Pơxiâm pêi pro 12 tơdroăng tơkêa bro troăng kân tơdrăng lĕm sap peăng Kơnhŏng troh peăng Hdroh. Pơtối mê, Vi ƀan kong pơlê Kon Tum tŏng kum lối 15.900 rơpŏng kơtiê, rêm rơpŏng 600.000 liăn ƀă lối 8.800 rơpŏng vâ chê kơtiê rêm rơpŏng 300.000 liăn vâ kâ Têt. Ƀă kơxô̆ liăn tŏng kum Têt ăm rơpŏng kơtiê lối 9 rơtal 500 rơtuh liăn Viƀan kong pơlê Kon Tum mơ’no ing liăn ngân ƀă kơxô̆ liăn mơdêk xo, kơdĭng mơ’no hrê hơnăm 2022.

‘Na kơxô̆ liăn tŏng kum Têt ăm rơpŏng vâ chê kơtiê lối 2 rơtal 600 rơtuh liăn, Vi ƀan kong pơlê Kon Tum pơkâ thế mâu tơring, pơlê kong kơdrâm hbrâ xing xoăng kơxô̆ liăn, tơdrêng amê tơrŭm ƀă mâu khu râ, kơvâ cheăng, khu pú hên, mâu ngế krê tung kong pơlê ƀă kong pơlê ki ê ing Kơxô̆ liăn kum mơngế kơtiê xing xoăng ăm vâ tơdâng tơ’mô tŏng kum.