Vâ kum mâu vâi o hok tro ki ai tơdroăng rêh ối xơpá hmiân tuăn rơbot ƀai tơ’noăng mơgêi râ má pái phôh thong, kong pơlê Kon Tum hiăng ai hên tơdroăng pêi pro tŏng kum mâu vâi o. Tung lối 5 rơpâu ngế hok tro dêi kong pơlê Kon Tum chêh inâi tơ’noăng mơgêi râ má pái hơnăm kố, ai lối 1.100 ngế hok tro ai tơdroăng rêh ối xơpá, hiăng châ mâu hngêi trung tung kong pơlê pro tơ’lêi hlâu tung rơbot ƀai tơ’noăng tơkŭm a hngêi trung.

Krê ƀă mâu hngêi trung râ má pái phôh thong Hdroâng kuăn ngo ai tíu kâ koi ối pơtê, mâu vâi o hok tro châ xoăng ăm tá tíu ối ƀă kum ăm liăn kâ. Vâ ai liăn tŏng kum ăm mâu vâi o, mâu tơring, pơlê kong kơdrâm dêi kong pơlê Kon Tum xo tơdah ƀă mơhnhôk veăng tơlo kum, troh nôkố châ 430 rơtuh liăn.

Nôkố, khu pơkuâ ngăn Đoân Droh rơtăm Kon Tum dế pơtối mơhnhôk mâu tíu pêi cheăng, khu ki ai hiâm mơno hơ-ui, vâ thăm mơdêk tŏng kum mâu hok tro ki ai tơdroăng rêh ối xơpá. Khu ngăn hnê hriâm ƀă mơjiâng tuăn ngoâ rơkê kong pơlê Kon Tum ƀă mâu tơring cheăm kơvâ cheăng dêi kong pơlê kô tơkŭm veăng tơlo, kum mâu tơdroăng ăm mâu vâi o tá troh mơgêi tơ’noăng.

Tơdroăng tơdjuôm ivá dêi rêm râ, kơvâ cheăng cho môi tơdroăng ki mơhnhôk kân khât ƀă thái cô ƀă hok tro vâ pơtối mơdêk ki rơkê tung rơbot ƀai tung rôh ki hiăng vâ mơgêi.