VOV4.Xơ Đăng - Klêi kơ’nâi mơgêi Hneăng hôp má 3, Kuô̆k hô̆i hneăng má 15, khu kăn Kuô̆k hô̆i mâu kong pơlê tung kơpong Tây Nguyên hiăng tơkŭm trâm mâ kuăn pơlê.

A Lâm Đồng, pôa Phan Đình Trạc, Ngế cheăng tung Khu xiâm kal kí, Kăn pơkuâ hnê ngăn Đảng tơnêi têa, Ngế xiâm hnê mơhno tí tăng ‘nâi plĕng tơdroăng kal tơnêi têa rơtế ƀă mâu kăn Kuô̆k hô̆i kong pơlê Lâm Đồng, hiăng trâm mâ kuăn pơlê a cheăm Đại Lào, pơlê kong kơdrâm Bảo Lộc ƀă cheăm Liên Đầm, tơring Di Linh.

A mâi tíu trâm mâ, kuăn pơlê tối phiu ro ƀă hâk suâ hlo tơdroăng hiăng klêi dêi rôh hôp má 3, malối Kuô̆k hô̆i hiăng mơdoh hên chôu tơpui tơno, tơbleăng hên tơdroăng kal. Pakĭng mê, kuăn pơlê pơtối pâ thế troh khu kăn  Kuô̆k hô̆i tíu pêi cheăng kong pơlê Lâm Đồng mâu tơdroăng nếo ‘nâi châ kuăn pơlê tơmâng vâ ‘nâi, tơdroăng tơleăng mơnhên.

Tung mê, tơpui hên má môi cho pơtối pêi pro tiô luât pơkâ  kơjo kum khu mơdró  ƀă mâu kuăn pơlê klêi kơơ’nâi ai pơreăng kân COVID-19; troăng rơhlâ rak tơniăn yă tê mâu tơmeăm ki kal môi tiah têa kơxăng, têa châu, phon rơvât; rak ngăn yă pơkâ nâp liăn, rôe pơkeăng tung khăm pơlât, tơdroăng pơkâ kơjo kum khăm, pơlât ƀă ƀaoh hiêm khăm pơlât; tơdroăng rak ngăn tơnêi, tơdroăng pro tơniăn tung mơjiâng, rak ngăn kong; tơmeăm khoăng tung kơdâm tơnêi; nhâ loăng kong; ‘na pro mâu  hlá mơ-éa ối tơvâ tơvân; ‘na troăng prôk tung thôn ối xơpá, ai hên tơdroăng ki tơ’lêi ôh tá tơniăn ƀă hên ki ê.

Pôa Phan Đình Trạc, Ngế xiâm tí tăng ‘nâi plĕng tơdroăng kal dêi tơnêi têa trâm mâ kuăn pơlê kong pơlê Lâm Đồng

Pôa Nguyễn Tri Phương, ối a thôn 3, cheăm Đại Lào, pơlê kong kơdrâm Bảo Lộc tối: 

‘’Kuăn pơlê ngin púi vâ, kơpong ki lâi kal pơkâ hdró mê pơkâ, kơpong ki lâi ôh tá kal pơkâ hdró thế xing xoăng ăm kuăn pơlê tơnêi vâ kuăn pơlê ai hlá mơ-éa khêi cho hlá mơ-éa xuá tơnêi, pro tơ’lêi hlâu ăm kuăn mơnhông vâ mơnhông cheăng kâ. Drêng kal vâ mung xêh liăn a hngêi rak liăn, lơ klâ xoăng tơnêi ăm dêi kuăn ‘nĕng hiá ‘lo. Kuăn pơlê ngin ai tối ăm râ kơpêng tiah mê ’’.

Tơdrêng amê, kuăn pơlê xuân pâ thế mơdêk rơdêi tâ nếo tơdroăng hbrâ mơdât kâ kơluâ, pơxâu kơtăng mâu ngế ki pro xôi; rĕng tơbleăng mơjiâng pro troăng kân Dầu Giây- Tân Phú- Liên Khương.

Teăng mâ khu Kăn Kuô̆k hô̆i tíu pêi cheăng kong pơlê Lâm Đồng, pôa Phan Đình Trạc, Ngế cheăng tung Khu xiâm kal kí, Kăn pơkuâ hnê ngăn Đảng tơnêi têa, Ngế xiâm hnê mơhno tí tăng ‘nâi plĕng tơdroăng kal tơnêi têa  hiăng tơmâng xo tơdroăng hnê khĕn pâ thế dêi kuăn pơlê ƀă tiâ tơdrêng mâu tơdroăng dêi râ kơpêng.

Krê tơdroăng hbrâ mơdât kâ kơluâ, pôa Phan Đình Trạc tối kô “ôh tá ai kơpong mơdât, ôh tá ai ki ê’’ ƀă kô pơtối pêi kơtăng tâng tung la ngiâ.

“ Ing apoăng hneăng má 13 troh nôkố, nếo lối môi hơnăm tơdế tê la ngin hiăng pơxâu phâk 45 ngế kăn ƀô̆ cheăng tung tíu xiâm ki pêi hnoăng cheăng rak ngăn. La hâi la lâi pin mơ’no tah tơdrêng môi hdroh 2 ngế cheăng tung tíu xiâm ƀă tơleăng pơxâu phâk, hlối rup kroăng.

Mê cho tơdroăng cheăng hbrâ mơdât kâ kơluâ hiăng pro rơdêi khât. Thế khên hlối tơnôu, pêi hlâ rêh dêi mâu ngế ki mê, mê pin nếo châ pro ti mê. La ga, kô pơtối pro rơdêi kơtăng tâ nếo ’’.

Kuăn pơlê Lâm Đồng pâ tối hên tơdroăng ki kuăn pơlê kal vâ ’nâi plĕng a kong pơlê

Rôh kố, Khu kăn Kuô̆k hô̆i tíu pêi cheăng Lâm Đồng hiăng diâp ăm 40 kơxu tơmeăm ăm mâu rơpŏng kơtiê, diâp ăm 1 rơpâu kơthung têa tôu ro xua Grup TH True tŏng kum ăm hok tro kơtiê 2 to cheăm Đại Lào ƀă Liên Đầm.

Xuân tung măng tĭng hdrối, Khu kăn Kuô̆k hô̆i kong pơlê Gia Lai hiăng trâm mâ kuăn pơlê a mâu cheăm bêng dêi tơring Kông Chro, Ia Pa, ‘Mang Yang ƀă pơlê kong krâm Ayun Pa. Mâu tơdroăng “ôh tá tơniăn dế nôkố’’ môi tiah yă têa châu têa kơxăng to kơnâ, tơmeăm xúa tung pêi chiâk phon rơvât to kơnâ, la tơdroăng tê tơmeăm pêi lo ing chiâk deăng trâm hên xơpá ôh tá châ tê; hlối hrá pro ăm kuăn pơlê hlá mơ-éa khêi xúa tơnêi; tăng cheăng pêi ăm kuăn pơlê a mâu thôn, pơlê; ‘no liăn kâng rơchôa vâ ai têa tôh báu loăng plâi... hiăng châ kuăn pơlê tối cho mâu kăn Kuô̆k hô̆i.

Mê cho, pôa Nguyễn Đức Hướng, Kăn phŏ hnê ngăn Hô̆i đong tơring Krông Chro pâ thế: “Xua tơdjâk hên tơdroăng mê yă têa châu têa kơxăng, phon rơvât chiâng to kơnâ luâ râ, chiâng tơdjâk pá troh tơdroăng rêh ối cheăng kâ dêi kuăn pơlê. Pâ Kuô̆k hô̆i, Chin phuh séa ngăn vâ ai pơkâ rak tơniăn, ‘mâi chu kơdroh yă têa châu têa kơxăng, phon rơvât loăng plâi tung la ngiâ vâ pro tơ’lêi hlâu ăm kuăn pơlê châ mơnhông pêi chiâk, malối a mâu cheăm hơngế hngo kơtiê xơpá dêi tơring”.

A tơring ‘Mang Yang, kuăn pơlê pâ Kuô̆k hô̆i thế pơkâ troăng rơhlâ mơdêk châ tê tơmeăm kuăn pơlê pêi lo ing chiâk deăng, malối cho mâu tơmeăm ki xiâm kong pơlê dế pêi hên, vâ ví tơdroăng ‘’pê lo hên kế tơmeăm, la tê ôh tá ai yă”, môi tiah mâu hơnăm hdrối. Pakĭng mê, kuăn pơlê tối tiah kố mâu tơdroăng ‘na tơnêi, troăng prôk, tơdroăng rak ngăn ối hên ki tơvâ tơvân; yă tê phon to kơnâ tung pơla mê phon ki ôh tá xê khât hâi châ mơdât ối lôi pro tơdjâk kân troh tơdroăng pêi chiâk dêi kuăn pơlê.

VOV Tây Nguyên

Gương tơplôu ƀă tơbleăng