Pôa Điệu Út, hdroâng S’Tiêng, ối a kơtâu Mười Mẫu, cheăm kơpong tơkăng kong Phước Thiện, tơring Bù Đốp tối, rơpŏng pôa pơ’lêh ối a kơtâu Mười Mẫu hiăng vâ chê chât hơnăm kố, châ tơnêi têa kum ăm tơnêi, kum bro ăm hngêi ối, hiăng hlo phiu khât. Hơnăm 2017, rơpŏng pôa ƀă vâi krâ nhŏng o tung kơtâu kố ai tơdroăng ki phiu ro kân, on tơhrik tơnêi têa hiăng châ toi vêh troh a pơlê, tơdroăng ki vâi krâ nhŏng o tơkôm hiăng ton sap ing nah mê nôkố hiăng chiâng tơdroăng ki ai khât.

Kơpong 67 ối tung kơtâu Mười Mẫu, cheăm Phước Thiện, tơring Bù Đốp ai 200 rơpŏng kuăn pơlê ƀă lối hrĭng pơ’leăng mâ mơngế, 95% pơ’leăng mâ mơngế cho hdroâng kuăn ngo, tung mê ki hên cho mơngế S’Tiêng. Hdrối nah, kơpong kố châ ngăn cho tơdroăng ki xiâm ‘na kơklêa kơtiê dêi tơring xua ôh tá hriâm tâp, hngêi trăng troăng klông ôh tá lĕm, tơnêi tơníu prôk lăm pá puât, kơxô̆ rơpŏng ai hngêi krá kâk ƀă ai on tơhrik xúa bu iâ, vâi hdrêng ôh tá châ troh hngêi trung, plâ hơnăm hmôu pơ kơklêa đi đo. Sap ing ai on tơhrik, tơdroăng rêh ối dêi vâi krâ nhŏng o hiăng hơ’lêh hên. Vâi krâ nhŏng o hiăng hơ’lêh mâu kơmăi kơmok ƀă tơdroăng ki hrik têa ƀă on tơhrik, kum tơ’lêi hlâu, kơdroh liăn hrê hên ăm tơdroăng ki tôh kế tơmeăm. Pakĭng mê, kuăn, ‘nĕng hdroâng kuăn ngo ai on tơhrik bâ eăng kum ăm tơdroăng ki hriâm tâp tro tâ. Ôh ti xê ai on tơhrik vâ bâ eăng, mâu rơpŏng ối roê tơ’nôm tơvi, kơtuh hngíu, quat, hdro pế ƀă hên ki ê kơnôm mê, tơdroăng rơkê tung rêh ối dêi hdroâng kuăn ngo châ mơdêk khât. Ngoh Điểu Thâm, môi ngế kuăn pơlê a kơpong 67 ăm ‘nâi, vâi krâ nhŏng o reh ối akố tung mê ai hên hdroâng kuăn ngo, mơngế S’Tiêng, M’nông, Mạ ƀă Khmer. Sap ing ai on tơhrik, hên rơpŏng kơhnâ pêi cheăng kâ tâ, tơdroăng rêh ối hiăng hơ’lêh hên, ngoh Điểu Thâm phiu ro tối:

“Tơnêi têa hiăng pêi pro môi tiah mê, mê nếo xuân tŏng kum ăm ai kơvâ pêi cheăng mê xuân môi tiah ai liăn khế tơ’moê tơ’nôm hngêi ối, pro hơ’lêh. Tung hngêi môi tiah ai tơvi, kơtuh hngíu mê nếo kơmăi rôh hmân ếo mê hên rơpŏng pơrá ai. Nôkố châ mơnhông, ai kế tơmeăm ki kố ki tá”.

Sap ing tíu xiâm cheăm Phước Thiên tơkoh troh kơpong 67 cho troăng prôk ki hiăng châ tôh chhá kơxu tơdrăng, mâu pu pái, ro dế rê nhâ a mâu kơdrum loăng plâi hôt, kơxu châ pêt nếo, on tơhrik tơnêi têa châ pêt tâi tâng, tung ngiâ méa kuăn pơlê mơhno tối tơdroăng ki phiu ro dêi tơdroăng rêh ối. Ngoh Điểu Phúc, môi ngế kuăn pơlê a kơpong 67 tối: On veăng á ối akố hiăng châ 11 hơnăm, hdrối nah gá pá puât khât, rơpŏng ai 4 pơ’leăng mâ mơngế la mơ-eăm khât xuân bu bê kâ, akố ai 10 rơpŏng mê 9 rơpŏng cho rơpŏng kơtiê, rơpŏng ki u ối xuân ối tung rơpŏng vâ chê kơtiê. Laga, châ Đảng, Tơnêi têa tơmâng ngăn, toi kơxái on tơhrik troh a hngêi, kơbố ôh ti ai mê châ kum ăm ro, ôh tá ai pu pái,ôh tá bro hngêi, nôkố bô bố xuân hâk vâ pêi cheăng kâ, vâi krâ nhŏng o hiăng phâi tơtô, loi tơngah a Đảng, Tơnêi têa.

Pôa Điểu Cre, krâ pơlê môi tung mâu ngế ki châ kuăn pơlê loi nhuô̆m a cheăm tối, châ hbru ăm tơnêi pêi kâ tiô tơdroăng 134 sap ing hơnăm 2005, troh hơnăm 2017 Kơpong 67 châ tơnêi têa ‘no liăn kum on tơhrik, bro troăng prôk, bro hngêi pơkeăng cheăm. Mâu hơnăm a chê kố, kơnôm tung tơdroăng pơkâ dêi tơnêi têa ‘na mơjiâng thôn pơlê nếo ƀă kơdroh kơtiê, vâi krâ nhŏng o a tíu kố pơtối châ tơnêi têa kum bro ăm hngêi ối ƀă kum mâu kế tơmeăm xúa kih thuât pêi cheăng kâ. Troh nôkố, tâi tâng kơtâu Mười Mẫu bu ối 5 rơpŏng kơtiê, kơdroh lối 90% tâng pơchông ƀă mâu hâi Kơpong 67 pêi cheăng. Kuăn pơlê akố phiu ro khât.

Tơdroăng 4 ôh (ôh tá ai on tơhrik, ôh tá ai troăng prôk, ôh tá ai hngêi trung hriâm, ôh tá ai têa ôu a kơpong 67 hdrối nah, troh nôkố hiăng mơ-eăm chiâng “6 ai” ai on tơhrik, ai troăng prôk, ai hngêi trung hriâm, ai hngêi pơkeăng, tơnêi tơníu ƀă ai têa ôu hum roh. Ai tơdroăng rêh ối dế rế hía rế hơ’lêh tiah kố cho kơnôm ing tơdroăng tơmâng ngăn dêi Đảng, Tơnêi têa, dêi kăn pơkuâ, khu kăn pơkuâ cheăm tơring ƀă mơ-eăm hluăn kơtiê dêi kuăn pơlê.