VOV4.Xơ Đăng - Kong pơlê Kon Tum ai lối 50 rơpâu 600 ngế ai hnoăng ƀă kăch măng. Kơnôm pêi pro lĕm tro ‘na tơdroăng tŏng kum, ki kơjo dêi Đảng, Tơnêi têa ƀă tơdroăng mơhnhôk pêi dêi ing tâi tâng pơlê pơla veăng tŏng kum, ‘’Pêi pro tơdroăng koh mơnê hnoăng cheăng kâ kĕng chal hdrối nah’’ xua mê tâi tâng mâu rơpŏng ki ai hnoăng tơnêi têa pơrá ai tơdroăng rêh ối tơdâng lơ luâ tâ mâu rơpŏng ki ê tung pơlê cheăm.

A cheăm Hiếu, tơring Kon Plông, kong pơlê Kon Tum, rơpŏng Đinh Lôi, mô đô̆i hneăng hdrối nah châi tamo, ối a pơlê Vi Ching cho môi ‘’tíu châ tơmâng tŏng kum’’. Tung mâu hơnăm hiăng hluâ, khu râ kăn pơkuâ xuân môi tiah khu râ dêi cheăm Hiếu, đi đo tơmâng tŏng kum, rak ngăn ivá mô đô̆i châi tamo. Rơtế ƀă mâu troăng hơlâ kơjo dêi Đảng, Tơnêi têa tung mơnhông mơdêk cheăng kâ, rak ngăn tơdroăng rêh ối kuăn pơlê kơpong pá puât, rơpŏng Đinh Lôi, mô đô̆i hneăng hdrối nah châi tamo ối đi đo châ tŏng kum, hnê mơhno mơnhông mơdêk cheăng kâ mơdêk tơdroăng rêh ối.

A mâu roh leh, têt, hâi Mô đô̆i rong râ – Hlâ hía 27/7 ƀă hía hé teăng mâ khu râ kăn pơkuâ, mâu khu râ dêi cheăm pơrá troh hngêi kơ-êng, diâp kơxuô tơmeăm mơhnhôk hiâm mơno mô đô̆i hneăng hdrối nah châi tamo.

Pôa Đinh Lôi, mô đô̆i hneăng hdrối nah châi tamo tối ăm ‘nâi:

‘’Xuân kơnôm ai Đảng, Tơnêi têa tơmâng tŏng kum, ai kum liăn, ai troăng hơlâ kum ƀă mô đô̆i hneăng hdrối nah châi tamo tŭm, teăm tơdrêng. Klêi mê khu râ kăn pơkuâ, khu râ dêi cheăm tŏng kum, xua mê á ƀă rơpŏng mơnhông mơdêk cheăng kâ, tơdroăng rêh ối châ môi tiah kuăn pơlê. Phiu ro xua mê chiâng mo châ, á ối veăng ƀă kuăn cháu pêt loăng, pêi klâng nếo’’.

Kŏng ti on tơhrik Kon Tum diâp kơxuô tơmeăm pâ mơnê rơpŏng ai hnoăng ƀă kăch măng a cheăm Mường Hoong, tơring Đăk Glei

Cho kong pơlê ai tơdroăng cheăng kâ – rêh ối pơlê pơla ối hên pá puât, laga Đảng ƀô̆, khu râ kăn pơkuâ kong pơlê Kon Tum đi đo mơnhên, tơdroăng tŏng kum Mô đô̆i rong râ – Hlâ hía, rak ngăn, pêi pro mâu troăng hơlâ tŏng kum ƀă mơngế ai hnoăng tơnêi têa cho hnoăng cheăng kal kí ki xiâm ƀă đi đo. Ƀă hiâm mơno kố, ôh tá xê kơpong tơ’lêi hlâu mê tá a kơpong hơngế hơngo, kơpong ki pá puât, kơpong hdroâng kuăn ngo, tơdroăng rak ngăn, pâ mơnê ƀă mơngế ai hnoăng ƀă kăch măng pơrá châ tơmâng tŏng kum.

Jâ Mai Thị Luận, Kăn phŏ hnê ngăn Viƀan cheăm Đăk Rơ Ông, tơring Tu Mơ Rông tối ăm ‘nâi lâp cheăm ai 56 mô đô̆i rong râ ƀă rơpŏng ai mô đô̆i hlâ tung tơplâ xâ. Tơdroăng pêi cheăng ‘’Pâ mơnê hnoăng pleăng kân kĭn’’ cho tơdroăng pêi đi đo ƀă khu râ kăn pơkuâ ƀă khu râ kăn cheăm:

‘’Tơmâng troh mâu pôa, Đảng ŭy, Hô̆i đong kuăn pơlê, Viƀan kuăn pơlê cheăm tơkŭm po trâm mâ leh tơbâ Hâi Mô đô̆i rong râ – Hlâ hía. Roh Têt tơkŭm po lăm kơ-êng mơhnhôk mâu pôa klêi mê mâu rơpŏng nhŏng o koh pleăng mô đô̆i hlâ tung tơplâ xâ. Pakĭng mê, a pơlê ki lâi xuân pơcháu ăm mâu Kăn pơkuâ hnê ngăn Chi đoân, klêi mê mơhnhôk đoân viên droh rơtăm, vâi kơdrâi tŏng kum hâi pêi cheăng môi tiah ko hdréa, po văng nhâ pôm, pui nhâ báu, klêi mê pêi mâu tơdroăng tŏng kum mâu pôa’’.

Viƀan kong pơlê Kon Tum diâp ƀâng kheăn kơdeăn ăm mâu cheăm, bêng, pơlê kân pêi lĕm tro tơdroăng cheăng ‘na Mô đô̆i rong râ – Hlâ hía

Tơdroăng ing Khu pơkuâ cheăng pêi, Mô đô̆i rong râ ƀă Rêh ối pơlê pơla kong pơlê Kon Tum ăm hlo, tung 5 hơnăm hiăng hluâ, kong pơlê hiăng tơkŭm lăm kơ-êng ƀă diâp vâ chê 99.000 kơxuô tơmeăm ăm mơngế ai hnoăng tơnêi têa a roh têt lo hơnăm nếo ƀă hâi Mô đô̆i rong râ – Hlâ hía 27/7 ƀă tâi tâng kơxô̆ liăn vâ chê 24 rơtal 200 rơtuh liăn. Rơtế amê Khu pơkuâ râng Kơxô̆ liăn ‘’Pâ mơnê hnoăng pleăng kân kĭn’’ dêi kong pơlê mơhnhôk châ vâ chê 5 rơtal liăn kum rơnêu ilâng kiâ mô đô̆i; lăm pôu kơ-êng drêng châi tamo, tŏng kum khăm pơlât châi tamo ăm mâu ngế ai hnoăng tơnêi têa; tŏng kum mơjiâng nếo, rơnêu lối 1.200 toăng hngêi ối ăm mơngế ai hnoăng ƀă rơpŏng ai hnoăng tơnêi têa ƀă tâi tâng kơxô̆ liăn lối 37 rơtal 200 rơtuh liăn.

Tơdroăng tơdah păn roăng, rak ngăn rơpŏng ai hnoăng tơnêi têa, Nôu Việt Nam khên tơnôu châ pơlê pơla pêi pro chiâng tơdroăng ki lĕm tung tơdroăng pêi ‘’Pâ mơnê mơngế pleăng hnoăng kân kĭn’’. Pôa Nguyễn Thanh Tính, Kăn phŏ pơkuâ Khu pơkuâ cheăng pêi, Mô đô̆i rong râ ƀă Rêh ối pơlê pơla kong pơlê Kon Tum mơnhên:

‘’Tơdroăng po rơdâ pêi pro tro troăng hơlâ kơjo ƀă mơngế ai hnoăng tơnêi têa hiăng kum mơngế ai hnoăng tơnêi têa ai tơdroăng rêh ối tơniăn tâ, kum rak tơdroăng ki tơniăn kal kí, rêh ối pơlê pơla. Ai tơdjâk trâu hơngế tung tơdroăng hnê hriâm khôi túa lĕm tro tơnêi têa, khôi túa kăch măng tung khu kăn ƀô̆, đảng viên, kŏng chưk, viên chưk ƀă mâu râ kuăn pơlê.

Tơdroăng rêh ối ‘na hiâm mơno, kế tơmeăm khoăng dêi mâu ngế ai hnoăng tơnêi têa rế hía rế châ tŏng kum tŭm’’.

Kơnôm pêi pro tro troăng hơlâ kơjo dêi Đảng, Tơnêi têa xuân môi tiah pơlê pơla veăng pêi pro tơdroăng ‘’Pâ mơnê mơngế pleăng hnoăng cheăng kân kĭn’’, troh nôkố 99,82% rơpŏng ai hnoăng tơnêi têa dêi kong pơlê Kon Tum hiăng ai kơlo rêh ối tơdâng lơ hôm tâ kơlo rêh ối tơdâng dêi kuăn pơlê tíu rêh ối, tơdroăng rêh ối tơmeăm khoăng ƀă hiâm mơno dêi mâu ngế ai hnoăng tơnêi têa đi đo châ mơnhông.

Mơnhên dêi khu râ kăn pơkuâ mâu râ dêi kong pơlê Kon Tum xuân ăm hlo tâi tâng ai 102 cheăm, bêng, pơlê kân tung kong pơlê pơrá pêi pro tơtro tơdroăng ‘’Pâ mơnê hnoăng pleăng kân kĭn’’ ƀă tơdroăng pêi cheăng ‘na Mô đô̆i rong râ – Hlâ hía tiô 6 pơkâ dêi Khu xiâm pơkuâ cheăng pêi – Mô đô̆i rong râ hlâ hía ƀă Pơlê pơla.

Khoa Điềm chêh

A Sa Ly tơplôu ƀă tơbleăng