Xông tơpui a Vi ƀan cheăm Thanh Long, tơring Văn Lãng, jâ Võ Thị Ánh Xuân mơnhên, kheăn kơdeăn hiâm mơno rŭm môi tuăn, tơkâ hluâ pá puât dêi Đảng ƀô̆, khu râ kăn pơkuâ kong pơlê Lạng Sơn tối tơdjuôm, tơring Văn Lãng tối krê vâ châ tơƀrê kal khât tung mơnhông mơdêk cheăng kâ – rêh ối pơlê pơla, mơdêk tơdroăng rêh ối kuăn pơlê. Kăn xiâm phŏ hnê ngăn tơnêi têa pơkâ thế tung la ngiâ, cheăm pơtối mơnhông mơdêk mơngế pêi cheăng, hbrâ ƀă pêi pro tơdrêng mâu tơdroăng ki ê tơtro vâ ai mâu troăng tơtêk nếo tung mơnhông mơdêk cheăng kâ – rêh ối pơlê pơla.

Klăng roh kố, Kăn xiâm phŏ hnê ngăn tơnêi têa hiăng diâp hên kơxuô tơmeăm troh mâu rơpŏng ai hnoăng, rơpŏng kơtiê, vâi hdrêng ai tơdroăng rêh ối pá puât a tơring Văn Lãng ƀă kăn ƀô̆, mâu mô đô̆i Đông Mô đô̆i gâk tơkăng kong Na Hình, tơring Văn Lãng. Rơtế a hâi ki mê, jâ Võ Thị Ánh Xuân xuân lăm pôu, diâp kơxuô tơmeăm ăm 200 ngế kŏng nhân, mơngế pêi cheăng ai tơdroăng rêh ối pá puât tung cheăm.