa bro, mâu kơ koan tí tăng ‘nâi plĕng thế séa ngăn nhên ví tơdroăng drêng Hô̆i đong hiăng pơkâ troăng rơhlâ ‘no liăn cheăng, la ga drêng ai pơkâ khât ah tơvâ tâng lơ thế ‘mâi rơnêu nếo  tơdroăng tơkêa bro, mê cho tơdroăng ki gu tơbăng tơnêi xĕn hngêi trăng pêi pro hrá tung chêl thiăn liăn. Xua mê chiâng mơdoh hên chôu, pâ thế vi ƀan ‘mâi rơ’nêu tơdroăng cheăng ki mê’’.

Tơdrêng ƀă tơdroăng tối ‘na cheăng kâ, tơdroăng hiăng klêi pêi tiô pơkâ mơnhông cheăng kâ - rêh ối, kring vế tơniăn cheăng lêng tung 6 khế apoăng hơnăm ƀă mâu tơdroăng cheăng pêi ki ê nếo tung 6 khế mơ’nui hơnăm, a rôh hôp mê, Hô̆i đong hnê ngăn kong pơlê Dak Lak hiăng tơpui tơbleăng hên pơkâ ki kal môi tiah tơdroăng: Pơkâ kơlo xo mâu liăn nâp.

Pơkâ ‘na tơdroăng ‘mâi hơ’lêh troăng rơhlâ ‘no liăn mơjiâng tơmeăm khoăng dêi mâu tơdroăng tơkêa bro tŏng kum mơnhông kơpong tíu tơkăng kong - Mâu tơdroăng tơkêa bro ki kŭn dêi kong pơlê Dak Lak; Tơdroăng ai Pơkâ ‘na pêi tro luât, tơdroăng pơkâ pêi, kơlo ki xing xoăng liăn ngân Tơnêi têa pêi Tơdroăng pơkâ tơnêi têa mơnhông cheăng kâ, rêh ối kơpong hdroâng kuăn ngo ƀă kong ngo, pơla hơnăm 2021-2030.

VOV Tây Nguyên

Gương tơplôu ƀă tơbleăng