Khu kăn Kuô̆k hô̆i kong pơlê Gia Lai hiăng ai rôh trâm mâ kuăn pơlê a mâu tơring Phú Thiện, Đức Cơ, Čư̆ Pah, Đăk Đoa, Kƀang, Čư Prông, Đăk Pơ ƀă Ia Grai. A mâu rôh trâm mâ kuăn pơlê, kuăn pơlê kong pơlê Gia Lai tối phiu ro hlo hiăng klêi tơniăn dêi rôh hôp má 4 Kuô̆k hô̆i hneăng 15. Kuăn pơlê xuân khĕn kơdeăn tơdroăng cheăng pêi dêi mâu kăn Kuô̆k hô̆i kong pơlê Gia Lai hiăng veăng hnê tối hên mâu tơdroăng ki kal a ki tơƀrê dêi rôh hôp  mê.

Kuăn pơlê tối hên mâu tơdroăng ki u ối hâi pêi pro ki pro hâi teăm tro a kong pơlê, mê cho thế tơmâng ‘no liăn cheăng, ‘mâi rơnêu pro mâu tíu pêi cheăng tơmeăm khoăng a thôn pơlê, malối cho troăng prôk. Tơdroăng vâi hdrêng tro klâk têa rế hlo hên tung mâu hơnăm hdrối kố nah, ôh tá ai plông xah hêi ăm vâi hdrêng a kơpong tung thôn, kơpong hdroâng kuăn ngo. A rôh trâm mâ, hên kuăn pơlê xuân pâ thế mâu khu râ, kơvâ cheăng tăng troăng rơhlâ pro tơniăn ‘na yă tê phon, tơmeăm xúa tung pêi chiâk vâ kuăn pơlê hmiân tuăn pêi chiâk deăng.

Pôa Lê Văn Trung ối a thôn 3, cheăm Ia Tô, tơring Ia Grai tối:

“Tơdroăng ‘na yă tơmeăm ôh tá tơniăn, má péa, cho phon kơnâ ‘nâng, kuăn pơlê rôe phon vâ rơvât dêi kơphế ôh tá châ xo rơkâ, la hiăng tro pêt to lâi hơnăm kố, ai to lâi xuân hiăng ‘no rôe phân pơ tâi. Hdrối nah, 600 rơpâu liăn 1 kơxâk, nôkố hiăng to vâ chê 1 rơtuh liăn 1 kơxâk hâi teăm riân kơxô̆ liăn ‘no mơhá ăm vâi krí plâi ƀă hên ki ê… Kuăn pơlê xuân púi vâ Kuŏk hô̆i, Chin phuh séa ngăn vâ pro tơdâng tơ’mô yă tơmeăm pêi lo ing chiâk deăng ƀă phon rơvât”.

A kong pơlê Dak Nông, Khu kăn Kuô̆k hô̆i kong pơlê kố hiăng trâm mâ kuăn pơlê a mâu tơring Dak R’lâp, Dak Mil, Čư Jút ƀă pơlê kong kơdrâm Gia Nghĩa. Kuăn pơlê Dak Nông khĕn kơdeăn khât hnoăng cheăng pêi dêi mâu kăn kong pơlê drêng veăng tơpui tơno, veăng hnê tối mâu tơdroăng ƀă kơ- êng hlối mâu kăn a hâi hôp Kuô̆k hô̆i. Kuăn pơlê a Dak Nông xuân pâ thế hên tơdroăng  ‘na ‘mâi hơ’lêh tơdroăng pro hlá mơ-éa tung tơdroăng ‘na tơnêi, tơdroăng cheăng ‘na pơkâ xúa tơnêi, tơ’noăng ‘no liăn mơjiâng tơmeăm khoăng a thôn pơlê, ‘mâi pro ăm krúa lĕm hyôh kong prâi.

Tung cheăng hbrâ mơdât kâ kơluâ, kuăn pơlê púi vâ Dak Nông kal mơdêk rơdêi tâ nếo vâ tơleăng mơnhên klêi mâu tơdroăng ki hâi pêi pro ki hlo ôh tá tơniăn a kong pơlê. Môi tiah a cheăm Dak Nia, pơlê kong kơdrâm Gia Nghĩa, hên kuăn pơlê thế rĕng mơnhên hnoăng cheăng ƀă tơkâ luâ xơpá tơdroăng ‘na troăng prôk vâ mot a xí Liêng Nung ki hiăng tro tơhnâp trâu, pro klâ troăng ôh tá ai troăng prôk.

Kuăn pơlê Nguyễn Đình Thi, ối a bon Sê-rê-u, cheăm Dak Nia tối:

“Pâ thế ăm kuăn pơlê ngin châ ‘nâi klêi mơjiâng khu hnê mơhno cheăng hbrâ mơdât kâ kơluâ dêi kong pơlê mê troh nôkố Khu ki mê hiăng ‘mot tung tơdroăng tơleăng mơnhên bbă hôm hâi tơmâng to lâi tơdroăng ‘na kâ kơluâ a kong pơlê? Nôkố kuăn pơlê vâ chê 30 rơtal liăn tơnêi têa châ kum ‘no mơjiâng pro kơpong ôm hyô Liêng Nung tá liăn pro troăng nôkố pá hlo lo klâi, akố tíu ôm hyô kuăn pơlê dế mơjiâng pro’’.

Xuân tung măng tĭng hdrối, pôa Phan Đình Trạc, Ngế cheăng tung khu xiâm Kal kí, Kăn hnê ngăn khu xiâm Đảng, Ngế kăn tung tíu khu rơtế ƀă Khu kăn Kuô̆k hô̆i kong pơlê Lâm Đồng hiăng trâm mâ kuăn pơlê a cheăm Dà Nhim, tơring Lạc Dương.

A rôh trâm mâ, kuăn pơlê cheăm Dà Nhim, tơring Lạc Dương hiăng tối phiu ro ‘na mâu tơdroăng tơpui rơhéa a rôh hôp má 4 dêi Kuô̆k hô̆i hneăng 15, malối mâu luât, Pơkâ ki kal hiăng châ tơpui. Hlối pơtối pâ thế mâu kăn Kuô̆k hô̆i kong pơlê Lâm Đồng mâu tơdroăng kal pêi tơdâng ƀă pơkâ thế mâu tơring kong pơlê ƀă Khu xiâm kal rĕng tơmâng, séa ngăn tơleăng mơnhên.

Tung mê, ai tơdroăng ‘na troăng kân 27C hiăn g tơ’nhiê, đi đo tro tơhnâp, hên tíu  prôk ví rơ-iô, ôh tá tơniăn; thâ séa ngăn, rĕng pro hlá mơ-éa mơnhên xúa tơnêi ăm kuăn pơlê; ‘na tơdroăng kơjo kum ăm mâu kăn ƀô̆ ki ôh tá hmâ pơkuâ cheăng ra cheăm ki kâ liăn lối iâ râ; tơleăng mơnhên ăm mung liăn vâ pêi cheăng kâ. Kăn hnê ngăn Vi ƀan kong pơlê Lâm Đồng, Vi ƀan tơring Lạc Dương xuân tối mâu tơdroăng, tiâ mơnhên mâu tơdroăng ki lâi cho hnoăng cheăng pêi dêi tơná ki kuăn pơlê cheăm Dà Nhim tối.

Pôa Phan Đình Trạc, Ngế cheăng tung Khu xiâm Đảng tơmâng xo mâu tơdroăng kuăn pơlê veăng tối ƀă tơkŭm tâi tâng, tối tơbleăng a Kuô̆k hô̆i tung mâu rôh hôp la ngiâ.  Tung mê, pâ thế ‘no liăn cheăng po rơdâ, ‘mâi rơnêu troăng kân 27C cho tơdroăng kuăn pơlê tối ki ai pơxúa tơtro ƀă troăng rơhlâ mơnhông mơdêk kơpong Tây Nguyên dêi Khu xiâm kal kí.

Pôa Phan Đình Trạc, tối:

“’ ‘Na troăng kân 27C, á hlo Khu kăn Kuô̆k hô̆i pin kal thế ai roh pêi cheăng ƀă Khu xiâm ngăn troăng prôk  vâ rơtế ƀă kong pơlê tah ki xơpá môi tiah mê. Kố xuân cho tơdroăng tung troăng rơhlâ pêi tơdjuôm dêi khu xiâm kal kí ‘na Pơkâ kơpong Tây Nguyên. Tung mê, môi troăng rơhlâ ki kal cho tơdjêp ƀă mâu kơpong ƀă dêi rơpó, kơpong Tây Nguyên ƀă mâu kơpong a peăng mâ lâi lo, ƀă Pơlê kong kân Hồ Chí Minh, ƀă Khánh Hòa ƀă hía hé.