VOV4.Xơ Đăng - Pôa Đỗ Văn Chiến, Kăn xiâm hnê ngăn Vi ƀan Măt trâ̆n Tơnêi têa Việt Nam rơtế ƀă khu kăn ki pêi dêi hnoăng cheăng nếo troh pôu, hbru tơmeăm ăm mơngế Khmer ki rơkê, kơhnâ a pơlê kong kân Cần Thơ drêng troh Têt Chôl Chnăm Thmây hơnăm 2022. Teăng mâ kăn pơkuâ Đảng, Tơnêi têa, pôa Đỗ Văn Chiến rơkâu Têt Chôl Chnăm Thmây kơ ƀok phop Đào Như, kăn phŏ hnê ngăn Hô̆i đong trị sự Tơnêi têa Giáo hội Phật giáo Việt Nam; Viê̆n trưởng Học viện Phật giáo Nam tông Khmer; Kăn pơkuâ tơdroăng khôp Việt Nam pơlê kong kân Cần Thơ, rơtế ƀă mâu ƀok Phop, mâu ngế ki pơkuâ, mâu ngế ki hriâm vâ pro ƀok Phop ƀă vâi krâ nhŏng o hdroâng kuăn ngo Khmer tơdah Têt khôi hmâ Chôl Chnăm Thmây phâi tơtô, hơniâp ro, ƀă pêi pro châ hên mâu tơdroăng ki tơƀrê tung la ngiâ.

Pôa Đỗ Văn Chiến hbru tơmeăm ăm mâu ƀok phop, Achar drêng troh têt Chôl Chnăm Thmây

Pôa Đỗ Văn Chiến rơhêng vâ, mâu ƀok phop, mâu khu ki pơkuâ tơdroăng khôp Phop, mâu ngế ki hriâm vâ pro ƀok phop rơtế ƀă vâi krâ nhŏng o hdroâng kuăn ngo Khmer pơtối mơhnhôk vâi kuăn muăn mơ-eăm hriâm tâp, maluâ trâm hên xơpá xuân pôi tá lo pơtê hriâm. Tơdrêng amê hlối rơhêng vâ vâi krâ nhŏng o pơtối mơdêk hiâm mơno tơrŭm, tơdjuôm ivá pêi pro tro mâu troăng hơlâ dêi Đảng, luât dêi Tơnêi têa, veăng kum mơjiâng pơlê cheăm rế hía rế mơnhông.

Katarina Nga tơplôu ƀă tơbleăng