Kơxê lơ 14/11, pôa Vương Đình Huệ, kăn xiâm hnê ngăn Kuô̆k hô̆i hiăng trâm mâu kăn Kuô̆k hô̆i cho mơngế hdroâng kuăn ngo, mâu ƀok xối, jâ chĭng, mâu thái cô. Kuô̆k hô̆i hneăng 15 ai 499 ngế kăn. Tung mê, ai 89 ngế kăn Kuô̆k hô̆i cho hdroâng kuăn ngo, ai 5 ngế ƀok xối jâ chĭng; 119 ngế thái cô ƀă cho mâu thái cô hneăng hdrối. Tơpui a rôh trâm mâ, pôa Vương Đình Huệ, kăn xiâm hnê ngăn Kuô̆k hô̆i tối tiah kố, rôh trâm mâ kố cho tơdroăng cheăng ki ai pơxúa, mơhno tơdroăng tơrŭm pơla mâu hdroâng kuăn, mơhno ăm tơdroăng ki môi tuăn ƀă pêi pro, hiâm mơno pôu râng dêi Kuô̆k hô̆i.

Kăn xiâm hnê ngăn Kuô̆k hô̆i pơkâ thế mâu kăn Kuô̆k hô̆i cho mơngế hdroâng kuăn ngo, mơngế ki rơkê, khu ki rơkê plĕng, ƀok xối, jâ chĭng ƀă mâu thái cô kơhnâ veăng tung mơjiâng, pêi klêi luât xuân môi tiah pâ thế, séa ngăn tơdroăng pêi pro tiô troăng hơlâ luât ‘na hnoăng cheăng hdroâng kuăn ngo, tơdroăng loi tĭng, tiô khôp, mơnhông hnê hriâm – hnê cheăng pêi, khoa hok – kong ngê̆ vâ mơjiâng kơpong hdroâng kuăn ngo ƀă peăng kong ngo châ mơnhông.