VOV4.Xơ Đăng -  Măng tĭng hdrối, pôa Vương Đình Huệ, Kăn xiâm hnê ngăn Kuô̆k hô̆i ƀă hên Khu kăn Kuô̆k hô̆i a mâu kong pơlê hiăng trâm mâ kuăn pơlê hdrối vâ po hneăng hôp má 4, Kuô̆k hô̆i hneăng má 15 (tiô tối hdrối kô po a hâi lơ 20/10 la ngiâ). A mâu rôh trâm mâ, kuăn pơlê mâu kong pơlê hiăng tối, pâ thế hên tơdroăng ki kal, rơhêng vâ châ Kuô̆k hô̆i tơmâng, ai troăng pơkâ tŏng kum.

Khu kăn Kuô̆k hô̆i kong pơlê Dak Nông hiăng trâm mâ kuăn pơlê a mâu cheăm Nâm N’Jang, tơring Dak Song, cheăm Quảng Tâm, tơring Tuy Đức, cheăm Quảng Phú, tơring Krông Nô ƀă cheăm Quảng Sơn tơring Dak Glong, tơmâng kuăn pơlê tối. A mâu rôh trâm mâ, mâu kăn Kuô̆k hô̆i  a Dak Nông hiăng tối ‘na tơdroăng hôp roh má 4 Kuô̆k hô̆i hneăng 15 kô tơkŭm po tung khế 10 la ngiâ, kô séa ngăn hên tơdroăng kal, tơdroăng tơkêa Luât, tung mê, ai mâu luât ki tơdjâk troh tơdroăng tơkêa Luât môi tuăn kuăn pơlê a pơlê cheăm, Luât tơnêi tơníu ‘mâi hơ’lêh, Luât kring vế mơngế rôe xúa, Luât pêi cheăng tơrŭm.

Kuăn pơlê Dak Nông pâ, tối hên tơdroăng ki hlo ôh tá rơhéa a kong pơlê, ki hên cho mâu tơdroăng ối tơvâ tơvân ‘na tơnêi tíu, rak ngăn kong, ‘na hrá tơmâng tơdroăng tơleăng mơnhên klêi túa pro hlá mơ-éa a cheăm bêng. Kuăn pơlê xuân pâ thế Kuô̆k hô̆i pơkâ mâu luât tŏng kum ƀă mâu tơdroăng khăm pơlât, hnê hriâm; tơdroăng ‘no liăn mơjiâng tơmeăm khoăng troăng prôk, on tơhrik a mâu kơpong ki xơpá…

Kuăn pơlê Dak Nông vâ hluăn ing tơdroăng ‘’ko pêt- pêt ko’’

Malối tung kơvâ pêi chiâk deăng, kuăn pơlê pâ thế pơkâ troăng rơhlâ kum kuăn pơlê hluăn ing tơdroăng ‘’tơmeăm pêi lo hên la tê ôh tá  ai yă’’, ‘’Ko –pêt - pêt - ko’’.

Pôa Lê Quang Phi, kuăn pơlê ối a cheăm Nâm N’Jang, tơring Dak Song, cho tơring ki ai hên tiu dêi kong pơlê Dak Nông tối:

“Hơnăm 2018 tiu ôh tá ai yă ƀă hlối hlâ hên hĭn ing mê troh nôkố kuăn pơlê ngin hiăng pơ’lêh mâu hdrê loăng plâi ki ê, ki hên cho mâu hdrê loăng plâi kâ. Mê kong pơlê Dak Nông xuân tơbleăng hên troăng rơhlâ vâ pêt,  malối loăng ƀơr, troh nôkố  plâi ƀơr hên la ôh tá ai ngế rôe, nôkố pơ’lêh pêt hên túa loăng.

 Á xuân púi vâ pro ti lâi kô ai troăng rơhlâ vâ kong pơlê Dak Nông mơjiâng inâi ‘na túa plâi kâ ki lâi ‘lo ki pơxúa ƀă kơnâ liăn tâ.  Ƀă mâu hơnăm achê kố ngin xuân tơmâng troh hên tơdroăng tối ‘na mơjiâng pro hngêi kơmăi uâ tơmeăm pêi lo ing chiâk deăng, la ki khât gá tung kong pơlê hâi teăm ai hngêi kơmăi uâ pơliê ki lâi ôh’’.  

Xuân tung măng tĭng hdrối, pôa Vương Đình Huệ, Kăn xiâm hnê ngăn Kuô̆k hô̆i ƀă Khu kăn Kuô̆k hô̆i kong pơlê Hải Phòng hiăng trâm mâ kuăn pơlê a tơring Thủy Nguyên, Pơlê kong kân Hải Phòng hdrối rôh hôp má 4, Kuô̆k hô̆i hneăng 15. A mâu rôh trâm mâ, mâu kuăn pơlê dêi tơring Thủy Nguyên, pơlê kong kân Hải Phòng tối loi khât, hâk phiu hlo tơdroăng mơnhông mơdêk dêi tơnêi têa;  hnoăng pơkuâ hnê mơhno dêi Đảng, Kuô̆k hô̆i, Chin phuh hdrối mâu tơdroăng xơpá xua pơreăng COVID-19 la hiăng pơkuâ hnê, mơhno tơnêi têa châ tơƀrê  tơxâng hâk mơnê.

Pôa Vương Đình Huệ, Kăn xiâm hnê ngăn Kuô̆k hô̆i trâm mâ kuăn pơlê a Hải Phòng

Kuô̆k hô̆i ai mâu pơkâ teăng tơdrêng, tơtro vâ tah mâu tơdroăng xơpá pơloăng mơnúa dêi kuăn pơlê ƀă khu mơdró.

Kuăn pơlê xuân hiăng tối mâu tơdroăng ki hlo ai nôkố môi tiah tơdroăng mơjiâng luât, kal tơkŭm tơtro, tơdâng tơ’mô tơniăn kơdroh pro hên túa hlá mơ-éa, tơ’lêi  pêi  ăm mâu kuăn pơlê ƀă khu mơdró; tơdroăng ‘mâi hơ’lêh luât khăm, pơlât; Luât séa ngăn ki ‘mâi hơ’lêh; tơdroăng cheăng hbrâ mơdât on chếo, tơpâ on chếo; tơdroăng mâu thái cô pơtê cheăng, ôh tá ai thái cô, rah chêh hlá mơ-éa hriâm; ‘mâi hơ’lêh liăn khế tiô luât pơkâ ƀă tơdroăng cheăng dêi kŏng chưk, viên chưk.

Tiâ rơkong tối pâ dêi kuăn pơlê ‘na tơdroăng pơkeăng khăm pơlât, tung mê, pâ Kuô̆k hô̆i ai pơkâ luât yă pơkeăng, tơniăn bê tŭm pơkeăng khăm pơlât. Xua nôkố, mơngế ki khăm pơlât ƀaoh hiêm ôh tá ai pơkeăng, thế rôe pơkeăng ing kong ê, tâi liăn hên, malối cho ƀă mâu kơtiê.

Pôa Vương Đình Huệ, Kăn xiâm hnê ngăn Kuô̆k hô̆i ăm ‘nâi, Chin phuh dế hnê mơhno pơkuâ tiô troăng rơhlâ thế tơniăn xiâm, ki tơƀrê ƀă yă tê:;

“Kuô̆k hô̆i hiăng pơcháu ăm Chin phuh ai troăng rơhlâ teăm tơdrêng vâ tah ki xơpá, tơvâ tơvân vâ tơbleăng tơdroăng ‘no liăn rôe pơkeăng, tơmeăm xúa tung hngêi pơkeăng, tơmeăm khăm pơlât. Xuân hiăng tơbleăng luât ‘no liăn rôe pơkeăng  dêi Khu xiâm ngăn pơkeăng pơlât.

Nôkố dế pơtối mơ-eăm, Chin phuh, Kuô̆k hô̆i xuân hiăng hnê mơhno Khu xiâm, kơvâ ngăn pơkeăng séa ngăn nếo mâu pơkâ dêi kơvâ ngăn pơkeăng. Khên tơbleăng, tơdrăng tung mâu tơdroăng ‘na rak ngăn yă pơkeăng’’.

Kuăn pơlê xuân tối tơdroăng ôh tá ai tŭm thái cô, ôh tá tơdâng tơ’mô ‘na luât pơkâ, rak ngăn hlá mơ-éa hriâm ối hên tơdroăng ki ôh tá tro; pâ thế tơbleăng hlá mơ-éa hriâm phôh thong cho môi tơmeăm Tơnêi têa pơkâ yă, ví pôi tá ai tơdroăng  mâu khu mơdró, khi chêh pro hmôu pơ chêh yă môi tiah nôkố.

Tiâ tơdroăng mê, Kăn xiâm hnê ngăn Kuô̆k hô̆i tối:

‘’Tung hơnăm la ngiâ, Khu kăn Kuô̆k hô̆i kô séa ngăn môi tơdroăng kal, mê cho tơdroăng pơ’lêh nếo tơdroăng ‘na kơxop hlá mơ-éa hriâm, tung mê ai tơdroăng chêh ‘na rah chêh, in tơbleăng, pơkâ ăm xúa ƀă hlối chiang xúa hlá mơ-éa  hriâm. Mê thế ăm mâu hngêi trung rôe ăm ‘măn a Hngêi ‘măn rak hlá mơ-éa  vâ châ xúa tung hên hơnăm, ăm mâu hneăng kơ’nâi châ ngăn há. Ngăn nếo tơdroăng inâi chêh môi tiah lâi? La ngiâ kô pêi kơtăng ti lâi?

Tơdrêng ƀă tơdroăng mơjiâng luât, Kuăn pơlê tung lâp tơnêi têa dế tơngah a mâu tơdroăng ki hlo ai nốkố kô châ mâu kăn Kuô̆k hô̆i tơbleăng tơpui ƀă tơbleăng mơnhên hlê, tơpui tro a rôh hôp má 4, Kuô̆k hô̆i hneăng 15 la ngiâ.

VOV Tây Nguyên/Tơplôu: Gương