Khu kăn Kuô̆k hô̆i kong pơlê Dak Nông hiăng po 2 rôh trâm mâ kuăn pơlê a mâu cheăm Trường Xuân (tơring Dak Song), cheăm Dak Som (tơring Dak Glong). A hneăng hôp hdrối kố nah, Kuô̆k hô̆i hiăng tơbleăng pơkâ ‘na troăng ‘no liăn bro troăng prôk kân tơdrăng Gia Nghĩa – Chơn Thành ƀă ki xŏn dâng 130km, tâi tâng kơlo liăn ‘no cho 25.540 rơtal liăn.

Hên kuăn pơlê tối phiu ro, mơnhên tối khât hnoăng cheăng dêi Khu kăn Kuô̆k hô̆i kong pơlê Dak Nông hiăng ăm mâu tơdroăng ki púi vâ dêi mâu kuăn pơlê a rôh hôp Kuô̆k hô̆i ‘na mơjiâng bro troăng kân.

Kuăn pơlê tơkôm khât a tơdroăng tơkêa bro troăng rĕng châ tơbleăng, vâ troăng kân rĕng châ bro klêi, tiô tơdroăng púi vâ prôk lăm, ƀă kum kuăn pơlê tơ’lêi hlâu tung mâu tơdroăng lăm khăm pơlât a râ kơpêng.

Tơbleăng ‘na tơdroăng kố, pôa Ngô Thanh Danh, Kăn pơkuâ hnê ngăn Đảng, Ngế pơkuâ khu kăn Kuô̆k hô̆i kong pơlê Dak Nông ăm ‘nâi, ƀă hiâm mơno pôu râng hnoăng cheăng dêi péa to kong pơlê Dak Nông ƀă Bình Phước, ing hên rôh pâ thế, pơkâ mơ’no, Chin phuh hiăng ‘mâi rơnêu tơdroăng ki pêi pro tơdroăng tơkêa troăng kân Gia Nghĩa (Dak Nông) – Chơn Thành (Bình Phước) kô bro ing mơ’nui hơnăm 2024, ƀă kô bro klêi a hơnăm 2026, ƀă ăm rơxế kơtâu a hơnăm 2027. Kong pơlê dế pơtối pâ thế pro troăng kân Gia Nghĩa - Ƀuôn Ma Thuột vâ po rơdâ troăng kân gum Tây Nguyên châ mơnhông pêi cheăng kâ:

“Kuăn pơlê pâ thế po rơdâ Troăng kân 14 ing Gia Nghĩa troh kông 20, mê troăng kân kố ngin xuân hiăng pâ thế. La klêi kơ’nâi pơxiâm bro troăng kân Gia Nghĩa – Chơn Thành, mê ngin kô pơtối pâ thế ‘no liăn bro troăng kân Gia Nghĩa - Ƀuôn Ma Thuột, mơni tung hneăng kơ’nâi. Ƀă troăng prôk kố cho kal troăng prôk tơkâ luâ Tây Nguyên mê nếo châ mơnhông. Nôkố rơxế kơtâu kơtâ luâ kong pơlê Dak Nông gá hên, rêm hâi dâng 2.500 toăng rơxế tơkâ luâ môi tíu, ƀă mâu hâi leh hâi pơtê mê rơxế kơtâu a troăng kố tâk 2 – 3 xôh”.

A mâu rôh trâm mâ kuăn pơlê, kuăn pơlê a mâu cheăm, tơring pơtối tối tơbleăng ƀă mâu kăn Kuô̆k hô̆i hên tơdroăng ki ôh tá tơniăn. Kuăn pơlê tơring Phú Thiện, kong pơlê Gia Lai tối ‘na hlá mơ-éa chêh bro tung kơvâ tơnêi tơníu ối tơvâ tơvân. Kuăn pơlê Hoàng Thanh Tùng, Tôh kơphô̆ 3, Pơlê kân Phú Thiện ăm ‘nâi:

“Hên rôh kuăn pơlê nâp hồ sơ chêh inâi tơdroăng ki hơ’lêh ăm ƀơrô cheăng chêh inâi tơnêi tơníu tơring vâ bro hngêi păn chêm pơlêng têa kơxĭ. Ƀơrô cheăng chêh inâi tơnêi tơníu tơdah xo hồ sơ, hiăng nâp tro pơkâ, la pơrá châ xo tơdroăng tiâ mơnhên athế tơkôm mâu tơdroăng tơpui tối dêi Ƀơrô cheăng chêh inâi tơnêi tơníu kong pơlê. Troh nôkố mê ai mâu hồ sơ hiăng nâp châ 5 khế kố, la xuân ôh tá hlo tiâ. Tiah lâi ôh tá pơtroh ăm kuăn pơlê tiô pơkâ, mê athế tơkôm rơkong tiâ? Hôm chiâng pơtroh ăm ƀơrô cheăng chêh inâi tơnêi tơníu tơring ăm tơring pơkuâ ngăn ti lâi ăm gá tro tâ”.

Kuăn pơlê Pơlê kong kơdrâm Bảo Lộc, kong pơlê Lâm Đồng tối, tơdroăng ki túa pơkâ kế tơmeăm tung kơdâm tơnêi ối tơvât ƀă túa pơkâ ki ê dêi tơnêi têa ƀă kong pơlê. Tơdroăng kố bro chiâng ai hên tơdroăng ki tơvâ tơvân ‘na luât, cho tơdroăng ki pro pá tung tơbleăng pêi pro mâu kế tơmeăm ki kal dêi kong pơlê. Jâ Phạm Thị Hường, a bêng Lộc Tiến, Pơlê kong kơdrâm Bảo Lộc ăm ‘nâi, tâi tâng 2 ha tơnêi dêi rơpŏng jâ pơrá trâm tung túa pơkâ mê ôh tá chiâng vâ kok a hngêi rak liăn vâ mung liăn pêi cheăng kâ, tơdroăng ki ‘mêng rơnêu hngêi ối, klâ tơnêi ăm mâu vâi kuăn ‘nĕng rơtế ƀă hên tơdroăng cheăng ki ê a tơdjâk troh pơrá chiâng tro pơtê. Tơdroăng rêh ối rơpŏng hngê dế trâm pá khât xua tơvâ tung túa pơkâ:

“Ƀă rơpŏng á mê gá ôh tá tơniăn khât. Á ối akố hiăng châ to lâi chât hơnăm kố, nôkố pâ pơhlêh tơdroăng ki vâ xúa tơnêi xuân ôh tá chiâng, bro hngêi ăm kuăn ‘nĕng xuân ôh tá chiâng mê rơpŏng gá pá puât khât ‘na cheăng kâ. Rơpŏng á xuân môi tiah rơpŏng vâi krâ nhŏng o tung pơlê kong kơdrâm xuân pâ thế ‘na túa pơkâ tăng ‘nâi kế tơmeăm kố, tâng chiâng pêi mê pêi hlối, ƀă tâng ôh tá chiâng mê tŏng kum hlối ăm ngin, mê nôkố vâi krâ nhŏng o ôh ti ‘nâi bro tiah lâi!”.

Pơtối tơmâng xo mâu rơkong tơpui tối, pâ thế, mâu kăn Kuô̆k hô̆i hiăng pơkâ thế kăn teăng mâ mâu khu râ, kơvâ cheăng ƀă kăn pơkuâ mâu kong pơlê tiâ mơnhên tơdrêng hlối mâu rơkong kơ-êng. Ƀă mâu tơdroăng ki ối tung hnoăng pơkuâ dêi khu xiâm, kơvâ cheăng ƀă Kuô̆k hô̆i, mê pơtối tơkŭm vâ pơtroh ăm rêm râ ki ai hnoăng pơkuâ pơkâ tơleăng.