Việt Nam ƀă Lếo ai tơdjuôm troăng tơkăng kong xŏn dâng 2.340 km xŏn hluâ 10 kong pơlê dêi Việt Nam ƀă 10 kong pơlê dêi Lếo. Péa pâ ai 8 tơpéa tíu tê mơdró ngi lâp plâi tơnêi, 7 tíu tê mơdró ngi kong têa dêi pó, 18 troăng prôk tơkăng kong ƀă kơpong cheăng kâ ki phá tơ-ê.

A roh tơpui tơno mâu Kăn lêng hơnăm ối nếo Mô đô̆i gâk tơkăng kong Việt Nam ƀă Kăn lêng ối nếo dêi Kơ koan xiâm gâk kring, Kan sát – Khu xiâm Kŏng an Lếo rơtế vêh mơnhên tơdroăng châ tơƀrê tơrŭm tơdroăng pêi cheăng tung pơla kố nah. Mơnhên hnoăng ki kal dêi khu Kăn lêng ối nếo tung tơbleăng, rak tơdroăng tơrŭm po rơdâ pêi pro hnoăng cheăng. Thươ̆ng ŭy Nguyễn Văn Quang, gum cheăng pơkuâ kuăn pơlê, Khu hnê mơhno, Ƀơrô Kal kí, Mô đô̆i gâk tơkăng kong kong pơlê Kon Tum, tối ăm ‘nâi:

‘’Châ veăng trâm mâ tơpui tơno cho roh vâ á ƀă khu Kăn lêng hơnăm ối nếo trâm mâ, tơpui tơno ƀă mơdêk tuăn ngôa rơkê, mơnhông tâ tơdroăng pơkuâ ƀă gâk kring tơkăng kong. Á hiăng xo vêh túa ki rơkê tơtro kal tơrŭm ƀă khu Kăn lêng ối nếo kong têa pú hmâ Lếo, ing mê teăm tơdrêng châ hlo mâu tơdroăng ki tăng pro troăng ‘mêi, troăng pêi pro, tơdroăng ki pêi cheăng dêi mâu khu ngế ‘mêi vâ teăm tơdrêng tơbleăng ăm khu râ kăn pơkuâ pơkâ mơ’no troăng pơkâ pêi, troăng hbrâ, mơât mâu ngế xôi’’.

Sap apoăng hơnăm 2023 troh nôkố, mâu Kăn lêng hơnăm ối nếo Mô đô̆i gâk tơkăng kong Việt Nam ƀă Kăn lêng ối nếo Kơ koan xiâm Gâk kring, Kan sát - Khu xiâm Kŏng an Lếo hiăng pro mơ-éa ăm 499 khu kăn ƀô̆ péa tơnêi têa prôk vêh pêi cheăng; tơrŭm măng tĭng séa ngăn 265 xôh ƀă rơpâu roh kăn ƀô̆, mâu lêng veăng; tơrŭm rup rơxế, pơxâu phâk lối 1.500 roh ƀă lối 2.400 ngế pro xôi ƀă hía hé.

Tiô Đăi tă Nguyễn Thanh Hải, Kăn phŏ Pơkuâ Kal kí Mô đô̆i Gâk tơkăng kong Việt Nam, khu Kăn lêng hơnăm ối nếo cho rơxông rak pêi cheăng dêi khu lêng péa tơnêi têa, mâu tơdroăng trâm mâ tơpui tơno ai kơnâ kal khât tung tơdroăng rak, tơbêng tơrŭm cheăng tiô khôi vâi krâ nah, rŭm môi tuăn ki má môi Việt Nam - Lếo:

“Trâm mâ tơpui tơno Kăn lêng ối nếo Mô đô̆i Gâk tơkăng kong Việt Nam, Kăn lêng ối nếo Kơ koan xiâm gâk kring, Kan sát Lếo hâi kố cho mơnhên inhên tơdroăng tơrŭm pơla Khu xiâm pơkuâ Mô đô̆i gâk tơkăng kong ƀă Kơ koan xiâm gâk kring, Kan sát Lếo. Mơhno tơdroăng tơmâng, loi tơngah kân dêi Khu râ kăn pơkuâ péa khu lêng ƀă rơxông ối nếo, pro tơ’lêi hlâu vâ rơxông ối nếo péa khu lêng trâm mâ, tơpui tơno, tối ăm dêi pó túa ki rơkê tơtro, tơdrêng amê vêh tơbâ tiô khôi vâi krâ nah, ó rơdêi, tá hiâm mơno, trâu hơngế dêi tơrŭm cheăng Việt Nam - Lếo’’.

Kăn pơkuâ péa pâ hiăng môi tuăn mâu tơdroăng xiâm ƀă mơnhên troăng prôk la ngiâ mâu hnoăng cheăng ki xiâm tung la ngiâ ƀă khu Kăn lêng ối nếo Mô đô̆i gâk tơkăng kong Việt Nam ƀă Kăn lêng  ối nếo Khu gâk kring, Kan sát Lếo. Tung mê, tơtrŏng thăm tơpui tơno tối tơdroăng ki tơdjâk, tơrŭm, rak pêi pro kơtăng, krá tơniăn Pơkâ ‘na Pơkâ pêi pơkuâ tơkăng kong ƀă tíu tê mơdró ngi lâp plâi tơnêi a tơnêi tơníu pơla Chin phuh tơnêi têa Kŏng hoa xah hô̆i chuh ngiah Việt Nam ƀă Chin phuh tơnêi têa Kŏng hoa Yân chuh Nhân yân Lếo; pơkuâ, séa ngăn tơdroăng lo, mot, prôk hluâ tơnêi têa dêi pó, mot rêh ối, prôk lăm dêi kuăn pơlê rêm tơnêi têa; tơrŭm hbrâ, mơdât châ tơƀrê mâu ngế xôi, mơjiâng tíu pêi cheăng gâk kring ƀă pro tơ’lêi hlâu má môi ăm kuăn pơlê ƀă mâu khu tê mơdró péa tơnêi têa prôk lăm a tíu tê mơdró ngi kong têa ê, tơkăng kong, tơrŭm mơnhông cheăng kâ, trâm mâ mơhno khôi túa lĕm, lăm pôu dêi nhŏng o.

Hdrối mê, khu râ kăn teăng mâ Kăn lêng hơnăm ối nếo péa pâ hiăng tơkŭm po mâu tơdroăng pêt loăng tơbâ; diâp hnoăng liăn hriâm ăm hok tro kơtiê tơkâ hluâ pá puât; pơtâng tối, hnê luât ăm kuăn pơlê péa pâ tơkăng kong ối tung kong pơlê Kon Tum (Việt Nam) ƀă kong pơlê Attapeau; tơkŭm trâm mâ mơhno khôi túa lĕm rơhdruê xuâng, tơ’noăng ivá, veăng ti tăng plĕng mâu tíu ôm hyô, khôi túa lĕm hdroâng kuăn ngo tung pơlê kong kơdrâm Kon Tum.