VOV4.Xơ Đăng - Hbrâ ăm Hneăng hôp má 4, Kuô̆k hô̆i hneăng 15 hiăng vâ troh la ngiâ, sap ing hâi lơ 5 troh lơ 11/10, Khu kăn Kuô̆k hô̆i kong pơlê Lâm Đồng hiăng tơkŭm pêi pro rôh trâm mâ kuăn pơlê a mâu tơring, pơlê kong kơdrâm tung kong pơlê. Hên tơdroăng ki hlo ôh tá tơniăn châ kuăn pơlê pơtối tơpui tối ƀă pâ thế môi tiah: hnoăng cheăng hbrâ mơdât kâ kơluâ dêi tơnêi têa ƀă kong pơlê, hnoăng cheăng hbrâ mơdât xiăn pâm tung rơpŏng, tơdroăng khăm pơlât, tơdroăng pêi pro mâu tơdroăng pơkâ tơnêi têa, kơxô̆ liăn ‘no cheăng tơdjuôm, troăng prôk mot tung kơpong, rak tơniăn rêh ối pơlê pơla ƀă hên ki ê.

Kuăn pơlê Lâm Đồng kôm plâ măng pro hlá mơ-éa hbru ăm hnoăng rak xúa tơnêi a tíu pêi cheăng môi péa a kong pơlê

Kuăn pơlê kong pơlê Lâm Đồng malối tơmâng ngăn khât troh mâu troăng hơlâ pêi pro kơdroh kơtiê krá ton, mâu tơdroăng ‘na têa krúa a thôn pơlê, rak ngăn kong, chiâ xo tơmeăm khoăng tung kơdâm tơnêi, tŏng kum khu mơdró kâ ƀă kuăn pơlê pêi chiâk deăng tơƀrê tung cheăng kâ, ‘mâi rơnêu yă tê phon rơvât, pơkeăng xúa tung pêi chiâk deăng ki ôh tá dâi lĕm. Môi tơdroăng ki kal châ kuăn pơlê tối mê cho tơdroăng ki hbru ăm hnoăng rak xúa tơnêi rôh apoăng ối tơvâ tơvân, pro ton.

Kuăn pơlê pơtối pâ thế Khu kăn Kuô̆k hô̆i Lâm Đồng hên tơdroăng ki ôh tá tơniăn

Khu kăn kuô̆k hô̆i kong pơlê Lâm Đồng mơdoh hên chôu tơpui tơno, tơbleăng mâu tơdroăng ki kal, tơdrêng a mê hlối tơmâng xo, chêh tơkŭm mâu rơkong ki tơpui tối, pâ thế dêi kuăn pơlê.

VOV Tây Nguyên/Tơplôu: Katarina Nga