VOV4.Xơ Đăng - Kơxê lơ 22/2, a Hà Nội, Khu ngăn Kăn sat rak ngăn hlá mơ-éa ‘na tơniăn tung pơlê pơla, Khu xiâm ngăn Kŏng an tơkŭm po hôp tơbleăng hbru ăm tài khoản inâi điê̆n tưh ăm kuăn pơlê ing hnoăng cheăng hbru căn cước kuăn pơlê. Tiô tối hdrối mơ’nui khế 2 kố Khu xiâm ngăn Kŏng an kô hbru ăm inâi điê̆n tưh ăm kuăn pơlê vâ pêi pro mâu hlá mơ-éa ing măng.

Tài khoản inâi điê̆n tưh cho tơkŭm tâi inâi đăng nhập, mật khẩu lơ tơdroăng ki mơnhên mâu tơdroăng ki ê châ pro ing troăng pơkâ inâi ƀă mơnhên điê̆n tưh dêi Khu xiâm ngăn Kŏng an. Tài khoản kố châ rak ngăn ƀă mơnhên troh kơ koan Kŏng an pơlê krâm, tơring, kong pơlê, pơlê kong kâ pro hlá mơ-éa hbru pơ’lêh, vêh hbru ki nếo căn cước kuăn pơlê krâ chip mê chiâng vâ chêh inâi hbru ăm tài khoản inâi điê̆n tưh.

Rêm ngế kuăn pơlê pơrá chiâng chêh inai tài khoản inâi điê̆n tưh tâng ai tơdroăng ki kal vâ xúa. Malối, tơdroăng ki rak vế tơdroăng kal dêi kuăn pơlê, ôh tá chiâng hêak pơloi, kal athế tơdrăng hơpâ môi to xua mâu tơdroăng hiăng châ mơnhên sap ing Tíu ki ‘măn rak hlá mơ-éa tơnêi têa ‘na kuăn pơlê rêh ối cho hlá mơ-éa xiâm châ Chin phuh pơcháu ăm Khu xiâm ngăn Kŏng an rak ngăn.

Katarina Nga tơplôu ƀă tơbleăng