VOV4.Xơ Đăng - Măng tĭng hdrối, Khu kăn cheăng dêi Khu kăn Kuô̆k hô̆i kong pơlê Dak Lak hiăng lăm séa ngăn a Tíu séa ngăn kế tơmeăm khoăng tung têa, a tơnêi ƀă hyôh kong prâi ‘na tơdroăng pêi pro troăng, luât ‘na pêi pro kơdĭng, mơdât mơhrê liăn tê kơtê. A rôh pêi cheăng, Khu kăn hiăng pơkâ thế Khu kố pêi pro nhên mâu tơdroăng ki kal, tung mê ai tơdroăng ki pro tơnêi to kơnâ yă a kong pơlê tung pơla hdrối kố nah, pro chiâng tơdjâk ton xŏn. Tơdroăng Kuô̆k hô̆i ƀă kuăn pơlê, hâi kố ai tối ‘na tơdroăng mê.

Hlo tơdroăng yă tơnêi kơdrâ to kơnâ, pro tơnêi chiâng kơnâ tung pơla hdrối kô nah a mâu kơpong hbrâ tơbleăng pêi mâu tơdroăng tơkêa bro ki kân a pơlê kong kơdrâm Buôn Ma Thuột ƀă mâu tơring ki achê    pro ăm kuăn pơlê ôh tá hmiên tuăn pêi chiâk, pêi deăng. Malối, hên kuăn pơlê hdroâng kuăn ngo chiâng tê dêi tơnêi pêi chiâk. Khu lăm séa ngăn tô tuăn ‘na tơdroăng mê tăng troăng rơhlâ ki tơniăn ƀă rak ngăn  tơ-ƀrê ‘na tơnêi tơníu. Jâ Nguyễn Thị Xuân, kăn hnê ngăn Kuô̆k hô̆i kong pơlê Dak Lak tối:  “Mâu hơnăm hdrối kong pơlê hmiên tuăn mơ-eăm hnê mơhno tơdroăng ăm tơnêi ối, tơnêi pê kâ ăm mâu hdroâng kuăn ngo. Laga, ing vâi pro yă tơnêi to kơnâ  nôkố  mê kơ’nâi péa pái hơnăm nếo, kô pro chiâng ai tơdroăng kuăn pơlê chiâng ôh tá ai tơnêi ối, tơnêi pê kâ. Drêng mê pin xo tơnêi ulâi vâ ăm kuăn pơlê?

Tiô pôa Trần Đình Nhuận, Ngế xiâm phŏ pơkuâ ngăn Tơmeăm khoăng ƀă hyôh kong prâi Dak Lak, riên 3 khế apoăng hơnăm 2022, tơdroăng tê mơdró tơnêi a tung kong pơlê kơdrâ tâk ƀă 103 rơpâu hdroh, tâk vâ chê 200% tâng vâ pơchông ƀă hơnăm nah. Yă tơnêi xuân to kơnâ ƀă sap khế môi chât troh khế môi chât péa hơnăm 2021. Ai tơdroăng pơ’lêh kân ‘na mơngế ƀă tơdroăng kal vâ, kuăn pơlê ing pơlê kong kân Hồ Chí Minh, Hà Nội troh a kơpong kĭng Buôn Ma Thuột tơkŭm rôe tơnêi vâ pro hngêi ối. Pôa Nhuận xuân tối mâu tơdroăng lot ôh tá rơkê plĕng tung tơdroăng pơkuâ rak ngăn tơnêi tơníu, malối cho tơdroăng ăm phêp pơ’lêh xúa tơnêi xúa tâi tâng mâu  kơpong ôh tá tơniăn ‘na mơjiâng hngêi trăng tơmeăm khoăng, ăm mâu ngế ki ôh tá kal vâ pro hngêi ối. Pakĭng mê nếo, luât ‘na tơnêi tơníu ối tơvâ tơvân, tơdroăng pơ’lêh xúa tơnêi ăm kuăn pơlê pro hngêi ối ôh tá pơkâ hơnăm, kơlo, ô tá pơkâ tơdroăng ki klâi, ƀăng  chêh yă tơnêi dêi tơnêi têa  pơkâ ôh tá tro tiô yă ki vâi tê a ngâ.

Khu kăn Kuô̆k hô̆i kong pơlê Dak Lak pêi cheăng ƀă Khu xiâm ngăn Tơmeăm khoăng ƀă Hyôh kong prâi Dak Lak

Tơdroăng vâi pro to yă tơnêi hiăng pro tơdjâk troh 4 tơdroăng ki xiâm, mê: xơpá tung tơdroăng rak ngăn pơkâ, gu tơbăng xĕn tơnêi, liăn chêl thiăn, xăm phoăng xăm tơkêng, kơdrâ tâk, chiâng lup liăn ngân tơnêi têa drêng tê tơnêi. Môi khu ki hên tung hdroâng kuăn ngo hlo yă tơnêi to kơnâ mê vâi tê dêi tơnêi xo liăn ki mê xúa ôh tá hlo ki klâi, hía tơnêi pêi chiâk, chiâng oh tá ai tơdroăng cheăng pêi ƀă hên ki ê. Hlo ti mê, Khu xiâm ngăn tơmeăm khoăng - Hyôh kong prâi hiăng ai hlá mơ-éa  tí tăng ‘nâi plĕng ăm Vi ƀan  kong pơlê hnê mơhno ăm mâu tơring séa ngăn nhên khât tơdroăng pơ’lêh xúa tơnêi.  Pôa Trần Đình Nhuận tối: “Ngin tí tăng ‘nâi plĕng hên hlá mơ-éa vâ ’mâi rơnêu, hnê mơhno ăm mâu tơring séa ngăn nhên tơdroăng pơ’lêh xúa tơnêi, bú ăm pơ’lêh xúa tơnêi ƀă tơnêi pêi chiâk ki tung kơpong kuăn pơlê ối hiăng ai troăng prôk ƀă ăm mơngế ki kal xêh khât ‘nâng.  ‘Na tung kơpong achê tíu pơkâ hdró pro kơphô̆ ki nếo, thôn pơlê nếo thế pêi pro tiô tơdroăng tơkêa  châ kĭ ƀă tiô pơkâ dêi Luât'’.

Ngế xiâm pơkuâ ngăn tơmeăm khoăng - Hyôh kong prâi kong pơlê Dak Lak xuân tối nhên ai 6 tơdroăng ki xiâm chiâng pro to yă tơnêi mê cho: Tơdjâk pơkâ xúa tơnêi pơla hơnăm 2021-2030, tơdjâk ing mâu tơdroăng tơkêa pro ki xiâm châ tơnêi têa ‘no liăn mơjiâng tơmeăm khoăng, tơdjâk mơnhông mơdêk pơkâ kơphô̆, tơdjâk dêi pơreăng Covid-19, liăn oh tá kơnâ, tơdroăng tơplâ ƀă tuăn tơmiêt dêi hên ngế. Pakĭng mê, khu ‘no liăn mơjiâng tơmeăm khoăng tơmâng troh chih xô̆ ‘na hyôh kong prâi lem dêi kong pơlê vâ mơjiâng mâu hngêi kân lê̆m vâ pơtê ối.

Tung pơla hdrối kô nah, Vi ƀan kong pơlê Dak Lak xuân hiăng ai hên hlá mơ-éa hnê mơhno, tá pơcháu ăm kơ koan kŏng an mơnhên mâu ngế ki tí tăng tối pro yă to kơnâ tiah mê vâ tăng pro pơxúa xêh.  Hnê mơhno dêi Vi ƀan tơring, pơlê kong kơdrâm séa ngăn nhên tơdroăng pơ’lêh xúa tơnêi. Pơtối pâ thế ‘mâi rơnêu kơlo ki klâ tơnêi pêi chiâk tiô troăng rơhlâ a pơlê kong kơdrâm mê 1.000m2 tơngi klêng, tơring kố 2.000m2 tơngi klêng. Tơdrêng amê, pơcháu ăm mâu tíu pêi cheăng kơvâ cheăng ki tơdjâk troh tí tăng ‘nâi plĕng vâ yă tơnêi ki tơnêi têa pơkâ achê ƀă yă tê, kuăn pơlê rôe tơnêi thế tro tiô yăn ki ai pơkâ khât.

Khu kăn Kuô̆k hô̆i  kong pơlê Dak Lak pơkâ thế, Khu xiâm ngăn tơmeăm khoăng ƀă Hyôh kong prâi kong pơlê Dak Lak mơdêk hnê tối, tơbleăng luât vâ pêi tơdroăng kơdĭng liăn, pôi tá mơ’nhiê liăn hmâng vâ  pêi cheăng thế tơbrê. Pakĭng mê, tơmâng khât tơdroăng rak ngăn liăn ngân tơnêi têa, xiâm mơngế pêi cheăng, tơmeăm khoăng thế tro tiô pơkâ; tơniăn tí tăng, xúa mâu tơmeăm khoăng ‘na tơnêi, tơmeăm tung kơdâm tơnêi, xiâm têa ai tơ-brê, krá tơniăn ton./.

Gương tơplôu ƀă tơbleăng