A rôh hôp má 4, Hô̆i đong hnê ngăn kong pơlê Kon Tum hneăng 12 (hneăng hơnăm 2021-2026), tối tơdroăng cheăng pêi tung hơnăm 2022 ăm hlo, hên tơdroăng pơkâ apoăng pêi ôh tá ai môi tiah hiăng  pơkâ. Mê cho, hơnăm 2022 ki tâk dêi tơmeăm pê lo kong pơlê Kon Tum châ 9,5% tâng vâ pơchông ƀă hơnăm 2021. Tâi tâng tơmeăm pê lo riên rêm ngế tâk sap vâ chê 47 rơtuh liăn troh 52 rơtuh liăn. Xo liăn ngân ăm tơnêi têa châ 4.000 rơtal liăn, châ 100% tiô tơdroăng pơcháu. Tung hơnăm kong pơlê Kon Tum tơ’mot 19 tơdroăng tơkêa bro ‘no liăn cheăng ƀă tâi tâng kơxô̆ liăn chêh tơhrâ dâng 1.600 rơtal liăn.

Pakĭng tơdroăng ki hiăng châ pêi pro, ai 4 tơdroăng pơkâ pêi ki kal dêi kong pơlê Kon Tum ôh tá kâi pêi ai tiô tơdroăng hiăng pơkâ hdrối, mê cho: Ki tâk dêi tâi tâng tơmeăm pêi lo ôh tá ai tiô tơdroăng Pơkâ tâk sap 10% tơngi klêng; Hrê liăn ngân kong pơlê; xo liăn ki mung ‘no mơjiâng tơmeăm khoăng ƀă Mơjiâng thôn pơlê nếo xuân ôh tá ai tiô tơdroăng pơkâ hdrối.

Tơdrêng amê  tơdroăng ‘mâi hơ’lêh cheăng ‘na pro hlá mơ-éa, ‘nâi hơ’lêh tơdroăng ‘no liăn cheăng, mơdêk ivá tơbriât cheăng dêi kong pơlê hâi hlo tơƀrê klâi ôh; Tơdroăng chêl thiăn liăn, xua ‘mâi xĕn tơnêi tíu ƀă mâu tơdroăng tơkêa bro pêi ối hrá, iâ châ tơ’mot  khu ‘no liăn cheăng  ƀă hên ki ê.

Drêng tối tơbleăng a po rôh hôp, pôa Dương Văn Trang, Kăn hnê ngăn Đảng, Kăn hnê ngăn Hô̆i đong kong pơlê Kon Tum pơkâ thế mâu kăn tơkŭm mơnhên mâu tơdroăng ki hâi pêi pro, ki pro hâi tro vâ thế ‘nâi nhên troăng rơhlâ tơkâ luâ:

“Mâu kăn tơkum tơpui, tối mơnhên, mơhno a tơdroăng ki xơpá, ki tơvâ tơvân, ki hâi pêi, ki pêi hâi tro ƀă ki xiâm ing lâi, malối xiâm cho ing tơdroăng ôh tá vâ rĕng tơmâng kal thế tơkŭm pêi vâ tơkâ luâ tơdroăng pá, tah ki xơpá. Ing mê, ‘nâi nhên mâu troăng rơhlâ, tơdroăng cheăng vâ pêi, rak tơniăn tung pêi tro tiô mâu pơkâ, ‘na  pơkâ mơnhông mơdêk cheăng kâ rêh ối, liăn ngân, ‘no liăn cheăng dêi hơnăm 2023’’.

A rôh hôp mê, Hô̆i đong kong pơlê Kon Tum hneăng 12 hiăng séa ngăn, pơkâ 22 tơdroăng chêh tối tơbleăng ƀă 31 tơdroăng Pơkâ tơdroăng cheăng pêi xiâm ƀă hên tơdroăng kal ai tơdjâk kân troh tơdroăng rêh ối - pơlê pơla dêi kuăn pơlê tung kong pơlê.

Xuân tung măng tĭng hdrối, a roh hôp má 5, Hô̆i đong hnê ngăn kong pơlê Dak Lak hneăng 10, hneăng hơnăm 2021-2026, hên tơdroăng ki ôh tá tơniăn ‘na ối ‘ro ôh tá hlê tung tơdroăng pâ mung liăn vâ ‘no mơjiâng tơmeăm khoăng tơnêi têa, mơjiâng kơpong pêi chiâk deăng ai mah kơxô̆ kơpong pêt  vâ ai tơmeăm pêi lo châ tê ăm kong têa ê, hlối kum cheăng pêi ăm mâu droh rơtăm mâu hơnăm ối nếo  tiô tơdroăng hiăng tối hdrối:

Tối ’na tơdroăng pêi tiô pơkâ cheăng dêi hơnăm 2022, mâu kăn ai tối tiah kố, um kơchuâ mơhno ‘na cheăng kâ - rêh ối tung lâp kong pơlê Dak Lak hơnăm kố ai hên tíu ki tơƀrê. Mơhé ti mê, xo liăn ngân vâ ‘no mơjiâng tơmeăm khoăng tơnêi têa ối iâ (bú châ 29,5%), pơtối amê, cho pêi pro ‘mâi hơ’lêh tơ’nôm tơdroăng tơkêa bro hên hdrôh, ki tơbrê mâu tơmeăm khoăng hâi tơniăn hiăng tơdjâk troh ‘na tuăn loi dêi kuăn pơlê xuân môi tiah tơdroăng ‘mâi mơnhông cheăng kâ klêi pơreăng kân COVID-19. Xua mê, jâ Tô Thị Tâm, ối a tơring Ea Kar, pâ thế:

“’ ‘No liăn mơjiâng pro mâu tơdroăng tơkêa bro thế pêi lĕm krá. Ai mâu tơmeăm khoăng ki ‘nâ vâi kâ kơluâ iâ ing apoăng hơnăm troh mơ’nui hơnăm pêi tá  kâi klêi. Ki tơƀrê lĕm xuân ôh há, kal thế tơmâng ngăn khât vâ kuăn pơlê châ xúa mâu tơdroăng tơkêa bro ki vâi hâk vâ ai tuăn loi a mâu troăng rơhlâ luât pơkâ tŏng kum ‘no liăn cheăng thế tơtro’’.

Ƀă kơvâ pêi chiâk, mâu kăn Hô̆i đong kong pơlê pơkâ thế Dak Lak thế tơbleăng hên luât pơkâ, luât tŏng kum nhên vâ tŏng kum kuăn pơlê mơnhông pêi chiâk xúa kơmăi ki dâi lĕm, pro tơrŭm tơdrêng pơla khu mơdró ƀă kuăn pơlê ki pêi chiâk. Pakĭng mê, kal pơkâ nhên, mơjiâng  mah kơpong pêt mâu hdrê loăng plâi kâ, malối cho ƀă sầu riêng, vâ ví tơdroăng ki lơ ai hên mơngế pêt hdrê loăng kố, pro chiâng ai tơdroăng ki “Pêt klêi mê ko’’ drêng châ plâi hên la ôh tá ai yă, pêt hên luâ tâ mơngế vâ rôe.

Jâ Lại Thị Loan, Kăn hnê ngăn Khu pêi chiâk kong pơlê Dak Lak tối:

“Troăng rơhlâ ôh tá po rơdâ tơnêi pêt plâi sầu riêng mê kô tơkŭm hên á pêt thế rak ngăn krâu khât vâi ai plâi lĕm, mê pin kal thế pơkâ troăng rơhlâ môi tiah lâi, tâng ôh kuăn pơlê kô tơxup dêi rơpó pêt hên plâi sầu riêng. Tiô tối tơbleăng hdrối dêi mâu ki rơkê ối 5 hơnăm nếo plâi sầu riêng xua Sinuâ pêt, kô châ hên’’.

Pakĭng mê, mâu kăn xuân tối mâu tơdroăng ki dế ôh tá tơniăn dêi kong pơlê Dak Lak, môi tiah tăng cheăng pêi ăm mâu ngế ki vêh ing mâu kong pơlê peăng hdroh tơnêi têa xua tơdjâk dêi tơdroăng liăn ôh tá kơnâ, hên ngế chiâng ôh tá ai cheăng pêi; tơdroăng xoăng ƀiên chê̆ thế rak tơniăn tŭm kơxô̆ mơngế kăn bô̆, kŏng chức, viên chức ki pêi cheăng tung mâu tíu pêi cheăng dêi râ tơring; mơjiâng luât pơkâ tŏng kum, luât kơjo kum ăm mâu kăn ƀô̆ a râ cheăm; mơdêk kơxô̆ liăn pêi lo, tơdroăng rêh ối dêi mâu thái cô tơniăn vâ vâi hmiân tuăn pêi cheăng.

Xuân tung măng tĭng hdrối, hneăng hôp roh má 23, dêi khu kăn Hô̆i đong kong pơlê Dak Nông hneăng má 4 hiăng tơpui, séa ngăn, tơbleăng mâu hlá mơ-éa pơtroh, hlá mơ-éa chêh pơkâ ki pơtroh ăm rôh hôp má 5, Hô̆i đong kong pơlê hneăng má 4, hneăng hơnăm 2021-2026. Tung mê, hên hlá mơ-éa chêh pơtroh, hlá mơ-éa châ mâu kăn tơmâng ngăn, veăng hnê tối a tíu ki lâi hâi tro vâ drêng pơtroh ah châ môi tuăn.