VOV4.Xơ Đăng - Hâi lơ 16/3, Rôh hôp kơ-êng ki apoăng dêi Vi ƀan pơkuâ Kuô̆k hô̆i hneăng má 15 pơxiâm ƀă tơdroăng ki xiâm kơ-êng pôa Nguyễn Hồng Diên, ngế xiâm ngăn cheăng kơmăi kơmok ƀă tê mơdró tâ tá mâu tơdroăng ki rak ngăn tê têa châu têa kơxăng, môi túa kế tơmeăm ki kal pơkâ troh tơdroăng ki mơjiâng pro cheăng kâ tối tơdjuôm. Pôa Nguyễn Hồng Diên ăm ‘nâi: lâp tơnêi ai 17 rơpâu tíu ki tê têa châu têa kơxăng, khu ki ai tơdjâk troh hiăng lăm séa ngăn a 16.800 tíu tê, hiăng pơxâu phak, châ hlo 211 to tíu tê hiăng pơtê tê.

Pôa Nguyễn Hồng Diên, ngế xiâm ngăn cheăng kơmăi kơmok ƀă tê mơdró

‘Na xiâm kối, ki hên xua mâu tíu tê mơdró pơtê cho dế ‘mâi rơnêu, ai mâu tíu tê ki ‘nâ hiăng tâi têa kơxăng xua tơdroăng ki roê xo sap ing hngêi kơmăi ki hrik pơhriâ têa châu Nghi Sơn kơdrâ pơtê. Tơdrêng amê hlối ăm ’nâi, Khu xiâm ngăn cheăng kơmăi kơmok ƀă tê mơdró kô pơxâu phâk kơtăng tâng châ ‘nâi tơdroăng ki roê ‘măn têa châu têa kơxăng mơdêk yă.

Nôkố, khu xiâm dế séa ngăn a 33 tíu tê mơdró, pôi tá chiâng kơtoâ. Mâu kăn kơ-êng ngế xiâm ngăn cheăng kơmăi kơmok ƀă tê mơdró ai troăng hơlâ klâi há vâ pro kơdroh yă têa châu têa kơxăng, tŏng kum tơdroăng xơpá tung cheăng kâ, tê mơdró, Ngế xiâm ngăn cheăng kơmăi kơmok ƀă tê mơdró tối tiah kố, tơdroăng mê ối tơngăn tung kơchơ tê mơdró dêi kong têa ê.

Katarina Nga tơplôu ƀă tơbleăng