VOV4.Xơ Đăng - Pơla hdrối kố nah, kăn pơkuâ Đảng ƀă Tơnêi têa hiăng ai rôh trâm mâ khu kăn Kuô̆k hô̆i cho hdroâng kuăn ngo hneăng 15. Tơpui a rôh trâm mâ, pôa Vương Đình Huệ, kăn xiâm hnê ngăn Kuô̆k hô̆i tối, loi tơngah tiah kố, rêm ngế kăn Kuô̆k hô̆i hdroâng kuăn ngo ôh tá la lâi pơtê mơ-eăm vâ pêi klêi hnoăng cheăng dêi tơná, đi đo kơdo mơ-eăm, tơxâng ƀă tơdroăng ki loi nhuô̆m, tơngah dêi kuăn pơlê tung lâp tơnêi têa, malối cho hdroâng kuăn ngo, kuăn pơlê kơpong hdroâng Kuăn ngo ƀă peăng Kong ngo.

Pôa Vương Đình Huệ, Kăn xiâm hnê ngăn Kuô̆k hô̆i tối nhên, Đảng ƀă tơnêi têa đi đo tối tơrŭm môi tuăn dêi rơpó mâu hdroâng kuăn ngo ai pơxúa kân ƀă tơnêi têa pin, môi tơnêi têa môi tuăn dêi rơpó dêi 54 to hdroâng kuăn ngo nhŏng o rơtế rêh ối ƀă, rơtế dêi rơpó tung mơjiâng ƀă rak vế tơnêi têa plâ mâu hơnăm dêi hdroâng kuăn ngo ƀă đi đo môi tuăn tơdroăng mơjiâng luât pơkâ tơrŭm môi tuăn hdroâng kuăn ngo, ing tơdroăng pôi tá pơrah dêi rơpó, môi tuăn, nhoăm dêi rơpó ƀă tŏng kum dêi rơpó mơnhông mơdêk, mâu luât pơkâ ki tơdjâk troh Kuăn ngo, châ tối tung tâi tâng mâu hlá mơ-éa luât dêi Tơnêi têa Kŏng hòa xah hô̆i chuh ngiah Việt Nam.

Mâu hơnăm hdrối, hiăng ai hên troăng rơhlâ, luât pơkâ tŏng kum mơnhông mơdêk  cheăng kâ-rêh ối ƀă mâu kơpong hdroâng kuăn ngo ƀă kong ngo. 

Laga xua tíu ki pơxiâm gá ôh tá tơƀrê, tơnêi tíu pêi chiâk deăng ối xơpá, hơngế tíu xiâm, hơngế kơchơ, kong prâi tơ -ê xêh, đi đo tro kong prâi pơ’lêh, tơmeăm koăng hâi teăm ai. Mê nôkố, kơpong hdroâng kuăn ngo ƀă kong ngo xuân cho tíu ki hrá mơnhông tâ, kơlo pêi lo liăn riân rêm ngế dêi mâu kuăn ngo iâ tâ hên tâng vâ pơchông tơchoâm ƀă lâp tơnêi têa, hlo nhên hlối ki kơtăn rế hơngế.

Rơtâ tá hâi hôp trâm mâ

Ing tơdroăng mâu pơkâ dêi tíu xiâm tơnêi têa, hâi lơ 18/11/2019 Kuô̆k hô̆i hiăng pơkâ tơdroăng pơkâ kơxô̆ 88, kĭ pơkâ tơdroăng tơkêa bro tâi tâng mơnhông mơdêk cheăng kâ rêh ối kơpong hdroâng kuăn ngo ƀă kong ngo thế tơdâng tơ-‘mô, vâ pêi tơdroăng pơkâ mơnhông mơdêk krá tơniăn ƀă pơtối rak vế ki pơxúa, tơmeăm khoăng dêi kơpong ƀă ing tơdroăng mơ-eăm dêi kuăn pơlê hdroâng kuăn ngo’’ rơtế ƀă mâu pơkâ nhên, tơngah ƀă mơ-eăm khât păng ‘nâng.

Vâ ai tiô mâu pơkâ ƀă kal thế pêi pro tơdrêng nôkố, pôa Vương Đình Huệ, Kăn xiâm hnê ngăn Kuô̆k hô̆i pơkâ thế mâu kăn Kuô̆k hô̆i tối tơchoâm, malối cho Hô̆i đong  ngăn kuăn ngo ƀă mâu kăn cho mâu kuăn ngo hneăng má 15 mơhé pơkuâ lơ hlối pêi hnoăng cheăng a mâu khu kăn kal tơmâng, veăng ‘no hnoăng rơtế ƀă Kuô̆k hô̆i  tơkŭm séa ngăn, vâ kơ koan ai hnoăng pơkuâ ngăn ki tơdjâk pêi pro châ tơƀrê mâu tơdroăng pơcháu:

 ‘’Hbâ rơnáu, mơ-eăm pêi kơhnâ ƀă thâ rĕng tâ nếo tung hbrâ mơjiâng pơkâ séa ngăn, vâ kơ koan râ kơpêng tơkŭm pêi tro tiô tơdroăng pơkâ dêi Kuô̆k hô̆i, pơtối rak vế pêi pro tro tơdroăng ki mơ-eăm, hơ-ui kum dêi rơpó  pơla mâu hdroâng kuăn ngo, pơla mâu kong pơlê , pơla mâu tơring cheăm bêng, tơdroăng veăng pêi khât, pêi tơ-ƀrê dêi mâu khu mơdró ƀă mâu hdroâng kuăn ngo, mơdêk ki tơrŭm môi tuăn dêi rơpó. Khu kăn Kuô̆k hô̆i hdroâng kuăn ngo pơtối mơdêk tâ nếo ki hlê plĕng ‘na tơdroăng cheăng kuăn ngo ƀă mâu kăn ƀô̆, khu râ pơkuâ cheăng Đảng, mâu kăn, măt trâ̆n, khu grup  rêm râ tung tơdroăng cheăng kal kí.

Pêi pro tro luât pơkâ oh tá pơrah dêi rơpó, môi tuăn dêi rơpó, nhoăm pâ dêi rơpó, ‘nâi tŏng kum dêi rơpó vâ rơtế mơnhông mơdêk, vâ châ mơdât mâu tơdroăng hriăn pêi pro dêi khu ‘mêi, mâu ki hriăn vâ xo tơdroăng kuăn ngo, pro tơklâ ki tơrŭm môi tuăn dêi hdroâng kuăn ngo, tơkâ luâ tuăn tơmiât ki kơxiâp kơmêi dêi kuăn ngo’’.

Pôa Vương Đình Huệ, Kăn xiâm hnê ngăn Kuô̆k hô̆i tối tơbleăng a rôh trâm mâ

Pôa Vương Đình Huệ, Kăn xiâm hnê ngăn Kuô̆k hô̆i púi vâ mâu kăn Kuô̆k hôi cho kuăn ngo mơ-eăm tí tăng ‘nâi plĕng, tối ƀă pơ’lêh nếo mâu tơdroăng tơmiât, troăng rơhlâ, luât pơkâ ‘na kuăn ngo dêi Đảng ƀă Tơnêi têa pin chiâng mâu tơdroăng pơkâ, hnoăng cheăng pêi nhên; tơmâng luât pơkâ, luât tŏng kum rak tơniăn pêi tơƀrê mâu troăng rơhlâ luât pơkâ dêi Tơnêi têa a kong ngo, tíu tơkăng kong, kơpong hdroâng kuăn ngo.

Tơkŭm mơjiâng kơpong hdroâng kuăn ngo ƀă kong ngo mơnhông mơdêk rĕng ‘na cheăng kâ, mơhno túa lĕm tro, rêh ối pơlê pơla, krá rơdêi ‘na kring tơniăn, ‘na cheăng lêng, tơrŭm tơrôa ƀă mơnhông mơdêk tơchoâm dêi lâp tơnêi têa, tơxâng ƀă tíu ối hnoăng cheăng pêi ki kal dêi tơnêi têa.

Kăn xiâm hnê ngăn Kuô̆k hô̆i pơkâ thế mâu kăn Kuô̆k hô̆i cho mâu hdroâng kuăn ngo tơkŭm tí tăng ‘nâi plĕng mơjiâng, ‘mâi rơnêu, tơ’nôm mâu luât pơkâ tŏng kum ki tơ-tro nôkố ƀă pơkâ thế mơdêk ‘no liăn cheăng, kum pêi ahdrối mơnhông kơpong hdroâng kuăn ngo ƀă kong ngo, tíu tơkăng kong, malối tơmâng khât luât pơkâ mơnhông pêi chiâk deăng, mơnhông tơdroăng rêh ối, mơdêk hnê hriâm, ‘na pơkeăng pơlât, mơdêk hlê plĕng, mơngế pêi cheăng rế rơkê, mơnhông tơƀrê tơdroăng cheăng kăn ƀô̆ cheăm bêng, mâu kăn ƀô̆ hdroâng kuăn ngo; luât pơkâ hnê cheăng pêi, tăng cheăng pêi, tơniăn ‘na tơdroăng rêh ối pơlê pơla, mơnhông krá tơniăn; rơtế mơnhông cheăng kâ ƀă rak vế hyôh kong prâi nhâ loăng kuăn kiâ; mơnhông cheăng kâ-rêh ối ƀă pro tơniăn ‘na cheăng lêng; mơjiâng thôn pơlê nếo; pro xiâm tơmeăm tung mơnhông cheăng ƀă kơmăi kơmok tiô túa nếo nôkố, rak vế ƀă pơtối rak khôi túa, vêa vong tiô khôi hmâ ton nah ki lĕm tro tung kuăn pơlê mâu hdroâng mơngế Việt Nam.

VOV1

Gương tơplôu tơbleăng