VOV4.Xơ Đăng - Kơxo lơ 7/10, Khu xiâm pơkuâ kăn ƀô̆ tơkŭm po Hneăng hôp pêi cheăng pơkuâ tơnêi têa ‘na khu, kơxô̆ liăn tŏng kum pơlê pơla, kơxô̆ liăn tŏng kum mơngế pá puât. Troh nôkố, lâp tơnêi têa ai lối 93 rơpâu khu ngế, vâ chê 30 rơpâu khu kơxô̆ liăn kơdĭng. Hên khu, kơxô̆ liăn kơdĭng hiăng veăng kum hên tung mâu tơdroăng pơlê pơla, tŏng kum mơngế pá puât. Ki rơhêng vâ tối, tung tơdroăng hbrâ, mơdât pơreăng kân COVID-19 hiăng mơhnhôk châ hên kơxô̆ liăn, tơmeăm ki kal xúa rêm hâi, kum kuăn pơlê kơpong pơreăng xuân môi tiah veăng tơlo kơxô̆ liăn rôe vaccine hbrâ mơdât pơreăng COVID-19 dêi Chin phuh.

Khu xiâm pơkuâ kăn ƀô̆ po Hneăng hôp pơkuâ tơnêi têa ‘na kơxô̆ liăn tŏng kum pơlê pơla, kum mơngế pá puât

Tung hơnăm 2021, tâi tâng kơxô̆ liăn xo hnoăng mâu kơxô̆ liăn kơdĭng cho lối 3 rơpâu 468 rơtal liăn, ƀă hiăng mơ’no liăn tŏng kum lối 2 rơpâu 425 rơtal liăn. Laga, tơdroăng pêi dêi hên khu pơkuâ kơxô̆ liăn kơdĭng ối pêi mơhno a ngâ; ki ê cho hên to vâ kâ, ai khu ôh tá môi tuăn tung khu, chiâng ai tơdroăng tơxup tơbriât, săm tối săm tơkêng ton xŏn; hên kơxô̆ liăn kơdĭng tá hâi tơniăn tơbleăng tơdrăng ‘na liăn ngân tung tơdroăng mơhnhôk tơdah tŏng kum.

VOV/Tơplôu: A Sa Ly