Kơxê lơ 17/11, jâ Trương Thị Mai, ngế cheăng Khu xiâm pơkuâ kal kí, kăn pơkuâ Khu tơrŭm Tơnêi hiăng veăng ai mâ a Hâi leh Tơrŭm tâi tâng hdroâng kuăn ngo a kong pơlê Gia Lai. Hâi mơdĭng châ tơkŭm po a pơlê Wâu, cheăm Čư̆ Á, pơlê kong kơdrâm Plei Ku. Tơpui a hâi leh, jâ Trương Thị Mai rơkâu mâu tơdroăng pêi pro rơkê ki pơlê Wâu, cheăm Čư̆ Á hiăng mơ-eăm pêi pro klêi tung pơla hdrối nah.

Pơlê Wâu hiăng pêi klêi mâu tơdroăng pơkâ pơlê thôn pơlê nếo ƀă dế mơ-eăm vâ chiâng pơlê thôn pơlê nếo túa. Nôkố pêi lo liăn rêm ngế tung pơlê châ 44 rơtuh môi ngế tung môi hơnăm. Jâ Trương Thị Mai tối nhên: Mơnhông Tây Nguyên cho troăng hơlâ ki kân dêi Đảng, Tơnêi ƀă cho hnoăng cheăng ki kal, pêi đi đo, ai pơxúa kal ƀă mơnhông dêi mâu kong pơlê tung kơpong vâ mơ-eăm troh hơnăm 2030 Tây Nguyên kô cho kơpong mơnhông rĕng, krá ton, ai hên khôi túa lĕm tro hdroâng kuăn ngo. Drêng kố, jâ Trương Thị Mai hiăng diâp 5 to hngêi lăm dế, 60 hnoăng tơmeăm, liăn hriâm rơkê ăm mâu rơpŏng, vâi hdrêng ki ai tơdroăng rêh ối xơpá.