Ƀă ivá khŏm mơ-eăm vâ ăm rêm rơpŏng châ tơdah kâ Têt phiu ro, tung mâu hâi kố a kong pơlê Kon Tum hên tơdroăng rak ngăn Têt dế châ khu râ kăn pơkuâ, mâu khu râ tơkŭm po djâ tơdroăng phiu ro Têt ăm mâu kuăn pơlê ai tơdroăng rêh ối pá puât. Kơxo hâi lơ 10/1, Khu pơkuâ mơngế tro trếo ‘mêi da cam/dioxin a kong pơlê Kon Tum tơrŭm ƀă Kŏng ti tê mơdró hên tơmeăm a Kon Tum tơkŭm diâp 389 kơxuô tơmeăm Têt, tâi tâng kơxô̆ liăn mơ’no rôe lối 146 rơtuh liăn ăm mơngế chó chêng tơvê kŏng, cho mâu ngế tro trếo ‘mêi da cam rơxông má 3 a mâu tơring: Đăk Hà, Kon Rẫy, Ngọc Hồi ƀă pơlê kong kơdrâm Kon Tum.

Rơtế a mê Khu pơkuâ mơngế tro trếo ‘mêi da cam/dioxin kong pơlê kon Tum xuân xo Kơxô̆ liăn tŏng kum mơngế tro trếo ‘mêi da cam/dioxin tung 137 rơtuh liăn diâp ăm 846 ngế tro trếo ‘mêi tung kong pơlê. Hdrối mê, Kŏng đoân Mâu kơpong hngêi kơmăi kơmok – Kơpong cheăng kâ kong pơlê Kon Tum tơrŭm ƀă Kŏng đoân Viên chưk kong pơlê tơkŭm po Tơdroăng Têt rơtế phiu ro – Hơngui tơkoh hơnăm 2022.

A tơdroăng pêi mê ai 360 đoân viên kŏng đoân, mơngế pêi cheăng ai tơdroăng rêh ối pá puât châ diâp kơxuô tơmeăm rêm kơxuô kơnâ sap ing 500 rơpâu troh 1 rơtuh liăn.