Péa hâi hiăng hluâ, (22,23/11), Khu râ kăn teăng mâ Kuô̆k hô̆i kong pơlê Gia Lai hiăng ai mâu roh trâm mâ kuăn pơlê a mâu tơring Phú Thiện, Đức Cơ, Čư̆ Păh, Đăk Đoa, Kƀang, Čư Prông, Đăk Pơ ƀă Ia Grai. A mâu roh trâm mâ, kuăn pơlê dêi kong pơlê Gia Lai tối tơdroăng phiu ro mâu tơdroăng châ tơƀrê dêi hneăng hôp má 4 Kuô̆k hô̆i hneăng má XV. Kuăn pơlê xuân kheăn kơdeăn hiâm mơno pôu râng hnoăng cheăng dêi mâu kăn teăng mâ Kuô̆k hô̆i kong pơlê Gia Lai hiăng ai hên rơkong veăng tơpui ki kal tung tơdroăng châ tơƀrê dêi hneăng hôp.

Kuăn pơlê pâ thế hên tơdroăng ki tá hâi tơleăng kêi đeăng a tơring, môi tiah tơmâng mơ’no liăn cheăng, mơjiâng pro hngêi trăng, troăng klông thôn pơlê, ki má lối cho ‘na troăng klông. Tơdroăng klâk têa a vâi hdrêng tâk hên tung hơnăm hiăng hluâ, hên tíu xah hêi ăm vâi hdrêng kơpong thôn pơlê, kơpong hdroâng kuăn ngo.

A roh trâm mâ, hên kuăn pơlê xuân pơkâ mâu kơvâ cheăng ai túa cheăng tơniăn ‘na kơchơ mơdró phon rơvât, tơmeăm kum tung pêi chiâk deăng vâ kuăn pơlê pêi chiâk deăng hmiân tuăn pêt mơjiâng tơmeăm khoăng.