VOV4.Xơ Đăng - Hơnăm hriâm nếo hiăng pơxiâm troh. Tơdroăng ki pêi pro troăng hơlâ tŏng kum mâu kuăn muăn hdroâng kuăn ngo đi đo châ Kuô̆k hô̆i tơmâng ngăn khât. Achê kố, pôa Vương Đình Huệ, Kăn xiâm hnê ngăn Kuô̆k hô̆i hiăng veăng a leh hiăng pro klêi Hngêi trung râ má pái phôh thong Kỳ Sơn, Nghệ An ƀă veăng a leh pơxiâm mot hơnăm hriâm nếo 2022 – 2023.

Kăn xiâm hnê ngăn Kuô̆k hô̆i tối nhên, tŏng kum, hnê hriâm tro ăm mâu vâi o cho tơdroăng ki kal má môi, cho tơdroăng ki vâ tơmiât tơdroăng tung la ngiâ, kum kuăn mơngế hluăn ing kơtiê vâ ai tơdroăng rêh ối phâi tơtô, hơniâp ro.

Kỳ Sơn cho tơring tơkăng kong,  kong ngo, hdroâng kuăn ngo dêi 1/74 tơring ki kơtiê xơpá má môi tung lâp tơnêi têa. Hngêi trung râ má pái phôh thong Kỳ Sơn châ mơjiâng pro a hơnăm 1967 cho hngêi trung râ má pái  dêi rơring Kỳ Sơn  ƀă ai lối 95% ngế cho kuăn ‘nĕng hdroâng kuăn ngo lo ing 21 to cheăm, pơlê kân tung tơring. Troăng sap ing hngêi vâ troh a hngêi trung dêi mâu vâi o thế prôk tơkâ luâ kong, tơkâ luâ têa krông rơ-iô păng ‘nâng, malối a rơnó mêi drêng troh kong mêi khía mơhot kât, hmâ pro têa lân lu tơnêi tơhnâp đi đo.

Hdrối vâ mơjiâng hngêi trung nếo, hngêi trung ƀă mâu kơƀăng tăng tơmeăm xúa tung hriâm dêi hngêi trung hiăng  tơ’nhiê tơ’nhĕng, ôh tá ai  hngêi ăm hok tro ƀă thái kô vâ kâ ối pơtê, tâi tâng hok tro thế tăng xêh tíu kâ ối, pơtê, tá tơdroăng vâ rêh ối vâ  hriâm tâp. Hngêi trung râ má pái Kỳ Sơn châ mơjiâng nếo ƀă pro tiô túa nếo, tro tiô khoa hok, châ mơnhên tối tro râ tơnêi têa xâu ăm 2 rơpâu ngế hok tro hriâm ƀă tâi tâng ai 245 veăng hriâm.

Pôa Vương Đình Huệ, Kăn xiâm hnê ngăn Kuô̆k hô̆i veăng leh mot hơnăm hriâm nếo a Nghệ An

Tơbleăng a hâi leh, pôa Vương Đình Huệ, Kăn xiâm hnê ngăn Kuô̆k hô̆i tơbâ nếo tuăn tơchĕng tơmiât dêi Hồ Chí Minh, Kăn xiâm hnê ngăn tơnêi têa hneăng hdrối tối ‘na hriâm ƀă hnê hriâm, hlối tối, Đảng ƀă tơnêi têa pin đi đo nhoăm tơdroăng hnê hriâm, ngăn mê cho luât pơkâ pêi a hdrối; đi đo ‘măn ăm mâu tơdroăng ki lĕm má môi vâ tơmâng khât tơdroăng hriâm tâp, rak tơniăn ăm tâi tâng mâu vâi o hok tro, mơhé alâi mơngế ối a tơbăng lơ kong ngo, lơ tíu tơkăng kong, lơ chuăn rơlố, ngế ki lâi xuân thế châ hriâm tơdâng tơ’mô, ôh tá pơrah ngế ki lâi.

“Mơnhông tơ-brê hnê hriâm ƀă hnê mơjiâng tuăn ngôa rơkê, tơniăn tơdâng tơ’mô tung hnê hriâm, vâ pôi ta ai lôi ngế ki lâi pá rong, malối cho kuăn pơlê hdroâng kuăn ngo kơpong hdroâng kuăn ngo, kơpong kơtiê xơpá, mâu kuăn ngo thăm rế châ tơmâng khât, kơjo kum vâ kơdroh xơpá, choâ ‘lâng mơnhông cheăng kâ ƀă vâ teăm kơpong tơbăng cho troăng rơhlâ hnê mơhno ki kăn ƀă plâ hơnăm dêi Đảng, Tơnêi têa pin.

Khu kăn Xiâm Đảng hiăng Pơkâ kơxô̆ 29 ‘na pơ’lêh nếo tâi tâng tơdroăng hnê hriâm ƀă hnê mơjiâng tuăn ngôa rơkê, Kuô̆k hô̆i hiăng tơkŭm pơ’lêh troăng rơhlâ dêi Đảng, pê klêi ƀă pơkâ hê troăng rơhlâ, luât vâ mơnhông hnê hriâm, malối cho Pơkâ 88 ‘na pơ’lêh ƀă tơdroăng, hlá mơ-éa hriâm phôh thong. Tơmâng khât hnê hriâm tơniăn ăm mâu vâi o  cho tơdroăng ki kal má môi, cho khuă ki vâ pêi pro tung la ngiâ, kum kuăn mơngế hluăn ing kơtiê xơpá, hrâ mơnguâ, ôh tá hlê plĕng ki klâi, vâ ai tơdroăng rêh ối phâi tơ tô, tơniăn, hơniâp ro’’.

Pôa Vương Đình Huệ, Kăn xiâm hnê ngăn Kuô̆k hô̆i tôu hơkâ pơxiâm leh mot hơnăm hriâm nếo

Xua mê, pôa Vương Đình Huệ, Kăn xiâm hnê ngăn Kuô̆k hô̆i tối púi vâ, mâu thái cô kô cho ngế djâ troăng a hdrối bâ eăng lĕm ‘na hiâm mơno, tơpui tơno mơhno túa lĕm tro, tuăn vâ, hnoăng cheăng pêi ƀă tơdroăng cheăng dêi tơná, pêi tâi ivá môn hâk vâ, hnê khât tá hiâm mơno; ôh tá xê to hnê ăm hlê mê ối cho ngế ki hnê pơtroh tơdroăng hâk vâ, mơhnhôk vâ mâu vâi o vâ hriâm, tí tăng ‘nâi plĕng tơdroăng ki nếo dêi tơdroăng tơná ‘nâi ƀă ‘na khoa hok.

Pôa Vương Đình Huệ, Kăn xiâm hnê ngăn Kuô̆k hô̆i  tơngah ƀă loi khât mâu vâi o hok tro kô pơtối rak vế tơdroăng vâ hriâm, hriâm rơkê dêi kuăn pơlê plê xiâm Nghệ An, mơ-eăm hriâm kơhnâ, tơdrăng, mơ-eăm hriâm khât; hriâm ki hdrối ăm tơná pin vâ ‘nâi, vâ pêi, vâ rêh ối tơdjuôm, vâ ‘nâi pơkâ xêh; hriâm vâ hbrâ ăm tơná pơxuá ăm xo ah hmôi drêng vâ pêi cheăng ai hnoăng veăng ‘no kum dêi pơlê, tơnêi têa.

Kăn xiâm hnê ngăn Kuô̆k hô̆i pơkâ thế, mâu kăn ƀă kơvâ ngăn hnê hriâm tơmâng khât hnê mơhno mơjiâng mơhno túa lĕm tro ‘na hriâm tung hngêi trung, vâ rêm hngêi trung ôh tá xê to ai to tơdroăng hnê rơkê tro, thái tro thái, hok tro tro hok tro, hngêi trung tro hngêi trung, lâm hriâm tro lâm hriâm mê ối cho tíu ki  lĕm, tơdroăng hmâ pêi pro ton nah, túa lĕm tro dêi kong pơlê, dêi hdroâng kuăn ngo châ hnê mơhno, tơdjuôm, mơnhông mơdêk hiâm mơno lĕm tuăn pâ dêi rơpó, tơchĕng tơmiât, hlê plĕng dêi rêm ngế hok tro, tá hngêi trung.

Hngêi trung râ má pái phôh thong Kỳ Sơn thế cho túa ki mơhno lĕm tro dêi kong pơlê tung tơdroăng mơjiâng túa lĕm tro a hngêi trung rơté pơ’lêh nếo, mơdêk ki tơ-brê hnê ƀă hriâm. Pakĭng mê, tơkŭm mơjiâng ƀă tơbleăng mơnúa pêi pro tuá dêi hngêi trung phôh thong hnê kuăn ngo ai tíu kâ koi ối pơtê  kơhâi dế túa ki nếo rơtế ƀă tơdroăng mơjiâng ki pơxúa mơhno túa lĕm tro a hngêi trung  mơhno ki lĕm tơviah krê dêi kơpong kong ngo Kỳ Sơn.

Kăn xiâm hnê ngăn tơnêi têa ăm ‘nâi hơnăm hriâm 2022-2023 cho hơnăm hriâm ki apoăng tơbleăng Pơkâ 88 pơ’lêh nếo tơdroăng hriâm, Hlá mơ-éa hnê hriâm, tơdroăng hnê hriâm ƀă tơdroăng tí tăng ngăn mơnúa ngăn vâ tối ăm ‘nâi tiô Tơdroăng pơkâ hnê hriâm phôh thong hơnăm 2018 ƀă lâp 10. Vi ƀan pơkuâ cheăng Kuô̆k hô̆i kô tơkŭm séa ngăn ‘na pêi pro pơ’lêh nếo tơdroăng hnê, hlá mơ-éa hriâm phôh thong tung hơnăm 2023 vâ teăm séa ngăn, tah ki xơpá tơvâ tơvân, tơniăn mâu pơkâ dêi Đảng Kuô̆k hô̆i pơkâ châ pêi tŭm, hlối tơ-brê.

VOV1

Gương tơplôu ƀă tơbleăng