VOV4.Xơ Đăng - Vi ƀan pơkuâ Kuô̆k hô̆i hiăng pơkâ po Rôh hôp má 3, Kuô̆k hô̆i hneăng 15, po a kơxo hâi lơ 23/5 ƀă tiô tối hdrối kô mơgêi a hâi lơ 17/6/2022. Tung pơla hdrối nah, Khu kăn Kuô̆k hô̆i mâu kong pơlê tung kơpong Tây Nguyên ai hên rôh trâm mâ kuăn pơlê vâ tơmâng mâu rơkong tơpui tối, pâ thế pơtroh ăm Hneăng hôp rôh má 3 dêi Kuô̆k hô̆i.

Mơ’nui khế 4 kố nah, pôa Phan Đình Trạc, Ngế cheăng tung khu xiâm kal kí, Kăn hnê ngăn Đảng, Ngế pơkuâ khu cheăng kal kí xiâm tơnêi têa rơtế ƀă mâu kăn Kuô̆k hô̆i dêi kong pơlê Lâm Đồng hiăng ai rôh trâm mâ kuăn pơlê a cheăm Ka Đô, tơring Đơn Dương. Akố, kuăn pơlê tối ƀă pâ thế troh Khu kăn Kuô̆k hô̆i kong pơlê Lâm Đồng hên tơdroăng ki xơpá, tơvâ tơvân châ kong pơlê, tơring ƀă Tíu xiâm tơnêi têa tơmâng vâ tah ki xơpá.

Tơdroăng châ kuăn pơlê tơmâng hên cho yă tơmeăm rế to kơnâ. Tung mê, yă phon rơvât xua tung pêi chiâk deăng kơdrâ to kơnâ, tung pơla mê yă tơmeăm pê lo ing chiâk deăng ôh tá tơniăn, pro kuăn pơlê ki pêi chiâk a kơpong pêt kơchâi trâm hên xơpá. Pôa Phan Tùng Châu, ngế kuăn pơlê ối a thôn Nghiã Hiệp 2, cheăm Ka Đô, tối:

“Nôkố yă phon rơvât tơmeăm xúa ‘na chiâk deăng yă tê kơnâ ‘nâng, môi tiah môi kơxâk phon vâi tê yă 1 rơtuh 350 rơpâu liăn  tung môi kơxâk, hdrối nah yă tê bú 950 rơpâu liăn tê môi kơxâk, tung pơla mê tơmeăm pin pê lo môi tiah mâu kơchâi, plâi pôm tŭm túa akố tê xuân ối yă ki ton, todroăng tê ôh tá tơniăn. Pâ thế khu râ kăn pro ti lâi vâ yă phon rơvât akố châ chu iâ vâ kuăn pơlê ngin châ rôe’’.

Pôa Phan Đình Trạc, Ngế cheăng tung tíu xiâm kal kí trâm mâ kuăn pơlê a tơring Đơn Dương, Lâm Đồng

A rôh trâm mâ, teăng mâ khu kăn kong pơlê Lâm Đồng, pôa Phan Đình Trạc, Ngế pơkuâ khu cheăng kal kí xiâm tơnêi têa tối, tơmâng xo mâu tơdroăng hnê tối, pâ thế dêi kuăn pơlê. Khu kăn Kuô̆k hô̆i kong pơlê kô tơkŭm tâi tâng, pơtroh ăm mâu kơ koan khu râ pơkuâ cheăng pâ thế pơxâu phak, krê to mâu tơdroăng ôh tá xê hnoăng tơná pơkuâ, khu kăn ai tối tơbleăng ăm Kuô̆k hô̆i tung rôh hôp la ngiâ.

“Tâi tâng mâu tơmeăm khoăng mơjiâng pro drô troăng tung tơring, kong pơlê, cheăm, thôn xuân vâ pro pơxúa ăm kuăn pơlê ƀă ăm kuăn pơlê châ xúa. Púi vâ kuăn pơlê hlê ƀă tối ki xơpá ƀă rêm râ mâu kăn. Tơkŭm mâu tơdroăng hnê tối mê cho tối trâm mâ pơla mâu kăn ƀă kuăn pơlê tung mâu tôh tơrŭm pêi pro. Á pâ thế mâu kăn tơring, mâu kăn kong pơlê ƀă tá mâu kăn pơkuâ hnê mơhno dêi cheăm séa ngăn nếo pơkâ dêi tơná séa ngăn môi tiah lâi, ăm tơ-tro ƀă tơ’lêi hlâu ăm kuăn pơlê tâ nếo’’.

Kuăn pơlê Dak Lak pâ thế hên tơdroăng troh rôh hôp má 3

Mơ’nui khế 4 kố nah, Khu kăn Kuô̆k hô̆i kong pơlê Dak Lak xuân hiăng tơkŭm po hneăng hôp trâm mâ kuăn pơlê hdrối roh hôp má 3. Kuô̆k hô̆i hneăng 15. A mâu tíu trâm mâ, kuăn pơlê Dak Lak xuân pâ thế Kuô̆k hô̆i, Chin phuh kal pơtối mơdêk tơbleăng pêi tơ-brê mâu tơdroăng hbrâ mơdât pơreăng COVID-19, la ƀă tơdroăng ‘mâi mơnhông cheăng kâ rêh ối tung kong pơlê; ai troăng rơhlâ pơkâ tơtro tâ  nếo vâ tơniăn yă, tơniăn tơdroăng tê mơdró ƀă kum kơdroh tah ki xơpá tung pêi chiâk, tê mơdró dêi khu mơdró ƀă kuăn pơlê.

Tô tuăn tơdroăng ‘na yă tơnêi to kơnâ, pro hên ngế chiâng tê dêi tơnêi tung pơla hdrối kô nah a mâu kơpong ki vâ tơbleăng pêi tơdroăng tơkêa bro ki kân a pơlê kong kơdrâm {uôn Ma Thuột ƀă mâu tơring ki achê, pôa Bùi Minh Bảo, kuăn pơlê thôn 2 A. cheăm Ea Mnang, tơring Čư Mgar tối:  

“Ki hdrối thế tơbleăng pơkâ dêi tơrêm kong pơlê, tơring, tơrêm khu vâ tơniăn xuân môi tiah tơdroăng séa ngăn dêi kuăn pơlê vâ ví ki vâi hmôu pơtối ôh tá tro pơkâ dêi mâu kơ koan khu râ pơkuâ cheăng. ‘Na tơdroăng púi vâ ki khât, kuăn pơlê vâ pêi chiâk la nôkố mâu khu ‘no liăn cheăng vâi mot cheăng ki khât gá vâi lôi tơnêi tê kơtê. Mâu ngế ki kal tơnêi khât ôh tá ai tơnêi, mâu ngế ki ôh tá kal tơnêi tí tăng rôe xo tơnêi hên hĭn, mơ’nhiê hên hĭn tơmeăm khoăng. Xua mê, pâ thế mâu kơ koan khu râ pơkuâ cheăng pơkâ mâu luât ki vâ mơdât mâu tơdroăng ki lơ tơkum tơnêi nôkố vâ tơniăn ăm kong pơlê ƀă tơnêi têa’’.

A hneăng hôp, mâu kuăn pơlê hiăng tơmâng ƀă tối hên tơdroăng ki tơdjâk troh ‘mâi mơnhông cheăng kâ-rêh ối pơlê pơla, pơkâ mâu troăng rơhlâ pêi pro tơtro tâ vâ tơniăn yă, tơniăn tơdroăng tê mơdró ƀă kơjo kum tah lối tơdroăng xơpá tung pêi chiâk deăng tê mơdró dêi Khu mơdró ƀă kuăn pơlê klêi kơ’nâi tơdjâk pơreăng COVID-19. Pôa Lê Văn Lập, kăn pơlê a thôn 3, cheăm Ea Mnang, tơring Čư Mgar pâ thế:

“Drêng pơreăng COVID 19 tâ tú ƀă klêi COVID-19 mê tơdroăng rêh ối dêi kuăn pơlê trâm hên xơpá. Pakĭng mê, ki xơpá  tơvâ tơvân hên yă tê phon rơvât to kơnâ, mê xuân cho môi tơdroăng ki pro pá khât ăm kuăn pơlê. Má 3, yă tơmeăm pêi lo ing chiâk deăng tê rơpâ ôh tá bê vâ hrê kơxô̆ liăn ki mê. Pâ thế ai pơkâ troăng rơhlâ pro ti lâi vâ mơnhông kuăn pơlê. Hngêi rak liăn thế pro tơ’lêi hlâu kum kuăn pơlê châ mung liăn tơ’lêi tâ vâ kuăn pơlê pơtối mơ-eăm mơnhông tung rêh ối’’.

Pakĭng mê, kuăn pơlê Dak Lak xuân pâ thế rêm râ, mâu kơvâ cheăng kal pơtối pro tơ’lêi hlâu ahdrối ‘na tăng cheăng pêi, mung liăn  mơnhông cheăng kâ ăm mâu ki pêi chiâk a kong pơlê; tơmâng khât ‘no liăn cheăng mơjiâng tơmeăm khoăng, pro troăng kân tung kơphô̆ ƀă mâu cheăm xua nôkố ai mâu troăng a mâu tíu ki ‘nâ hiăng tơ’nhiê ó, thế tối tro tơ-brê tơdroăng mơnhông cheăng kâ-rêh ối tung kong pơlê, malối a kơpong hdroâng kuăn ngo; séa ngăn ‘na liăn ‘no mơjiâng tơmeăm khoăng tơnêi têa ƀă tơdroăng tơbleăng rôe tơmeăm xuá tung khăm pơlât ƀă tung hnê hriâm.

VOV Tây Nguyên chêh

Gương tơplôu ƀă tơbleăng