Hngêi trung Phôh thong hdroâng kuăn ngo ai tíu kâ koi ối pơtê râ má péa phôh thong ƀă râ má pái phôh thong An Lão ai 2 râ ƀă ki hên cho hok tro hdroâng kuăn ngo Bơhnéa, Hré. Hâi lơ 5/4/2024, Khu pơkuâ hdroâng kuăn ngo kong pơlê Bình Định tơrŭm ƀă Hngêi trung râ má pái phôh thong hdroâng kuăn ngo ai tíu kâ koi ối pơtê râ má péa phôh thong ƀă râ má pái phôh thong An Lão mơhno mâ Kâu lăk ƀô̆ ‘’Droh rơtăm tối ôh ƀă xo on veăng tá hâi tro hơnăm ƀă xo on veăng ối achê hdroâng hdrê môi mơheăm chhá” a hngêi trung kố.

Kâu lăk ƀô̆ kố đi đo tơkŭm po tơpui tơno ‘na tơdroăng cheăng châ hriăn plĕng vâ hbrâ mơdât tơdroăng xo on veăng tá hâi tro hơnăm ƀă xo on veăng ối achê hdroâng hdrê môi mơheăm chhá ăm hok tro. Mâu vâi o hok tro châ tơbleăng mâu pơkâ luât ƀă tơdroăng xo on veăng tá tro hơnăm ƀă xo on veăng ối achê hdroâng hdrê môi mơheăm chhá, tơdjâk dêi tơdroăng xo on veăng tá hâi tro hơnăm tơdjâk troh ivá ƀă tơdroăng rêh ối; hnê mơhno rak ngăn ivá mơhum kuăn ngá droh rơtăm phô̆m xông kân.

Đinh Thị Bảo Thi, hok tro lâm 9A2, Hngêi trung phôh thong hdroâng kuăn ngo ai tíu kâ koi ối pơtê râ má péa phôh thong ƀă râ má pái phôh thong An Lão tâ hlo mâu tơdroăng kâu lăk ƀô̆ djâ troh mâu pú hmâ cho pơxúa ƀă kal khât:

“A hngêi trung thái cô hiăng pơtâng tối ‘na xo on veăng tá hâi tro hơnăm ăm ngin o klêi mê á o pơtối pơtâng ăm mâu pú hmâ ki ê ‘na xo on veăng tá hâi tro hơnăm. Ing tơdroăng pơtâng tối kố, ngin o rơtế dêi pó pêi pro lĕm tro, ôh tá pro xôi’’.

Hên cheăm a tơring kong ngo An Lão ai troăng pêi ki rơkê vâ kơdroh mơdât tơdroăng xo on veăng tá hâi tro hơnăm ƀă xo on veăng ối achê hdroâng hdrê môi mơheăm chhá. A cheăm An Hưng, rêm thôn, pơlê tung pơkâ tơkêa, mâu tơdroăng pơkâ ki nhên pơxâu phâk mâu tơdroăng pro xôi troh xo on veăng tá hâi tro hơnăm ƀă xo on veăng ối achê hdroâng hdrê môi mơheăm chhá. Mâu krâ pơlê, kăn pơkuâ pơlê, ngế ki kuăn pơlê loi tơngah ai hnoăng kal khât tung tơdroăng pơtâng tối, mơhnhôk kuăn pơlê rơtế tơdjuôm ivá mơdât tơdroăng xo on veăng tá hâi tro hơnăm. Pôa Đinh Văn Ranh ối a thôn 4, cheăm An Hưng tối ăm ‘nâi:

“Ngế ki kuăn pơlê loi tơngah ngin đi đo pêi pro tiô tơdroăng nôkố ƀă ‘nâi rêm rơpŏng kuăn pơlê vâ rơtế ƀă kơvâ, rêm râ dêi thôn lăm pơtâng tối. Tâng châ hlo rơpŏng ki lâi ai ngế vâ xo on veăng tá hâi tro hơnăm mê ngin troh tơdrêng amê vâ pơtâng tối troh a hngêi, mơdât ôh tá ăm tơkŭm po tơdroăng xo on veăng tá hâi tro hơnăm. Mâu hâi hôp thôn, hôp mâu kơvâ cheăng, mâu roh mê ngin xuân pêi pro ƀă tơdroăng pơtâng tối ăm hlê plĕng nhên’’.

Khu pơkuâ hnê ngăn tơdroăng cheăng Đảng tơring An Lão hnê mơhno mâu khu râ kăn pơkuâ hnê ngăn Đảng, Khu râ kăn pơkuâ, măt trâ̆n, khu râ veăng tung tơdroăng pơtâng tối, mơdêk tơdroăng hlê plĕng ăm kuăn pơlê ‘na tơdroăng xo on veăng ƀă mơhum kuăn ngá vâ ví tơdroăng xo on veăng tá hâi tro hơnăm ƀă xo on veăng ối achê hdroâng hdrê môi mơheăm chhá. Tơdroăng pơtâng tối thế ƀă tơdroăng pêi ki nhên, ki pơxúa, tro mơngế ƀă troăng pơtâng tối thế rơbĕn lĕm, ƀeăn ƀĕng. Pôa Phạm Minh Tâm, Kăn pơkuâ hdroâng kuăn ngo tơring An Lão tối ăm ‘nâi:

“Ƀă Ƀơrô hdroâng kuăn ngo thế tơrŭm ƀă tơring An Lão, Vi ƀan mâu cheăm, pơlê kân, mơdêk tơdroăng pơtâng tối ƀă hên troăng. Ki rơhêng vâ tối a 3 hngêi trung ai tíu kâ koi ối pơtê ƀă 2 hngêi trung kâ koi pơtê kơhâi dế dêi tơring. Tơkŭm a tung pơtâng ăm rơxông hok tro tung rơxông hơnăm chiâng ai tơdroăng lôi pơtê hriâm xo on veăng tá hâi tro hơnăm. Xua mê, tung hơnăm hiăng hluâ ai hngêi trung ai ngế xo on veăng tá hâi tro hơnăm’’.

Tơring kong ngo Vân Canh cho kơpong kơdrâm kuăn pơlê Bơhnéa, Hrê rêh ối xuân cho tơring ai ngế xo on veăng tá hâi tro hơnăm hên má môi kong pơlê Bình Định. Xiâm kối xo on veăng tá hâi tro hơnăm cho mâu vâi o hlê plĕng tá hâi tŭm ‘na hnê hriâm pơla kơdrâi kơnố, ivá mơhum kuăn ngá droh rơtăm phô̆m xông kân, tơdroăng ki hlê plĕng ‘na luât tá hâi tŭm; ôh tá pôu râng hnoăng cheăng dêi rơpŏng. Pôa Nguyễn Xuân Việt, Kăn phŏ hnê mơhno má môi Vi ƀan tơring Vân Canh tối ăm ‘nâi hiăng xing xoăng kăn ƀô̆ Ƀơrô hdroâng kuăn ngo ƀă mâu cheăm đi đo pơkuâ rêm thôn, pơlê mơhnhôk mâu rơpŏng tơkêa ôh tá ăm ai tơdroăng xo on veăng tá hâi tro hơnăm ƀă xo on veăng ối achê hdroâng hdrê môi mơheăm chhá. Tơdroăng tơrŭm pơla hngêi trung hriâm ƀă rơpŏng châ tơmâng hên.

“Mơhé pơtâng tối cho hên, mâu khu cheăng kơvâ cheăng veăng mơdât tơdroăng xo on veăng tá hâi tro hơnăm xuân ai. Nôkố, troăng pơtâng tối cho ki xiâm, hlê plĕng dêi kuăn pơlê hdroâng kuăn ngo laga ki rơhêng vâ tối cho mâu vâi o nếo xông kân tá hâi hlê plĕng tŭm ki tơdjâk dêi tơdroăng xo on veăng tá hâi tro hơnăm xua mê drêng ai tơdroăng mê la ngiâ tơdjâk kân troh tơdroăng rak ngăn ivá ăm kuăn ‘nĕng, tơdjâk troh cheăng kâ rơpŏng ƀă tơdjâk ‘mêi pơlê pơla. Tơring xuân hiăng pơkâ mâu kơvâ cheăng ƀă kong pơlê, hngêi trung pơtâng tối pro ti lâi vâ mơdêk hlê plĕng ăm kuăn pơlê, ki rơhêng vâ tối mâu ngế ki kal pơtâng tối cho khu hơnăm ối nếo’’.

Kong pơlê Bình Định mơ-eăm, kơdroh tơdâng 2% - 3% rêm hơnăm kơxô̆ mơngế xo on veăng tá hâi tro hơnăm ƀă rak ôh tá ăm ai tơdroăng xo on veăng ối achê hdroâng hdrê môi mơheăm chhá ƀă mâu thôn pơlê, hdroâng kuăn ngo ai kơxô̆ ngế xo on veăng tá hâi tro hơnăm hên. Pôa Đinh Văn Lung, Kăn pơkuâ hdroâng kuăn ngo kong pơlê Bình Định tối ăm ‘nâi, kơ koan hiăng pơkâ mâu tơring tơrŭm ƀă mâu hngêi trung hriâm tung tơring thăm pơtâng tối ƀă hnê hriâm ăm hok tro hlê plĕng hên tâ ‘na ivá mơhum kuăn ngá, hlê plĕng tro ‘na xo on veăng rơpŏng, hbrâ inhên tơdroăng rêh ối, mâu troăng hbrâ mơdât xo on veăng tá hâi tro hơnăm ăm mâu vâi o:

“Tơdroăng pơtâng tối xo on veăng tá hâi tro hơnăm ƀă xo on veăng ối achê hdroâng hdrê môi mơheăm chhá xuân ối tung tơdroăng tơkêa bro kŭn 2 ƀă tơdroăng tơkêa bro 9, tơdroăng pêi pro 1719. Khu pơkuâ hdroâng kuăn ngo kong pơlê xuân hiăng ai mơjiâng pơkâ pêi apoăng hơnăm ƀă xing xoăng kơxô̆ liăn ăm mâu tơring vâ rơtế dêi pó pơtâng tối. Pakĭng pơtâng tối mê Khu pơkuâ hdroâng kuăn ngo kong pơlê xuân mơjiâng kâu lăk ƀô̆ mơhno mâ kâu lăk ƀô̆ tối ôh tá vâ ƀă xo on veăng tá hâi tro hơnăm ƀă xo on veăng ối achê hdroâng hdrê môi mơheăm chá; mơjiâng pano áp-phích pơtâng tối a mâu pơlê, mâu cheăm ki ai kơxô̆ mơngế on veăng tá hâi tro hơnăm’’.