VOV4.Xơ Đăng - Kơxo lơ 8/3, Khu kăn ki pêi dêi hnoăng cheăng dêi Hô̆i đong hdroâng kuăn ngo dêi Kuô̆k hô̆i xua jâ Cao Thanh Xuân, kăn phŏ hnê ngăn Hô̆i đong hdroâng kuăn ngo pro kăn pơkuâ khu kăn kố hiăng ai rôh pêi cheăng ƀă Vi ƀan hnê ngăn kong pơlê Dak Lak vâ mơnhên tối ki tơdjâk ‘na xing xoăng kơpong hdroâng kuăn ngo tiô tơdroăng mơnhông ki nếo achê kố troh tơdroăng ki pêi pro troăng hơlâ tŏng kum hdroâng kuăn ngo a kong pơlê Dak Lak.

Tiô pơkâ ki nếo, tung hneăng hơnăm 2021 – 2025, kong pơlê Dak Lak ai 54 to cheăm kơpong III, 5 to cheăm kơpong II, 71 to cheăm ối tung kơpong I, 519 to thôn ki malối xơpá ối tung kơpong hdroâng kuăn ngo ƀă peăng kong ngo. Tiah mê, lâp kong pơlê ai 54 to cheăm ôh tá ối tung kơpong hdroâng kuăn ngo, 4 to cheăm hluăn ing rơpŏng malối xơpá ƀă 143 to thôn, pơlê ki malối xơpá ôh tá ối tung rơpŏng malối xơpá xếo.

Jâ Cao Thanh Xuân, kăn phŏ hnê ngăn Hô̆i đong Hdroâng kuăn ngo tơpui a rôh pêi cheăng

Mâu tơdroăng tŏng kum rêh ối pơlê pơla dế pêi pro a mâu cheăm, thôn ki nếo tối mê âi kô ôh tá châ pơtối pêi pro. A rôh pêi cheăng, mâu kăn hiăng tơpui ‘na klêi kơ’nâi pêi pro troăng hơlâ tŏng kum rêh ối pơlê a mâu cheăm, thôn ki malối xơpá kơpong hdroâng kuăn ngo ƀă peăng kong ngo, hneăng hơnăm 2016 -2022; mơnhên tối ki tơdjâk dêi tơdroăng pơkâ nếo drêng tơbleăng a kong pơlê.

Ing mê, pơkâ thế Hô̆i đong hdroâng kuăn ngo pâ thế Kuô̆k hô̆i kĭ pơkâ troăng hơlâ ‘no liăn tŏng kum ƀă mâu cheăm, thôn, pơlê hluăn ing cheăm, thôn, pơlê kơptiê tung hneăng hơnăm 2021 – 2025 ki cheăng kâ rêh ối pơlê pơla ối trâm hên xơpá; ăm phêp pơtối pêi pro mâu tơdroăng pơkâ, troăng hơlâ tŏmng kum vâ rak tơniăn tŏng kum rêh ối pơlê pơla.

Katarina Nga tơplôu ƀă tơbleăng