Nâ Y Hương, hdroâng kuăn ngo Rơteăng a kong pơlê Kon Tum tối ăm ‘nâi, mâu hơnăm achê pơla kố, kơnôm châ Khu pơkuâ ngăn vâi kơdrâi kong pơlê Kon Tum tơkŭm po hên tơdroăng, môi tiah: Mơngế ki hnê tối rơkê ‘na mơjiâng vâi kơdrâi rơxông chal nếo kơpong hdroâng kuăn ngo, kơpong tiô khôp; Tơniăn ăm vâi kơdrâi ƀă vâi hdrêng xua mê, tơná ƀă hên vâi kơdrâi hiăng hlê plĕng nhên ‘na mâu tơdroăng kuăn ngo, tơdroăng loi tĭng, tiô khôp, Luât rak tơdâng tơ’mô pơla khu vâi kơdrâi-vâi kơnốu, Luât pơkŏng ŏng mế ƀă rơpŏng hngêi ƀă hên tơdroăng ki ê.

“Klêi kơnâi hên roh tơ’noăng, á hiăng châ hlê plĕng, chôu vế hên ‘na tơdroăng ki tối ‘na vâi kơdrâi, mâu tơdroăng ki xiâm ‘na cheăng xiâm tơnêi têa tŏng kum ăm mâu hdroâng kuăn ngo, kơpong kong ngo hơnăm 2021-2030. Mâu tơdroăng ki hlê plĕng ‘na loi tĭng, tiô khôp. Hnoăng cheăng ton la ngiâ ‘na hdroâng kuăn ngo dêi Đảng ƀă Tơnêi têa pin. Pơtối mơdêk hnoăng cheăng dêi vâi kơdrâi, thăm rế rơkê tâ tung trâm, topui tơno kâ, tơrŭm hôp, mâu hnoăng cheăng pơlê pơla ki veăng tung hnoăng cheăng kal kí”.

Ki rơhêng vâ tối, a Kon Tum hơnăm kố, mâu vâi o hdrêng hdroâng kuăn ngo xuân châ veăng tơpui tơno pơla Hô̆i đong ngăn vâi hdrêng ƀă Khu hnê mơhno Hô̆i đong hnê ngăn kong pơlê kon Tum. Kố cho tíu ki kal kân khât vâ vâi hdrêng dêi kong pơlê châ tơpui tơno dêi ing hiâm tuăn mơno tơná vâ Khu kăn Hô̆i đong hnê ngăn kong pơlê xuân môi tiah mâu khu râ pơkuâ châ rĕng tŏng kum, rak ngăn, tơmâng rơkong tơpui dêi vâi hdrêng.

O Phan Phúc Phú, hok tro lâm 8C2, hngêi trung râ má 2 - hngêi trung râ má pái Liên Việt Kon Tum tối ăm ‘nâi:

“Á hiăng kơ-êng 3 tơdroăng ki ai tơdjâk ‘na măng pơlê pơla Internet, tơdroăng ki pơklât hjip pro pơlăm pơlói ƀă tơdroăng tơpâm rơxiăn a hngêi trung, ƀă hngêi tơdế dêi hngêi trung hiăng tơ’nhê hên ó. Ing mâu tơdroăng tiâ mơnhên dêi mâu vâi tăm, vâi xăng, mê tơdroăng xúa Internet athế pro tiô luât, hlê plĕng xêh.

Tơdroăng pơklât vâi hdrêng pro pơlăm pơlói, lơ tơdroăng tơpâm tơxiăn tung hngêi trung, xuân hiăng ai hên khu râ ki veăng pêi mơdât. Ing tơdroăng tơpui tơno kố á hlo ai pơxúa kân khât”.

Mâu hơnăm hdrối mê hía nah, tơdrêng ƀă mâu tơdroăng cheăng tŏng kum ‘na kế kâ ăm mâu vâi o hdrêng mơnhông pêi cheăng kâ, rêm râ vâi kơdrâi a kong pơlê Dak Lak ôí pêi pro kơhnâ khât ‘na mâu tơdroăng tơlo kơdĭng liăn vâ rôe ƀao hiêm khăm pơlât tŏng kum mâu ngế ki kơtiê xahpá.

Tơdroăng cheăng kố hiăng kum hên vâi nâ o tơ’lêi châ khăm pơlât, rak ngăn ivá cheăng, kơdroh pá puât, ôh tá ai liăn ngân drêng ôh tá mơhúa tro châi tamo. Môi tiah nâ Đặng Thị Bình, ối a thôn 1, cheăm Ea Kpam, tơring Čư̆ Mgar drêng châ xo phĭu khăm pơlât xua Khu ngăn vâi kơdrâi cheăm kum ăm, vâi o tâ hmiân tuăn iâ.

“Tơdroăng rêh ối dêi rơpŏng hngêi á pá puih ó khât, kơnôm châ Khu pơkuâ ngăn vâi kơdrâi cheăm ăm 1 phĭu khăm pơlât mê á mơnê hên khât, ai theh khăm pơlât vâ châ pơlât a hngêi pơkeăng xuân chiá ôh tá hrê liăn ngân drêng troh khăm pơlât a hngêi pơkeăng, chía ôh tá tô tuăn ti ai liăn drêng dêi tơná lăm khăm pơlât”.

A Lai châu, ai hên hdroâng kuăn ngo, ai hên khôi túa-vêa vong pơrá phá dêi pó, mê hnoăng cheăng dêi vâi kơdrâi tung rêh ôí mê vâi cho mâu ngế ki pêi cheăng, ki mơhum kuăn ‘nĕng. Kơnôm ai túa hnê tối tơtrro, troh nôkố hnoăng cheăng dêi vâi kơdrâi a pơlê cheăm xuân hiăng hơ’lêh phá tơ-ê ƀă xuân ai rơkong tơpui rơkê tung rơpŏng hngêi.

Nâ Ma Thị Chư, ối a pơlê Phìn Chải, cheăm Giang Ma, tơring Tam Đường tối ăm ‘nâi: Xua ai kơnốu cho pro kăn cheăm ƀă châ kăn ƀô̆ hnê tối đi đo mê hiăng hơ’lêh tung tơmiât, túa pêi, veăng kum ƀă hnê tối dêi kơdrâi kuăn hên tâ:

“Rêm hâi, tơdroăng cheăng dêi á cho pêi chiâk deăng, pêi klâng, păn chu, păn peâp, păn í, kơ’nêi kơpôu ƀă pế drôu. Peăng kơhâi drêng châi ing chiâk deăng, á ôh tá teăm pế hmê mê kơnốu á kum pế kơchâi hmê a kơhâi dế, tơkôm 3 ngế kuăn nôu ngin vêh mê kâ hmâ ƀă drêng. Hâi tơdrốu, hâi tĭng châ pơtê mê kơnốu xuân lăm pêi chiâk deăng kum ăm nôu pâ á, pêi viâ mâu tơdroăng tung hngêi.

Dế nôkố rơpŏng á rêh ối pêi lo liăn tơniăn, kơnốu á ôh tá la lâi xiăn pâm kơ á, rơpŏng hngêi rêh ối xuân tơrŭm môi hiâm mơno”.

Kơnôm ai tơdroăng veăng hnê tối, pơkâ hnoăng cheăng dêi mâu khu râ, kơvâ cheăng, rêm râ, khu kăn pơkuâ, mê vâi kơdrâi ƀă vâi hdrêng hdroâng kuăn ngo châ hriâm tâp, thăm mơdêk ki hlê plĕng, veăng pêi mâu tơdroăng cheăng pơlê pơla; châ khăm pơlât, rak ngăn ivá châ chăn, kring vế hnoăng rêh ối tro tiô luât.