VOV4.Xơ Đăng - A rôh hôp má 8, Vi ƀan pơkuâ Kuô̆k hô̆i hiăng tơkŭm tơpui tơ’no ƀă môi tuăn ‘na tơdroăng ki kal pơkâ ‘na kơvâ, hnoăng cheăng, hnoăng pơkuâ ƀă tơdroăng ki tơrŭm mơjiâng dêi Khu pêi dêi hnoăng cheăng vâ pêi pro tiô tơdroăng pơkâ hơ’lêh nếo tung tơrŭm, tơƀrê tơdroăng cheăng dêi Kuô̆k hô̆i, mâu kơ koan dêi Kuô̆k hô̆i.

Vâ tối môi tuăn ƀă tơdroăng tơ’nôm hnoăng cheăng pêi dêi  Khu cheăng Hô̆i đong ‘na tơdroăng  Hô̆i đong hnê ngăn kuăn pơlê, tơdroăng cheăng tâ phĭu cho hnoăng cheăng dêi râ Vi ƀan pơkuâ cheăng Kuô̆k hô̆i vâ pơ’lêh tâ hnoăng cheăng dêi Khu cheăng hô̆i đong, ai mâu ki ‘nâ xuân pâ thế klâ nhên mâu tơdroăng cheăng pêi, hnoăng cheăng pêi dêi khu kăn ƀă hnoăng pơkuâ dêi Khu cheăng Hô̆i đong, khu tơrŭm cheăng ki ai tơdjâk troh vâ ví pêi mâu tơdroăng tơvâ tơvân, mâu todroăng cheăng ki môi tiah.

Tơpui tơno ‘na tơdroăng cheăng dêi Khu cheăng Hô̆i đong tơrŭm ƀă Vi ƀan ngăn ‘na luât tí tăng ‘nâi plĕng, kum ăm Vi ƀan pơkuâ cheăng Kuô̆k hô̆i tung tơdroăng veăng hnê tối ƀă tơdroăng rup, kroăng, rak, tơleăng kăn Kuô̆k hô̆i, khăm ngăn tíu ối, tíu pêi cheăng dêi mâu kăn Kuô̆k hô̆i ƀă mâu kăn Kuô̆k hô̆i ki lâi ai pro xôi tiô Ngế xiâm pơkuâ Vi ƀan rêh ối pơlê pơla dêi Kuô̆k hô̆i Nguyễn Thúy Anh kô cho hnoăng pêi pro dêi Vi ƀan ‘na Luât:

Tơdroăng khăm ngăn, rup râng mâu kăn, Vi ƀan ngăn ‘na Luât thế séa ngăn tơdroăng tung pơla mê, pro hlá mơ-éa mê há lơ ôh. Tơdroăng rup râng ai tơtro ƀă Luât há lơ ôh. Mê cho tơdroăng dêi Vi ƀan ngăn ‘na Luât ôh tá xê hnoăng cheăng dêi khu kăn cheăng ‘na Hô̆i đong” .

Hneăng hôp má 8 ăm hnê tối ‘na tơdroăng séa ngăn tơdroăng tung hlá mơ-éa chêh Pơkâ luât ki pơkâ cheăng dêi Vi ƀan pơkuâ Kuô̆k hô̆i

Vi ƀan pơkuâ cheăng Kuô̆k hô̆i tối tiah kố, tơdroăng tơ’nôm hnoăng cheăng pêi, hnoăng pơkuâ tối a kơpêng mê cho tơdroăng chêh tung hlá mơ-éa Pơkâ cho tơtro ƀă tơdroăng ki ai khât ƀă tiô pơkâ ƀă tơdroăng cheăng kăn ƀô̆. Pakĭng mê, môi tuăn pơkâ thế Khu cheăng tung Hô̆i đong pơkuâ tung mâu tơdroăng cheăng mê vâ tơtro ƀă tơdroăng pơkâ cheăng pêi dêi kăn ƀô̆ ƀă kơlo ki thâ pêi rĕng dêi tơdroăng cheăng mê tiô pơkâ dêi Luât ‘na săm phoăng, săm tơkêng. Mâu ngế tung Vi ƀan pơkuâ cheăng Kuô̆k hô̆i  xuân pâ thế, tơ’nôm mâu tơdroăng kal tí tăng ‘nâi plĕng, tơkŭm pêi tơdroăng tơdjâk troh tơdroăng cheăng rak ngăn kăn ƀô̆ ƀă Khu kăn Kuô̆k hô̆i pêi cheăng ‘na pơkuâ ngăn; Tơdroăng pơkâ, hnê mơhno ƀă tơkŭm pêi pro tơdroăng cheăng khĕn kơdeăn, pêi tro pơkâ, luât pơkâ tŏng kum ƀă mâu tơdroăng pro tơniăn ki ê ƀă mâu kăn Kuô̆k hô̆i ăm tơtro.

Pôa Vương Đình Huệ, Kăn xiâm hnê ngăn Kuô̆k hô̆i pơkâ thế,  kal pơkâ nhên tơdroăng cheăng pêi, hnoăng chiâng pêi dêi Khu cheăng tung Hô̆i đong tung tơrêm tơdroăng cheăng dêi Khu cheăng ‘na Hô̆i đong hnê ngăn tung tơdroăng cheăng, malối cho tơdroăng cheăng mâu kăn ing tâ phĭu rah xo kăn Kuô̆k hô̆i troh drêng mâu ki cheăng mê pơtê xua hơnăm hiăng krâ:   

“Tơdroăng cheăng tâ phĭu akố ai pơkâ nhên Khu cheăng ‘na Hô̆i đong hnê ngăn kum pêi cheăng ăm Hô̆i đong tâ phĭu dêi Tơnêi têa ƀă Khu kăn pơkuâ cheăng Kuô̆k hô̆i mâu tơdroăng kal? Séa ngăn nếo ki lâi Khu pơkuâ, ki lâi tơrŭm? Ƀă luât pơkâ tŏng kum, luât pơkâ dêi mâu kăn Kuô̆k hô̆i ƀă mâu kăn ƀô̆ ki pơkuâ rak ngăn Vi ƀan pơkuâ cheăng Kuô̆k hô̆i? Tơdroăng cheăng kăn ƀô̆ vâ  tá drêng nếo mơjiâng, rôh hôp apoăng ƀă tung pơla kơ’nâi mê xuân thế pơcháu ăm môi Khu cheăng ‘na Hô̆i đong hnê mâu kăn Vi ƀan dêi Kuô̆k hô̆i, Hô̆i đong hnê ngăn kuăn pơlê, mâu Vi ƀan tơkŭm pêi pro tiô mâu pơkâ kăn ƀô̆ séa ngăn, pơkâ mâu tơdroăng ki mê”.

Xuân a rôh hôp má 8, Vi ƀan pơkuâ cheăng Kuô̆k hô̆i, mâu kăn hiăng veăng hnê tối a hlá mơ-éa chêh Pơkâ ‘mâi pơ’lêh Pơkâ luât pêi cheăng dêi Vi ƀan pơkuâ cheăng Kuô̆k hô̆i. Mâu kăn vâ môi tuăn ƀă 3 khu tơdroăng kal cho hnê tơdroăng cheăng ‘mâi pơ’lêh Luât pơkâ vâ ai tiô tơdroăng púi vâ pơ’lêh nếo tơdroăng pêi, mơdêk ki tơ-ƀrê tơdroăng cheăng dêi Kuô̆k hô̆i, mâu kơ koan dêi Kuô̆k hô̆i. Mâu kăn pơkâ thế tơdroăng ‘mâi pơ’lêh luât pêi cheăng dêi Vi ƀan pơkuâ cheăng Kuô̆k hô̆i tơtro ƀă tơdroăng pơ’lêh nếo dêi khu cheăng kal kí, mơdêk pơ’lêh kơxô̆, mơjiâng Kuô̆k hô̆i điê̆n tưh, hmâ rơkê ƀeăn, tơ-ƀrê tung mâu tơdroăng malối, tung pơla rơ-iô ai pơreăng  COVID-19 tâ tú...

Pakĭng mê, kal ‘nâi nhên ki kal cho luât pơkâ ôh tá chiâng pơkâ hnoăng pêi pro ki nếo dêi Vi ƀan pơkuâ cheăng Kuô̆k hô̆i mê bú pơkâ mâu tơdroăng hmâ pêi pro, hlá mơ-éa pro nhên vâ pêi mâu  hnoăng cheăng hiăng châ pơkâ tung mâu luât, luât ki pơkâ, tơdroăng pơkâ dêi Kuô̆k hô̆i, Vi ƀan pơkuâ cheăng Kuô̆k hô̆i.

VOV1 chêh

Gương tơplôu ƀă tơbleăng