VOV4.Xơ Đăng - Kơxô̆ chêh tung kơmăi tơbleăng mơnhên pro hlá mơ-éa dêi kong pơlê Kon Tum ăm hlo riân troh khế 9/2022, kơxô̆ hồ sơ pro hiăng luâ hâi khế pơkâ la hâi teăm pro klêi ối hên.

Tiô riân ngăn dêi Vi ƀan kong pơlê Kon Tum ăm hlo mâu kơ koan cheăng ‘na kơvâ mê dêi Vi ƀan kong pơlê, Vi ƀan mâu tơring, pơlê kong kơdrâm, Vi ƀan rêm râ hiăng tơleăng mơnhên la hiăng luâ hâi khế pơkâ ai 18.394 hồ sơ tung tâi tâng 235.871 hồ sơ. Ki vâ tối a kố ai 2.429 hồ sơ hiăng ton luâ hâi khế la hâi pro klêi ăm vâi.

Hlo tơdroăng mê, hâi lơ 24/10, Vi ƀan kong pơlê Kon Tum ai hlá mơ-éa chêh pơkâ thế mâu kơ koan cheăng ‘na kơvâ pro hlá mơ-éa dêi Vi ƀan kong pơlê; Khu rak ngăn kơpong cheăng kâ; Vi ƀan mâu tơring, pơlê kong kơdrâm tơkŭm pro klêi mâu hồ sơ ki hiăng luâ hâi khế pơkâ hdrối lơ 5/11/2022.

Tíu xiâm pro hlá mơ-éa a kong pơlê Kon Tum

Pakĭng mê, Kăn hnê ngăn Vi ƀan kong pơlê Kon Tum xuân pơkâ thế mâu tíu pêi cheăng mơdêk hnê khĕn, pơxâu liăn, hôu tối mâu kăn ƀô̆, mâu kŏng chưk, viên chưk ki pro mơdoh mơdon, pro ôh tá tro chiâng hrá klêi pro mâu hlá mơ-éa tung tơdroăng pro hlá mơ-éa ăm kuăn pơlê.

Bro tơniăn ăm tâi tâng mâu hồ sơ túa pro hlá mơ-éa ki lối hrá xuân thế ai tơbleăng tối nhên xua ti lâi  ƀă mơngế ki pơkuâ xiâm kơ koan, tíu pêi cheăng ƀă thế pâ kuăn pơlê pôi tá ‘nhó, khu mơdró pêi pro tro tiô poekâ a tơdroăng pơlâ kơxô̆ 61/2018 dêi Chin phuh.