VOV4.Xơ Đăng - Hâi lơ 11/1 pơla hdrối kố nah, a Hà Nội, Vi ƀan hdroâng kuăn ngo hiăng tơkŭm po Rôh hôp Mơgêi pêi pro Pơkâ kơxô̆ 45/QĐ-TTg dêi Ngế pro xiâm hnê ngăn Chin phuh ‘na tơdroăng “Hbru mâu lĭch um, hlá tơbeăng ăm kơpong hdroâng kuăn ngo ƀă peăng kơpong, kơpong ki malối xơpá” hneăng hơnăm 2019 – 2021 ƀă tơbleăng hnoăng cheăng dêi mâu hơnăm ki pơtối. A rôh hôp, mâu kăn pơkâ thế tung la ngiâ kal mơdêk tơ’nôm mâu tơdroăng ki tối tơbleăng tung um tơvi pêi pro châ tiô tơdroăng ki kal môi tiah tơpui tung rơ’jiu, tơbleăng ‘na kih thuât vâ kuăn pơlê châ ‘nâi, châ hlo mâu tơdroăng ki kal hơ’lêh tung măng Internet.

Kơ’nâi 3 hơnăm tơbleăng hiăng ai vâ chê 34 rơtuh hlá tơbeăng dêi 19 tíu chêh hlá tơbeăng ƀă hlá tơbeăng ki ăm tê kơtê troh a mâu cheăm, thôn, pơlê tung lối 424 rơpâu ngế kuăn ngo ƀă kuăn pơlê kơpong kong ngo, kơpong hngế hngo dêi 54 kong pơlê tung lâp tơnêi têa.

Mâu hlá tơbeăng veăng hnê tối troăng rơhlâ luât dêi Đảng ƀă Tơnêi têa tối tơchoâm ƀă tơdroăng cheăng kuăn ngo, luât pơkâ hdroâng kuăn ngo tối krê veăng pêi tơdroăng pơkâ dêi tơnêi têa mơnhông cheăng kâ rêh ối kơpong kuăn ngo, kong ngo pơla hơnăm 2021-2030; hnê tơ’nôm ‘na mơhno túa lĕm tro ăm mâu kuăn ngo, mơdêk hlê plĕng tung pêi chiâk, cheăng kâ rêh ối dêi kuăn pơlê, hlối tơbleăng troh lâp lu khôi túa, vêa vong dêi mâu hdroâng kuăn ngo. 

Hneăng hôp tơpui tơno

A hneăng hôp, Mâu kăn veăng hôp xuân khĕn kơdeăn mâu tơdroăng hiăng pêi pro tiô Pơkâ kơxô̆ 45/QĐ-TTg pơla hơnăm 2019-2021 ăm kơpong hdroâng kuăn ngo ƀă kong ngo. Kăn teăng mâ mâu hdroâng kuăn ngo  dêi mâu kong pơlê xuân pâ thế hên troăng rơhlâ vâ pêi tro tâ nếo tung pơla hơnăm 2022-2025 môi tiah mơdêk tơ’nôm mâu túa tối tơbleăng ai tiô pơkâ môi tiah mơ’no tung rơ’jiu, ăm ‘nâi ‘na kih thuât vâ mâu hdroâng kuăn ngo châ ‘nâi mâu tơdroăng ‘na kơxô̆ pơ’lêh nếo tung măng Internet.

Pôa Lê Ngọc Vinh- Ngế pơkuâ ngăn Kuăn ngo kong pơlê Dak Lak pâ thế:

“ ‘No liăn cheăng vâ mơjiâng tơmeăm khoăng, hbrâ tŭm tâi tâng mâu tíu mơ’no rơ’jiu, um tơvi a cheăm. Kố cho ƀâng mơ’no tơbleăng tơdroăng kal, ai pơxúa khât ƀă tơ-ƀrê tung tơdroăng tơbleăng hnê troăng rơhlâ dêi Đảng, luât Tơnêi têa, tơdroăng nếo ai ‘na kal kí ƀă hnê tơdroăng rêh ối túa pêi cheăng, pơtối rak vế khôi túa lĕm tro vêa vong, dêi hdroâng kuăn ngo”.

Ngế xiâm pơkuâ Vi ƀan ngăn Kuăn ngo pôa Hầu A Lềnh tơbleăng a hneăng hôp

Mâu kăn xuân pâ thế hên troăng rơhlâ vâ pêi tro tâ tung pơla hơnăm 2022 - 2025 mê cho: Mơdêk hnoăng cheăng dêi Khu ngăn Kuăn ngo mâu kong pơlê pơ’lêh nếo tơdroăng ăm ‘nâi ‘na tơdroăng nếo ai (Mơdêk tơ’nôm ‘na hlá tơbeăng um, kơxô̆ hoă tung măng xah hô̆i, ‘no liăn cheăng tơdrêng tơdâng ‘na mơ’no tung Rơ’jiu, ăm mâu tơmeăm kơmăi ki hnê tối ...); mơhnhôk kuăn pơlê hmâ tơdroăng pơchuât ngăn hlá tơbeăng; teăm tơdrêng pơ’lêh ƀă po rơdâ mơngế xúa tơdroăng tŏng kum; mơdêk ki tơ-ƀrê, mơdêk tơ’nôm tơdroăng, chuyên đề mê cho troăng rơhlâ: luât pơkâ, khôi túa vêa vong mơhno ki lĕ tro; mơjiâng ƀâng vâ tơdjêp, hnê tối ăm ‘nâi mâu tơdroăng  ƀă hiá hé.

Tơbleăng mơgêi hneăng hôp, Ngế xiâm hnê ngăn Vi ƀan Kuăn ngo cho pôa Hầu A Lềnh tối: Troăng rơhlâ pơkâ ăm môi kơxô̆ hlá tơbeăng, hlá tơbeăng mê oh tá xo liăn ăm kơpong hdroâng kuăn ngo ƀă kong ngo cho troăng rơhlâ, luât pơkâ tơtro dêi Đảng ƀă tơnêi têa. Tung la ngiâ kô pơtối ăm mâu hlá tơbeăng ƀă mâu hlá tơbeăng ki ê ăm kơpong hdroâng kuăn ngo ƀă kong ngo.

Xua mâu túa tơbleăng hnê mê ôh tá xê to kum mơdêk hlê plĕng, pơ’lêh tơdroăng pêi pro rêh ối, túa pêi cheăng kâ mê ối cho ƀâng tối ki ai khât vâ pro xiâm pơ’lêh, tơ’nôm, ‘mâi rơnêu pê klêi tơdroăng pơkâ tŏng kum hdroâng kuăn ngo.

Pôa Hầu A Lềnh Ngế xiâm pơkuâ tối nhên:

“Luâ 3 hơnăm pêi pro ƀă pơkâ mơ-eăm dêi pin pơla 5 hơnăm sap nôkố troh hơnăm 2025, hiăng ai troăng rơhlâ, pin hiăng mơgêi, tối nếo, la ngiâ kố ah ai pơkâ vâ pêi yoh, tơdroăng gá pin pro ti lâi tê. Vâ pro ti lâi tâi tâng mâu kơ koan chêh hlá tơbeăng, mâu kơ koan tí tăng ‘nâi plĕng dêi khu xiâm kơvâ cheăng tí tăng ‘nâi nhên ăm khu xiâm kơvâ cheăng tơrŭm ƀă Vi ƀan hdroâng kuăn ngo pêi tro tâ”.

Vâ mâu tơdroăng nếo ai, troăng rơhlâ, luât pơkâ... châ hnê tối tro tâ ƀă mâu hdroâng kuăn ngo ƀă kong ngo, tiô tơdroăng pơkâ dêi Vi ƀan ngăn kuăn ngo Hầu A Lềnh, kal mơdêk ki tơ-ƀrê, pơ’lêh nếo tơdroăng cheăng pêi, tơdroăng chêh dêi mâu hlá tơbeăng tiô troăng rơhlâ tơtro, rơtế hmâ ƀă tơdroăng kal vâ ‘nâi mâu tơdroăng dêi mâu hdroâng kuăn ngo.

Tung tơdroăng mơnhông mơdêk tơchoâm, rơdâ mâu túa hlá tơbeăng tung hên tơdroăng, hlá tơbeăng chêh xuân cho ki rơdêi ƀă kơpong hdroâng kuăn ngo, xua mê, kal pơtối rak vế ki rơdêi dế hlá tơbeăng chêh tung hnê tối tơbleăng ăm kuăn pơlê. Pakĭng mê, Ngế pơkuâ Vi ƀan ngăn Kuăn ngo xuân pơkâ thế mâu khu xiâm, kơvâ cheăng, kong pơlê tơring cheăm ki tơdjâk troh kal tơrŭm vâ tí tăng séa ngăn pêi tro tiô troăng rơhlâ, veăng mơdêk tâ nếo ki tơ-ƀrê dêi tơdroăng pơkâ kơxô̆ 45/QĐ-TTg hâi lơ 9/1/2019 dêi ngế pro xiâm hnê ngăn Chin phuh.

VOV chêh

Gương tơplôu ƀă tơbleăng