Pơla kố nah, Khu pơkuâ mơngế tro trếo ‘mêi dacam/dioxin kong pơlê Kon Tum tơrŭm ƀă Kŏng ti tê mơdró Tổng hợp Kon Tum tơkŭm diâp vâ chê 400 kơxuô tơmeăm Têt kơnâ tâk troh 146 rơtuh liăn ăm mơngế chó chêng tơvê kŏng cho mơngế tro trếo ‘mêi da cam rơxông má 3 a mâu tơring: Đăk Hà, Kon Rẫy, Ngọc Hồi ƀă pơlê kong kơdrâm Kon Tum. Rơtế a mê Khu pơkuâ mơngế tro trếo ‘mêi dacam/dioxin kong pơlê Kon Tum xuân xo Kơxô̆ liăn mơngế tro trếo ‘mêi dacam/dioxin lối 137 rơtuh liăn diâp ăm 846 ngế tung kong pơlê.

Hdrối mê, Kŏng đoân Mâu kơpong kơmăi kơmok – Kơpong cheăng kâ Kon Tum tơrŭm ƀă Kŏng đoân Viên chưk kong pơlê tơkŭm po Tơdroăng Têt rơtế phiu ro – Rơnó Hơngui tơdjêp hơnăm 2022. Ai 360 đoân viên kŏng đoân, mơngế pêi cheăng ai tơdroăng rêh ối pá puât châ diâp ăm kơxuô tơmeăm rêm kơxuô kơnâ sap ing 500 rơpâu troh 1 rơtuh liăn.

Pakĭng Kŏng đoân Mâu kơpong kơmăi kơmok – Kơpong cheăng kâ kong pơlê Kon Tum xuân diâp 200 kơxuô tơmeăm ăm đoân viên kŏng đoân ƀă mơngế pêi cheăng. Ngoh Trần Duy Hưng, pêi cheăng a Kŏng ti Mơ’no liăn cheăng mơjiâng pro hngêi trăng troăng klông Kơpong cheăng kâ kong pơlê Kon Tum ai péa ngế kuăn tro tâ pơreăng, tơdroăng rêh ối cheăng kâ rơpŏng pá puât tối ăm ‘nâi:

‘’Hơnăm 2022 kơ koan xuân hiăng pro tơ’lêi hlâu tŭm mâu troăng pơkâ troăng hơlâ ăm mơngế pêi cheăng. Á mơnê hên ‘nâng mâu khu pêi cheăng, mâu râ ki rơhêng vâ tối khu tơrŭm kŏng đoân hiăng tơmâng troh mơngế pêi cheăng ai tơdroăng rêh ối pá puât. Rơpŏng ai péa ngế kuăn ối kŭn châi tamo xuân tơkŭm po Têt tiah hmâ ƀă xuân hơtôu tơkŭm dêi pó’’.

Pêi pro mâu tơdroăng pleăng hnoăng cheăng klăng roh Hơngui Quý Mão 2023, rơxông ối nếo Dak Lak pêi pro hên troăng pêi nếo, tơmiât troh hên khu mơngế ki phá tơ-ê dêi pó a mâu tơring. Râng kơtâ phĭu kơxuô tơmeăm kơnâ 500 rơpâu liăn, nâ H’No Kƀuôr, ối a ƀuôn Kmrơng A, cheăm Ea Tu, pơlê kong kơdrâm Ƀuôn Ma Thuột hâk tơngăm tơmâng mâu ngế pleăng hnoăng cheăng tơbleăng mâu tơmeăm ai tung ‘’Kơchơ siêu thĭ kŭn’’ vâ rah xo ăm dêi tơná mâu tơmeăm ki kal xúa rêm hâi.

Nâ tối ăm ‘nâi:

‘’Châ tơmâng tŏng kum dêi khu râ kăn pơkuâ Khu mơngế plôm mâ xuân môi tiah mâu khu ngế tŏng kum mơngế pá puât, roh Têt troh xuân môi tiah ai khu ngế tŏng kum mơngế pá puât mê ngin o xuân pơrá châ tơdah mâu kơxuô tơmeăm tuăn pâ dêi rêm ngế diâp ăm á. Á hlo tơdroăng kố kơnía, cho hơtô, gá kum á o xuân môi tiah ngế tơrŭm ki ê, môi iâ vâ hơlêm xuân môi tiah môi tơdroăng phiu ro kŭn dêi krê á’’.

Ƀă rêm phĭu rôe tơmeăm kơnâ 500 rơpâu liăn, mơngế ki tơdah kơxuô tơmeăm kô rah xo tê kơtê mâu tơmeăm ki kal xúa rêm hâi hiăng ai hlâu a kơchơ siêu thĭ môi tiah: sik, têa tôu ro, phái, kơtâ í, peâp, xup kơxŏng khăng, kế ki râm, kơƀăn kĕo ƀă hía hé. Hơnăm kố, tơdroăng hiăng diâp 700 kơtâ phĭu rôe tơmeăm ăm mơngế kơtiê a pơlê kong kơdrâm Ƀuôn Ma Thuột ƀă pơlê kong krâm Ƀuôn Hồ.

Nâ H’ Giang Niê, Kăn pơkuâ hnê ngăn cheăng Đoân droh rơtăm kong pơlê Dak Lak tối ăm ‘nâi, rơtế ƀă ‘’Kơchơ siêu thĭ kŭn Têt 0 liăn’’, drêng kố, tâi tâng 22 khu tơrŭm cheăng đoân tung lâp kong pơlê pơrá ai mâu tơdroăng pêi ki nhên tơmiât troh mơngế kơtiê, ki xiâm môi tiah: khăm pơlât xing xoăng pơkeăng tê kơtê, diâp kơxuô tơmeăm ki kal xúa rêm hâi, mơjiâng hngêi tuăn pâ, diâp ăm rơxế mái, hnoăng liăn hriâm rơkê ƀă hía hé.

Kố cho mâu tơdroăng pêi ki kơnâ kum rơtế kong pơlê kum mơngế kơtiê ai tơmeăm vâ phiu ro rơnó hơngui, tơdah Têt.

‘’Ngin tơmâng tŏng kum ahdrối mê cho kŏng nhân, mơngế kơtiê ƀă ki rơhêng vâ tối cho vâi hdrêng ai tơdroăng rêh ối pá puât. Ƀă hơnăm kố ngin mơnhên tơ’nôm môi ngế nếo mê cho mô đô̆i ki klêi pro mô đô̆i vêh a hngêi. Ƀă mơngế ki kố mê ngin vâ pêi tơtro lĕm tơdroăng tŏng kum parŏng ƀă mâu mô đô̆i dế veăng pro mô đô̆i.

Ƀă mâu mô đô̆i ki hiăng vêh a pơlê xuân thế ai mâu troăng tơmiât pêi, vâ ti lâi hlo cho khu cheăng kal kí ƀă tâi tâng mâu râ, đoân ƀă mâu râ kăn pơkuâ hnê ngăn cheăng Đảng pơrá tơmâng tŏng kum, vâ mơhnhôk tơ’nôm hiâm mơno tung hơnăm 2023 mê pơtối mơ-eăm tung tơdroăng mơnhông mơdêk cheăng kâ xuân môi tiah veăng tung mâu tơdroăng dêi mâu khu tơrŭm pêi cheăng đoân, hô̆i tung kong pơlê’’.

Liên đoân Pêi cheăng kong pơlê Dak Lak xuân hiăng tơkŭm po Tơdroăng ‘’Têt rơtế phiu ro’’ hơnăm 2023 ƀă dó inâi ‘’Têt rơtế phiu ro – Rơnó Hơngui tơkŭm’’. Ing mê, mơhno tuăn pâ, tơdroăng tơmâng tŏng kum dêi Khu pêi cheăng kŏng đoân ƀă đoân viên, mơngế pêi cheăng ai tơdroăng rêh ối pá puât, mơngế tro châi tamo ôh tá ai pơkeăng pơlât, mơngế trâm xía vâ xua pêi cheăng ƀă hía hé, vâ tŏng kum môi iâ pá puât, kum mơngế pêi cheăng tơdah Têt lo hơnăm nếo Quý Mão 2023 hơtôu, tơkŭm dêi pó.

A tơdroăng kố, đoân viên, mơngế pêi cheăng hiăng châ ngăn mâu tơdroăng hơdruê xoâng ƀă mâu tơdroăng hơdruê phiu ro Đảng, phiu ro rơnó Hơngui, trâm mâ, xo mơ-éa ki vâ châ tơmeăm. Roh kố, Liên đoân pêi cheăng kong pơlê Dak Lak diâp 5 Toăng hngêi hơtôu Kŏng đoân (50 rơtuh liăn/toăng hngêi) ăm mâu rơpŏng pá puât ‘na hngêi ối ƀă diâp 500 kơxuô tơmeăm ăm đoân viên, mơngế pêi cheăng.