Hâi lơ 17/11, Hô̆i đong kong pơlê Dak Lak tơkŭm po Hneăng hôp tơdroăng pêi cheăng roh má tơpah, hneăng má X, hneăng hơnăm 2021 – 2026. Hneăng hôp hiăng tơbleăng ăm pêi pro 11 tơdroăng pơkâ ki kal. Tung mê, tơtrŏng má môi cho Pơkâ pơ’lêh ƀă xing xoăng pơkâ pêi kơxô̆ liăn mơ’no mơnhông mơdêk mơjiâng kơxô̆ liăn ngân tơnêi têa ƀă liăn ngân kong pơlê pêi pro tơdroăng pơkâ xiâm tơnêi têa kơdroh kơtiê krá tơniăn, pơkâ pêi hơnăm 2022.

Pơkâ xing xoăng pơkâ pêi kơxô̆ liăn mơ’no cheăng mơjiâng kơxô̆ liăn ngân tơnêi têa hneăng hơnăm 5 hơnăm (2021 – 2025) pêi pro tơdroăng tơkêa bro hên hneăng 2,4,5,6,10 ối tung Tơdroăng pơkâ xiâm tơnêi têa mơnhông mơdêk cheăng kâ – rêh ối pơlê pơla kơpong vâi krâ hdroâng kuăn ngo ƀă kong ngo ăm mâu kơ koan, tíu cheăng, kong pơlê.

Xông tơpui mơgêi a hneăng hôp, jâ Huỳnh Thị Chiến Hòa, Kăn hnê ngăn Hô̆i đong kong pơlê Dak Lak tối, mâu pơkâ châ tơbleăng ăm pêi pro cho mâu pơkâ ki kal, vâ pêi pro nhên troăng hơlâ, luât dêi Tơnêi têa tơtro ƀă tơdroăng pêi pro nôkố dêi kong pơlê, mơjiâng pro luât vâ mâu khu râ, mâu kơvâ cheăng tơkŭm po rơdâ pêi pro. Ki rơhêng vâ tối cho pơkâ ‘na tơdroăng pơkâ pêi tơnêi têa hơnăm 2022 ƀă hneăng hơnăm 2021 – 2025.