Tiô tơkŭm tâi tâng dêi Tổng Liên đoân Lao động Việt Nam, sap khế 9/2022  ta troh tâi hâi lơ 10/12 hiăng ai 1.242 khu mơdró trâm xơpá,  thế kơdroh tơmeăm pêi mê thế kơdroh chôu pêi cheăng dêi 482.10 ngế pêi cheăng. Tung mê, kơdroh chôu pêi cheăng lơ dế pơtê cheăng ai kâ liăn khế  433.908 ngế, châ 90% tung tâi tâng kơxô̆ mơngế tro tơdjâk. Ai dâng 6.600 ngế thế pơtê hợp đồng, pơtê cheăng la ôh tá ai liăn khế.

Tơdroăng khu mơdró kơdroh tơmeăm pêi, mơngế pêi cheăng thế pơtê cheăng lơ pêi kơdroh tơdoăng cheăng, pro chiâng tơdjâk kân, malối cho roh Tết Lo hơnăm nếo vâ chê troh. Kơvâ pơchoh hơmân ếo cho môi tung mâu kơvâ cheăng tro tơdjâk troh hên má môi drêng tơmeăm pêi mơ’nui hơnăm dêi hên khu mơdró tro kơdroh sap 15% troh 50%, vâ tối tơdjâk troh tơdroăng pêi cheăng dêi rơtuh ngế ki pêi cheăng.

Pôa Trương Văn Cẩm, Kăn phŏ hnê ngăn Khu Pơchoh hmân ếo Việt Nam tối:

“Ai to lâi la troh nôkố ngin hlo Khu mơdró châ achê môi tiah kơxô̆ liăn tŏng kum ‘na tơniăn rêh ối ƀă cheăng pêi 48,5 rơpâu rơtal liăn ăm mâu ngế pêi cheăng; 110 rơpâu rơtal liăn kum ăm khu mơdró, tung mê ăm boăng a liăn rơkâ 2%, pin xuân hâi chiâng pêi tơdroăng mê. Kơxô̆ liăn VAT kơdroh pro hnoăng mơhá 2% mê ngin pơkâ thế pơtối pêi pro ăm khu mơdró. Mâu luât pơkâ ‘na Ƀoah hiêm pơlê pơla, Ƀaoh hiêm kuăn mơngế ối hên tơdroăng tơvâ tơvân ki ngin hiăng pơkâ thế mê xuân pơkâ thế tí tăng ‘nâi plĕng vâ  mơnhên’’. 

Tiô jâ Trần Thị Lan Anh, Ngế xiâm chêh tôm xo rơkong dêi Liên đoân ngăn tê mơdró ƀă kơmăi kơmok Việt Nam tối tiah kố, tơdroăng pêi cheăng tê mơdró dêi khu mơdró ôh tá rơhéa to lâi tung khế mơ’nui hơnăm ƀă tối tơbleăng hdrối kô ton, ki iâ gá kô tâi khế pái hơnăm kố ah.

“Hlo mâu tơdroăng xơpá mê, Khu xiâm tơrŭm tê mơdró ƀă cheăng kơmăi kơmok pâ thế kal rak tơniăn cheăng kâ kân, ai tơdroăng mơhnhôk pêi tung tơnêi têa, tŏng kum mơnhông tê mơdró, tăng tíu tê mơdró  nếo, tơmeăm nếo. Pakĭng mê, kal pơtối pê klêi ƀă tơbleăng luât pơkâ tŏng kum ăm mâu ngế pêi cheăng ƀă ngế ki xúa mơngế pêi cheăng ƀă kơxô̆ liăn kơjo kum ‘na luât pơkâ tŏng kum liăn; luât tŏng kum ăm mung liăn; vâ tơniăn tung rêh ối; tung mê, ai kum hdrối cho tŏng kum ăm mâu khu mơdró krâ kơvâ ƀă kŭn. Kal thế ‘mâi hơ’lêh mâu pơkâ luât tê mơdró tăng mơngế pêi cheăng ăm tơtro tâ ƀă tơdroăng ki ai khât, hnê, klêi mê hnê nếo’’.

Tung pơla mê, pôa Ngọ Duy Hiểu, Kăn xiâm phŏ Tổng Liên đoân Lao động Việt Nam tối tiah kố, kal hên troăng rơhlâ  tơdâng, hlối kơjo kum tung iâ hâi kum mơngế pêi cheăng tơkâ luâ xơpá, ối pêi cheăng ‘nôi tung kơchơ tê mơdró lơ rĕng vêh nếo tơdroăng tê mơdró, hlối kơjo kum tung ton hơnăm vâ mơdêk hmâ hlối kâi trâng dêi mơngế pêi cheăng hdrối ai tơdroăng ôh tá tơniăn, tơdjâk dêi kơchơ tê mơdró.

“Ki hdrối, kal mơdêk ăm ‘nâi tơdroăng nếo ai ‘na kơchơ pêi cheăng, tơbleăng mâu tơdroăng, troăng rơhlâ kum mơngế pêi cheăng tơ’lêi hlâu châ ‘nâi mâu tơdroăng rah xo, ƀă mâu tíu xiâm tăng mơngế pêi cheăng khât, mâu khu mơdró, khu tơrŭm dế kal tăng mơngế pêi cheăng. Pakĭng mê, pơtối rak hnoăng cheăng dêi khu mâu ki xúa mơngế pêi cheăng tung tơdroăng tơdjêp vâ tơbleăng tơdroăng cheăng pêi ăm mơngế pêi cheăng ing mâu khu mơdró  ôh tá mơhno cheăng pêi troh mâu khu mơdró’’.

Vâ tơkâ luâ tơdroăng pá xuân môi tiah ôh tá ‘nâi hdrối tơdroăng xơpá la ngiâ, pôa Vũ Trọng Bình, Ngế xiâm ngăn cheăng pêi, Khu xiâm ngăn mố đô̆i tro rong ƀă rêh ối pơlê pơla tối tiah kố, kal ai troăng rơhlâ tơkâ luâ ƀă tiâ mâu tơodroăng dế pơkâ a tâi tâng tơdroăng pêi cheăng, cheăng pêi ƀă tơniăn rêh ối. Nôkố, Khu xiâm ngăn cheăng pêi – Mố đô̆i rong ƀă pơlê pơla dế tơrŭm ƀă mâu khu xiâm, kơ koan tơdâng khu xiâm pơtroh ăm Chin phuh pơkâ ‘na mơnhông mơdêk kơchơ tăng mơngế pêi cheăng vâ ‘mâi mơnhông cheăng kâ-rêh ối.

“’Nôkố ai môi tơdroăng kal klât ki lâi ‘lo vâ tơrŭm ƀă tâi tâng lâp tơnêi têa mâu khu mơdró tơdroăng dêi tê mơdró dêi kuăn pơlê tung tơnêi têa ƀă kong têa ê ƀă tơdroăng tăng cheăng pêi, mê Bình Dương cho ƀă mâu kong pơlê dế pơkâ thế, tâng ôh pin kô mơjiâng Kâu lak ƀô̆ tăng mơngế cheăng pêi lơ Khu tăng mơngế pêi cheăng. Luât pơkâ tê mơdró mơngế pêi cheăng mê kum tơnêi têa xing xoăng, tŏng kum tơ’lêi hlâu tâ’’.

Hlo mâu tơdroăng xơpá nôkố drêng Têt Lo hơnăm nếo dế vâ chê troh kal thế Chin phuh, mâu khu xiâm, kơvâ cheăng ai tơdjâk troh kal tơdroăng thế tơbleăng mâu troăng rơhlâ pơkâ tơdrêng vâ kơdroh ki xơpá ăm khu ăm khu mơdró ƀă mơngế pêi cheăng, rak mơngế pêi cheăng ƀă rơkê cheăng, veăng ‘no hnoăng tơniăn tê mơdró mơngế pêi cheăng, hbrâ vâ ăm rôh ‘mâi mơnhông tung hơnăm 2023.