Tơpui a rôh hôp, pôa Trần Thanh Mẫn, Kăn xiâm hnê ngăn Kuô̆k hô̆i ăm ‘nâi, hneăng hôp má 8 ai hên tơdroăng ki kal khât tung mâu hneăng hôp ing apoăng hneăng Kuô̆k hô̆i 15 troh nôkố. Tiah mê, Kuô̆k hô̆i kô séa ngăn 39 tơdroăng, tung mê ai 29 tơdroăng kal ối tung hnoăng cheăng mơjiâng luât, 10 khu tơdroăng kal ‘na cheăng kâ rêh ối pơlê pơla, liăn ngân tơnêi têa, séa ngăn, hnoăng cheăng mâu ngế pêi cheăng ƀă mâu tơdroăng ki ê. Hneăng hôp má 8, kô pơxiâm po a hâi lơ 21/10. Tiô tối hdrối hâi pêi cheăng cho 29 hâi. Hneăng hôp châ tơkŭm po chiâng 2 rôh.

Rôh hôp châ pêi pro hdrối hâi vâ po Hneăng hôp 1 khế vâ mâu kơ koan chêh pro mơ-éa, séa ngăn ai hâi pêi pro tro tiô Luât pơkâ hlá mơ-éa luât; tơdrêng amê hlối vâ tơpui tơno, môi tuăn ‘na tơdroăng kal dêi rôh po hôp vâ pơtroh ăm hneăng hôp má 8, malối cho mâu kơ koan ăm rơkong tơpui tối séa ngăn ‘na tơdroăng ki pêi, hâi khế, ki rơkê tiô pơkâ, tơdroăng ki hbrâ rơnáu ăm tơdroăng ki kal mâu tơdroăng tơkêa luât, pơkâ vâ ‘mot tơ’nôm tung tơdroăng hneăng hôp má 8 tiô tơdroăng ki pro ‘nâng ‘nâi.

Tiô pôa Trần Thanh Mẫn, Kăn xiâm hnê ngăn Kuô̆k hô̆i, tung pơla hdrối nah, tơrŭm cheăng pơla Chin phuh ƀă mâu kơ koan Kuô̆k hô̆i rế hía rế krá tơniăn, tơtro, ai pơxúa ƀă tơƀrê, mâu kơ koan hiăng mơhno hiâm mơno pôu râng, hbrâ rơnáu ing hdrối, ing hơngế, pêi cheăng hâi, măng vâ hbrâ rơnáu ăm mâu tơdroăng luât, tơdroăng pơkâ vâ pơtroh ăm Kuô̆k hô̆i. Tung pơla nôkố, pôa Trần Thanh Mẫn, kăn xiâm hnê ngăn Kuô̆k hô̆i pơchân:

“Khía mơhot kân rôh má 3 pơla hdrối kố nah cho ôh tá tơniăn, pro tơ’nhiê tâi tâng hngêi trăng tơmeăm khoăng. Troh nôkố, tá hâi kâi riân tâi mâu kế tơmeăm ki tro tơ’nhiê. Tâi tâng Đảng, tâi tâng kuăn pơlê, tâi tâng khu lêng pin mê rế pá tơ’nôm, pơloăng mơnúa ki nếo. Chin phuh dế trâm xơpá, rế pá tơ’nôm tung tơdroăng ki séa ngăn, ‘no hrê liăn ngân, pêi pro mâu tơdroăng ki vâ pêi tŏng gum, rak vế tơniăn mâu tơdroăng cheăng kân dêi tơdroăng cheăng kâ, kơdroh pro mơhrê ƀă to yă mâu kế tơmeăm vâ rak tơniăn tơdroăng rêh ối ăm kuăn pơlê. Xua mê, Đảng đoân Kuô̆k hô̆i, Khu pơkuâ ngăn cheăng Đảng Chin phuh kô tơrŭm ai pơxúa tơƀrê, troăng hơlâ tŏng gum teăm tơdrêng, pêi pro châ tơdroăng ki pơkâ thế dêi tơdroăng ki dế ai khât xua mơnhông cheăng kâ rêh ối pơlê pơla, rak vế tơniăn tơdroăng rêh ối kuăn pơlê ƀă thăm mơdêk mơnhông”.

Klêi kơ’nâi hmâng mâu rơkong tơpui tơno, pơchuât dêi mâu ngế xiâm pơkuâ mâu kơvâ cheăng, kăn pơkuâ Hô̆i đong hdroâng kuăn ngo, mâu Vi ƀan dêi Kuô̆k hô̆i, pôa Phạm Minh Chính, Ngế pro xiâm hnê ngăn Chin phuh mơnhên tối tơdroăng ki tơrŭm dêi Đảng đoân Kuô̆k hô̆i ƀă Khu pơkuâ cheăng Đảng Chin phuh rế hía rế tro tâ; ăm ‘nâi, rôh hôp cho vâ séa ngăn tơdroăng cheăng ki ối tơvâ tơvân, kal athế môi tuăn, vâ mơdêk ƀă mơnhông ki rơkê plĕng dêi hneăng hôp.

Xua mê, Ngế pro xiâm hnê ngăn tơnêi têa pơkâ thế péa pâ kal ai tơdroăng tơrŭm tơniăn lĕm ing tơdroăng ki chêh pro mơ-éa, tơdroăng pơkâ. Ngế pro xiâm hnê ngăn Chin phuh xuân pơkâ thế mâu Khu xiâm kơvâ cheăng hbrâ rơnáu, tơrŭm tiô túa ki krá tơniăn ƀă tơƀrê ƀă Hô̆i đong hdroâng kuăn ngo, mâu Vi ƀan dêi Kuô̆k hô̆i:

“Pakĭng tơdroăng ki athế pro pơhlêh troăng hơlâ pơkâ dêi Đảng vâ pin tơkŭm pêi pro. Pin pơtối hơ’lêh nếo tuăn tơmiât mơjiâng pro luât, ing tíu ki bú tơkŭm ăm hnoăng cheăng pơkuâ, chiâng tơdroăng ki rế tơkŭm ăm hnoăng pơkuâ ngăn tơƀrê, la rế pro pơxúa veăng gum pro mơnhông. Á hlo kal athế pơhlêh nếo tung mâu kơ koan ki chêh pro hlá mơ-éa xuân môi tiah mâu kơ koan pơkâ. Tung tơdroăng mê, nếo mơhnhôk mâu kơxô̆ liăn. Nôkố, kơxô̆ liăn pin dế ôh ti ai. Pin athế bu tơkŭm pơkuâ tơƀrê gá hiăng tro. Laga, pakĭng mê, athế po ăm môi tơdroăng ki nếo, pro ăm tơdroăng mơnhông, vâ mơhnhôk mâu kơxô̆ liăn veăng tơlo ing pơlê pơla ƀă ing kuăn pơlê”.

Ngế pro xiâm hnê ngăn tơnêi têa tối tiah kố, ngăn kơ tơrêm to tơdroăng dêi mâu tơdroăng tơkêa luât vâ mơ’no tối mâu tơdroăng pơkâ nhên, mâu tơdroăng ki ôh tá tơniăn, ai hên tơdjâk mê séa ngăn tŭm. Hnoăng cheăng mơjiâng luât athế châ pêi pro tung hiâm mơno, tơdroăng klâi hiăng nhên, hiăng klêi, châ mơhno tung tơdroăng ki ai khât gá tro, pêi pro hlo tơƀrê ƀă châ môi tuăn hên mê kô pơhlêh. Ƀă mâu tơdroăng ki tá hâi klâi, tá hâi tro, ki khât tá hâi tơniăn, pá vâ ‘nâi hdrối mê athế khên tơnôu pơkâ pro, rế pêi, rế hlo tơdroăng, rế po rơdâ.

Mơgêi Rôh hôp, pôa Trần Thanh Mẫn, Kăn xiâm hnê ngăn Kuô̆k hô̆i pơkâ thế, mâu kơ koan chêh pro hlá mơ-éa kal athế pơtroh ăm Kuô̆k hô̆i hdrối hâi lơ 1/10; tung mê tơmâng ngăn troh 6 tơdroăng ki kal a 1 hneăng hôp kal athế rak vế tơtro.