VOV4.Xơ Đăng - Măng tĭng hdrối nah, hiăng po Rôh hôp má 7 dêi Vi ƀan pơkuâ Kuô̆k hô̆i, ăm rơkong veăng tơpui tối tung hên tơdroăng ki kal vâ pơtroh ăm Kuô̆k hô̆i a Hneăng hop má 3,po a khế 5 la ngiâ. Tung mê, tơdroăng ki ‘mot tơ’nôm “Mê dái Droh rơtăm djâ troăng ahdrối khên tơnôu” tung kơxop hlá mơ-éa Luât Tơ’noăng, khĕn kơdeăn ki ‘mâi rơnêu cho tơdroăng ki châ mâu kăn ƀă kuăn pơlê tơmâng ngăn khât.

Vi ƀan pơkuâ cheăng Kuô̆k hô̆i hiăng tơkŭm hnê tối ‘na môi tơdroăng ki kân ối hnê tối pơrá phá vâ pơtroh ăm Kuô̆k hô̆i hiăng tơkŭm mâu tơdroăng  hnê tối ‘na mâu tơdroăng ki kân ối veăng tối pơrá phá dêi rơpó vâ pơtroh ăm Kuô̆k hô̆i séa ngăn tơbleăng a rôh hôp má 3, mê cho: séa ngăn tơ’nôm inâi cheăng pêi cheăng tơ-ƀrê, bêng, pơlê kân pêi cheăng tơ-ƀrê: tơ’nôm Huy chương Droh rơtăm ki pleăng hnoăng tơná ó rơdêi roh nah;  ‘na Mê dai tơbâ  kih niê̆m chương râ kong pơlê tung mê ai Hô̆i đong hnê ngăn kuăn pơlê râ kong pơlê, mơgêi khĕn kơdeăn hnoăng tơplâ; pơxâu phak mâu ki xôi tung tơ’noăng, khĕn kơdeăn.

Vâ tơ’nôm inâi “Huy chương Droh rơtăm ki pleăng hnoăng tơná ó rơdêi roh nah” chêh tung tơdroăng tơkêa Luât ‘mâi hơ’lêh rôh kố, Ngế pơkuâ ngăn tơdroăng cheăng dêi mâu Kăn Kuô̆k hô̆i jâ Nguyễn Thị Thanh tối nhên khu lêng Droh rơtăm pleăng hnoăng tơná ó rơdêi rôh nah ai hên hnoăng, hiăng pleăng tơná, ‘na hlâ rêh, veăng ‘no hnoăng kân tung mơnhông tơnêi têa dêi hdroâng kuăn ngo:

“Tung tối tơbleăng 120 ai tối thế kơdroh tơdroăng khĕn kơdeăn râ tơnêi têa. A tơmiât kố cho troăng rơhlâ ki tro, la thế xúa ăm tơdroăng tơ’noăng khĕn kơdeăn nôkố  ƀă tung la ngiâ. ‘Na droh rơtăm pleăng hnoăng tơná rôh nah cho tơdroăng hơ’muăn tơdjâk troh tơdroăng tơplâ ƀă mâu tơdroăng ki u ối kơ’nâi mê, ki ối lôi ƀă ki hâi chêh tung mâu hơnăm hdrối mê hía nah ki pin hâi tơ’môm teăm tơdrêng. Mâu ki mê, mâu rơxông ki mê, mâu kăn krâ rế krâ ôh tá ai xếo. A tơmiât ki mê ai pơxúa tâ, tro tâ drêng pơkâ mê thế tơmiât nhên hdrối ‘nôi vâ pơkâ”.

Pôa Vương Đình Huệ, Kăn xiâm hnê ngăn Kuô̆k hô̆i tơbleăng a hneăng hôp

Xuân ai veăng hnê tối môi tiah, pôa Nguyễn Đắc Vinh, Ngế pơkuâ Vi ƀan ngăn túa lĕm tro, hnê hriâm dêi Kuô̆k hô̆i tối tiah kố:

“Kố cho ngế ai hên hnoăng pleăng tơná tung rơxông tơplâ nah. Vâ tối cho tơxâng. ‘Na luât mê pin ai môi Huân chương vâ mơnhên mâu ngế ki veăng tơplâ a tơmiât cho tơxâng ‘nâng. Bú ai mâu ngế ki veăng tơplâ ƀă mâu ngế ki ê veăng tung rôh tơplâ mê pin kô tăng hlo mâu tơdroăng vâ tơleăng mơnhên pơtối ăm tơdâng tơ’mô mê”.

Mâu kăn pâ thế Chin phuh kô pơtối séa ngăn mâu ngế droh rơtăm ki pleăng hnoăng tơná tơplâ nah ki hâi châ mơnhên khĕn kơdeăn ai hnoăng tơplâ tiô pơkâ. Tiah mê, vâ ôh tá tro lôi gá tơdroăng khĕn kơdeăn mâu ngế ai hnoăng tung tơplâ nah ƀă hnê mơhno rêm râ kăn cheăm, tơring, kong pơlê châ tơmâng tŏng kum, tŭm tơdroăng ki pơkâ tŏng kum ƀă mâu droh rơtăm ki ai hnoăng pleăng hnoăng tơná lăm tơplâ nah, pêi tro tơdroăng “châ niân tiah hâi kố xua hnoăng vâi krâ nah”, “pâ mơnê mâu ai hnoăng”, pôa Hoàng Thanh Tùng, Ngế pơkuâ Vi ƀan ngăn ‘na Luât dêi Kuô̆k hô̆i , tối:

“Tơdroăng khĕn kơdeăn mê ai pin pơ’lêh mâu ngế ăm achê tâ, tro tiô pơkâ hên tâ vâ kơdroh ki pơrah ƀă tơdroăng kih niệm chương. Kih niệm chương dêi Đoân Droh rơtăm kŏng sản Hồ Chí Minh ăm ing tơdroăng pơkâ dêi  môi khu cheăng kal kí - rêh ối pơlê pơla dêi droh rơtăm ăm mâu droh rơtăm pleăng hnoăng tơná tơplâ, ôh tá xê to tơdroăng pro tơdroăng khĕn kơdeăn Huy chương a râ tơnêi têa xua Kăn xiâm hnê ngăn tơnêi têa pơkâ kân tâ môi tiah kố. Péa tơdroăng mê xuân pơrá phá. Xua mê ôh tá chiâng tối mê cho kih niệm chương klêi mê ôh tá ai huy chương”.

A rôh hôp, pô Vương Đình Huệ Kăn xiam hnê ngăn Kuô̆k hô̆i pơkâ thế mơnhên ‘na khĕn kơdeăn, pakĭng mê môi tuăn ăm kơdroh iâ, bú khĕn kơdeăn ăm mâu ngế ai hnoăng kân tung rôh tơplâ tê”

“Tối tơdroăng tơdjâk tơ’nôm. Tâng pin vâ pro tiô pơkâ hdrối, ôh tá xê tâi tâng. Tâi tâng mê bu bối ƀă kỉ niệm chương. Bú ‘măn ăm to kơxô̆ cho veăng tơplâ. Ki mê tơtro ƀă tơdroăng tơrŭm ƀă tối mơgêi dêi khu kăn Đảng. ‘Na Khu xiâm kal kí tối tơchoâm cho ăm rế kơdroh nếo, ôh tá xê ôh tá chiâng tơ’nôm. Má péa, kô chiâng pơkâ ôh tá xê cho séa ngăn tai tâng mâu ngế séa ngăn môi hdroh. Ngế ki lâi hiăng ‘nâi nhên  pêi hdrối oh tá xê pin bú phá tâ môi hdroh, hâi tối troh xo ah hmôi ai ngế ki môi tiah mê, drêng mê ah pin séa ngăn nếo’’.

Xuân a rôh hôp má 7 dêi Vi ƀan pơkuâ cheăng Kuô̆k hô̆i, mâu kăn pơkâ thế tơ’nôm inâi “cheăm pêi cheăng tơ-ƀrê”, “bêng, pơlê kân pêi cheăng tơ-ƀrê”, cho tơtro ƀă troăng rơhlâ mơhnhôk tơ’noăng a pơlê cheăm ƀă mơngế ki pêi cheăng. ‘Na tơleăng mơnhên tơdroăng xôi tung tơdroăng, khĕn kơdeăn xuân châ mâu kăn tơpui tơno pâ mơnhên tơdroăng tơleăng mơnhên ƀă mâu ki ai xôi drêng hiăng ai khĕn kơdeăn lơ inâi tơ’noăng, nôkố mơnhên cho pro xôi.

VOV chêh

Gương tơplôu ƀă tơbleăng