Pôa Bùi Văn Cường, ngế xiâm chêh tôm xo rơkong, Kăn pơkuâ Ƀơrô cheăng Kuô̆k hô̆i ăm ‘nâi, tung pơla ing khế 1 troh khế 4, mâu kơ koan hiăng tí tăng ‘nâi plĕng, kum ăm tơdroăng tơkŭm po ƀlêi chiâng 02 Hneăng hôp ki ôh tá tối hdrối dêi Kuô̆k hô̆i, 08 rôh hôp dêi Vi ƀan pơkuâ Kuô̆k hô̆i, séa ngăn, tơbleăng ƀă ăm mâu rơkong veăng tơpui tối ƀă 02 luât, 04 tơdroăng pơkâ dê Kuô̆k hô̆i, 66 tơdroăng pơkâ dêi Vi ƀan pơkuâ Kuô̆k hô̆i; tơkŭm po Rôh hôp mâu kăn Kuô̆k hô̆i pêi pro tơniăn vâ tơpui, ăm rơkong mâu kăn veăng tơpui tối ‘na 08 tơdroăng tơkêa luât pơtroh ăm Kuô̆k hô̆i séa ngăn tơbleăng a Hneăng hôp má 7, Kuô̆k hô̆i hneăng 15 ƀă hên tơdroăng ki ê.

Hnoăng cheăng tí tăng ‘nâi plĕng, tơbleăng mâu tơdroăng cheăng mơjiâng luât pơtối châ kơjo kum, tơtrŏng, rơkê pơtối châ mơdêk, séa ngăn kơtăng. Mơgêi 19 dêi Khu xiâm pơkuâ tơdroăng kal kí, Tơdroăng mơjiâng luât, luât pơkâ hơnăm 2024, Túa pơkâ kơxô̆ 81dêi Vi ƀan pơkuâ Kuô̆k hô̆i. Pakĭng mê, ‘mot tơ’nôm 19 hnoăng cheăng mơjiâng luât nếo tung Túa pơkâ kơxô̆ 81 vâ teăm tơbleăng mâu  pơkâ dêi Đảng ƀă pêi châ tơdroăng rơhêng vâ ki ai khât.

Mâu hnoăng cheăng tơpui kâ séa ngăn pơkâ troăng tơmiât dêi Đảng, Tơnêi têa, châ tơbleăng tiô túa ki hbrâ rơnáu, kơhnâ ƀă tơƀrê tung tâi tâng mâu kơvâ cheăng, péa túa ƀă hên túa. Hnoăng cheăng mâu kăn, hnoăng cheăng kuăn pơlê vâ, hnoăng cheăng hriăn ngăn khoa hok pơtối châ tơbleăng pêi pro tro, rế hía rế tơtro.

Tung pơla ing khế 4 khế 6 kố, mâu kơ koan dêi Kuô̆k hô̆i kô chêh pro klêi hồ sơ, hlá mơ-éa pơtroh ăm Kuô̆k hô̆i tơbleăng a Hneăng hôp má 7 ƀă 09 tơdroăng tơkêa luât, 01 kơxop hlá mơéa pơkâ; chêh pro klêi, rak vế rơkê tro mâu hlá mơ-éa séa ngăn vâ pơtroh ăm Kuô̆k hô̆i ăm rơkong tơpui tối ‘na 11 kơxop hlá mơ-éa luât hiăng ai tung Tơdroăng mơjiâng luât, luât pơkâ.

Klêi kơ’nâ hmâng rơkong tơpui a rôh hôp, pôa Vương Đình Huệ, Kăn xiâm hnê ngăn Kuô̆k hô̆i mơnhên tối khât tung khế 3 ƀă hneăng má I, mâu kơ koan dêi Kuô̆k hô̆i hiăng pêi klêi hên hnoăng cheăng, khoa hok; séa ngăn khât tung túa pơkâ dêi Đảng đoân dêi Kuô̆k hô̆i, tơdrêng amê hlối pêi pro rơkê mâu tơdroăng ki trâm; hnoăng cheăng dêi mâu kơ koan rơkê ƀĕng ƀeăn, tro ƀă tơdroăng ki ai khât, séa ngăn tung tơdroăng hnê mơhno dêi Khu pơkuâ hnê ngăn Đảng, tro tiô luât pơkâ.

Tơdroăng pêi cheăng dêi Kuô̆k hô̆i tơbleăng tâi tâng tung mâu kơvâ cheăng mơjiâng luât, séa ngăn ƀă pơkâ mâu tơdroăng ki kal dêi tơnêi têa; hnoăng cheăng kuăn pơlê vâ; tơpui kâ; hnoăng cheăng tí tăng ‘nâi plĕng, séa ngăn, hnê mơhno tơdroăng cheăng dêi Hô̆i đong hnê ngăn; tơkŭm po tro mâu hneăng hôp dêi Kuô̆k hô̆i, rôh hôp dêi Vi ƀan pơkuâ Kuô̆k hô̆i, mâu kơ koan dêi Kuô̆k hô̆i, mâu tơdroăng ki kal pêi pro châ tơdroăng ki rơhêng vâ ing tơdroăng ki ai khât, tro ƀă tơdroăng rơhêng vâ dêi kuăn pơlê. Teăng mâ Vi ƀan pơkuâ Kuô̆k hô̆i, pôa Vương Đình Huệ, Kăn xiâm hnê ngăn Kuô̆k hô̆i mơnhên tối khât mâu tơdroăng ki pêi pro klêi ki mâu kơ koan dêi Kuô̆k hô̆i hiăng pêi klêi; mâu kăn, mơngế cheăng hiăng đi đo tâi tá hiâm tá mơno, pêi pro châ tiô tơdroăng ƀlêi chiâng tơdjuôm dêi Kuô̆k hô̆i.

Tung la ngiâ ah, pôa Vương Đình Huệ, kăn xiâm hnê ngăn Kuô̆k hô̆i pơkâ thế:

" ‘Na hnoăng cheăng pêi tung khế 4, hneăng má 2, ki kal cho hbrâ rơnáu ăm rôh hôp Tơnêi têa 9; hneăng hôp Kuô̆k hô̆i rôh má 7 ƀă hdrối mê, rôh hôp má 32, 33 dêi Vi ƀan pơkuâ Kuô̆k hô̆i. Á pơkâ thế klêi kơ’nâi rôh hôp kố, ngế xiâm chêh tôm xo rơkong, Kăn pơkuâ Ƀơrô cheăng Kuô̆k hô̆i hriăn ngăn, pơtối tơmâng mâu rơkong tơpui tối a rôh pêi cheăng vâ séa ngăn tâi tâng mâu tơdroăng ki kal tơdroăng cheăng ing nôkố troh tâi hneăng má II. Ƀă mâu hlá mơéa luât ƀă hlá mơ-éa chêh ‘na luât, athế séa ngăn chêh ‘mot tung tơdroăng dêi rôh hôp Vi ƀan pơkuâ Kuô̆k hô̆i rôh má 32, 33 tiô mâu tơdroăng pơkâ. Má môi, tâi tâng mâu tơdroăng ki kal ing nôkố troh tâi hneăng má 2, tơdroăng ki châ kơjo cho hneăng hôp má 7, Kuô̆k hô̆i hneăng 15. Má péa, tâi tâng mâu luât ƀă hlá mơ-éa chêh pơkâ, tâng tá hâi ai tung tơdroăng Kuô̆k hô̆i pơkâ mê athế pơkâ thế Khu xiâm mơjiâng luât teăng mâ Chin phuh pơtroh vâ ing mê Vi ƀan pơkuâ Kuô̆k hô̆i séa ngăn ing Vi ƀan Luât chêh ‘mot tung hneăng hôp".

Kăn xiâm hnê ngăn Kuô̆k hô̆i xuân pơchân mâu kơ koan dêi Kuô̆k hô̆i séa ngăn túa pơkâ, tơdroăng tŏng kum ‘na rak vế pơkí tơdroăng kal, túa pơkâ chêh hlá mơ-éa, ‘măn rak, túa pơkâ rak vế pơkí tơdroăng kal tơnêi têa, rak vế tơdroăng kal kí, tơdroăng ki pơxâu hôu ‘na rơkong tơpui. Mâu tíu pêi cheăng séa ngăn ƀă pơkâ thế mâu kăn ƀô̆, kong chưk pêi pro kơtăng pơkâ ‘na pêi pro hnoăng cheăng mơngế cheăng ăm tơnêi têa. Mâu kơ koan dêi Kuô̆k hô̆i kal mơdêk hiâm mơno pôu râng dêi hnoăng cheăng hên tâ nếo, hbrâ rơnáu tâ nếo tung mâu kơvâ cheăng, tơdrêng amê hlối mơdêk hnoăng cheăng tơrŭm rêm pâ tung, pa kong tung tơdroăng pêi pro hnoăng cheăng ki ai tơdjâk troh, hnoăng cheăng châ pơcháu.