VOV4.Xơ Đăng - Kơxê lơ 12/8,a Hngêi Kuô̆k hô̆i po rôh tơpui tơno tí tăng ‘nâi mâu rơkong tơpui tối dêi khu ki rơkê plĕng ‘na Kơxop hlá mơéa Luât khăm pơlât, ki ‘mâi rơnêu xua Viê̆n hriăn ngăn Luât ƀă Vi ƀan Pơlê pơla dêi Kuô̆k hô̆i pơkuâ po. Pôa Vương Đình Huệ, kăn xiâm hnê ngăn Kuô̆k hô̆i veăng hôp a rôh hôp. Tơpui a rôh hôp, pôa Vương Đình Huệ, kăn xiâm hnê ngăn Kuô̆k hô̆i tối nhên, Luât khăm pơlât ki ‘mâi rơnêu cho môi tơdroăng tơkêa luât ki kal khât. Kố xuân cho môi tơdroăng tơkêa luât ki xơpá, malối cho tung tơdroăng nôkố, klêi kơ’nâi tro tơdjâk ó xua pơreăng Covid-19. A rôh hôp tơpui tơno, mâu khu ki rơkê plĕng, khu ki hriăn ‘na khoa hok, hiăng tơpui tơno veăng tơpui tối ‘na pêi pro klêi mâu tơdroăng pơkâ ‘na yă khăm pơlât; hơl’êh mâu tơdroăng khăm pơlât; tơrŭm cheăng tơdjuôm tung khăm pơlât ƀă mâu tơdroăng kal ki ê dêi kơxop hlá mơéa Luât khăm pơlât ki ‘mâi rơnêu; mâu kơxô̆ liăn ‘no cheăng ăm khăm pơlât [w tơdroăng ki pơhlêh. Mâu kăn tối tiah kố, troăng hơlâ luât khăm pơlât kal tá lĭ luăn ƀă tơdroăng ki ai khât, rak vế mâu liăn ngân kal tơbleăng tơdrăng, rak vế tơdroăng ki hơniâp ro dêi kuăn pơlê, kố cho tơdroăng ki kal má môi tung inâi tŏng kum rêh ối pơlê pơla.

Katarina Nga tơplôu ƀă tơbleăng