VOV4.Xơ Đăng - Măng tĭng hdrối, Khu kăn séa ngăn Kuô̆k hô̆i hneăng má 15 hiăng pêi cheăng a 2 to kong pơlê Lâm Đồng prế Gia Lai ‘na pêi pro kơdĭng, hbrâ mơdât mơhrê liăn ngân hneăng hơnăm 2016 – 2021. Tiah mê, khu kăn séa ngăn pơkâ thế mâu kong pơlê tối tơbleăng mâu tơdroăng pêi pro ki nhên, mâu tơdroăng pêi pro tá hâi klêi, ôh tá tơniăn, xiâm kối ƀă pâ thế pơkâ mơ’no vâ pơtối pêi pro tro hnoăng cheăng pêi pro kơdĭng hbrâ mơdât mơhrê liăn ngân tê kơtê a kong pơlê tung hneăng hơnăm la ngiâ.

A kong pơlê Lâm Đồng, Khu kăn séa ngăn dêi Kuôk hô̆i xua Thươ̆ng tưŏng Trần Quang Phương, Ngế cheăng tung tíu xiâm Đảng, Kăn phŏ hnê ngăn Kuô̆k hô̆i pơkuâ djâ khu kăn hiăng lăm pêi cheăng ƀă kong pơlê Lâm Đồng ‘na tơdroăng kơdĭng liăn, mơdât mơ’nhiê liăn hmâng vâ pơla hơnăm 2016-2021.

Tơbleăng a rôh pêi cheăng ăm hlo, kong pơlê Lâm Đồng hiăng tơkŭm rak ngăn krâu hrê liăn ngân tơnêi têa, tơniăn xo hnoăng mơhá, xo tŭm, mơdât ki tro lŭp, kơdroh chĕn hnoăng mơhá. Thế kơdĭng liăn ngân, rơtế ƀă luât pơkâ, mơjiâng troăng rơhlâ kơdĭng liăn ing tơdroăng xing xoăng hbrâ hdrối liăn ngân ƀă tá tung pơla pêi pro; ‘na liăn ngân tơnêi têa châ Hô̆i đong hnê ngăn kong pơlê kĭ.

Tung tơdroăng hrê rêm hâi pơla hơnăm 2016-2021, kong pơlê hiăng kơdĭng tơdroăng mơjiâng, séa nhăn, kĭ  hbrâ hdrối, riân ngăn, tăng ngăn xúa liăn ngân tơnêi têa châ lối 3.380 rơtal liăn. 

Khu kăn séa ngăn dêi Kuô̆k hô̆i pêi cheăng a Lâm Đồng

Ngế pơkuâ khu séa ngăn, Thươ̆ng tươ̆ng Trần Quang Phương - Kăn phŏ hnê ngăn Kuô̆k hô̆i tối mơgêi a rôh pêi cheăng hiăng tơmâng xo, khĕn kơdeăn mâu tơdroăng mơ-eăm dêi kong pơlê ‘na tơdroăng cheăng thế kơdĭng liăn, mơdât hrê liăn hmâng vâ pơla hơnăm 2016 - 2021 dêi  Lâm Đồng, khĕn kơdeăn khât tối tơbleăng dêi Vi ƀan hnê ngăn - Hô̆i đong hnê ngăn ƀă Khu kăn Kuô̆k hô̆i  kong pơlê Lâm Đồng vâ tŭm tâi tâng. Kăn xiâm phŏ hnê ngăn Kuô̆k hô̆i pơkâ thế kong pơlê kal mơnhên mâu tơdroăng ki u ối, ki tơvâ tơvân, ki xiâm ƀă tối mâu tơdroăng thế pêi tro tơdroăng kơdĭng liăn, mơdât mơhrê liăn hmâng vâ tung kong pơlê tung mâu hơnăm la ngiâ.

Pâ thế séa ngăn hnoăng pơkuâ tung tơdroăng pêi pro nhên luât pơkâ ‘na kơdĭng liăn, mơ’nhiê liăn hmâng vâ. Séa ngăn mâu tơdroăng kơdĭng liăn mơdât mơ’nhiê liăn hmâng vâ ki kal cho xo liăn ngân tơnêi têa, rak ngăn tơmeăm khoăng tơnêi têa, hngêi tơnêi dêi tơnêi têa, tíu pêi cheăng, tơmeăm khoăng rơtế ƀă tơnêi, kơmăi kơmok tơmeăm khoăng, rak ngăn mơngế pêi cheăng, tơdroăng xing xoăng mơngế cheăng tung khu kăn iâ mơngế la pêi cheăng rơkê, kơdroh ƀiên chế vâ pêi cheăng châ tơ-brê.

A Gia Lai, khu pêi cheăng kơxô̆ 2 dêi Khu séa ngăn dêi Kuô̆k hô̆i  xua pôa Nguyễn Phú Cường, Ngế cheăng tung khu kăn xiâm Đảng, Ngế pơkuâ Vi ƀan ngăn ‘na liăn- Liăn ngân dêi Kuô̆k hô̆i pro Ngế xiâm pơkuâ djâ khu kăn hiăng lăm pêi cheăng ƀă Vi ƀan kong pơlê Gia Lai ‘na pêi pro kơdĭng liăn, mơdât mơ’nhiê liăn hmâng vâ pơla hơnăm 2016-2021.

Tiô tối tơbleăng, tung pơla hơnăm 2016-2021, kong pơlê Gia Lai hiăng kơdĭng  châ lối 4.368 rơtal liăn. Tung mê, kơdĭng hrê rêm hâi 10% vâ pro ai xiâm ‘mai pơ’lêh liăn khế lối 1.154 rơtal liăn...

Kăn phŏ hnê ngăn Kuô̆k hô̆i Trần Quang Phương tơbleăng a rôh pêi cheăng

A rôh pêi cheăng, mâu ngế tung khu séa ngăn dêi Kuô̆k hô̆i hiăng pâ thế mâu kăn Vi ƀan kong pơlê Gia Lai ƀă mâu tíu pêi cheăng, kơvâ cheăng mơnhên mâu tơdroăng ki tơdjâk, môi tiah: tơdroăng cheăng rak ngăn kong, pêt kong; mâu tơdroăng tơkêa bro ‘no mơjiâng tơmeăm khoăng hrá pêi; tối ki pêi tơ-brê dêi tơdroăng xúa liăn ngân ODA a kong pơlê;  pro rơchôa Ia Mơr hâi pơtối rak vế tâi ivá ki tôh têa; mâu tơdroăng xơpá tung mơdêk xúa on tơhrik kơtâu ing mâ hâi; tơdroăng rak ngăn, tí tăng xúa, xúa tơmeăm khoăng, tơmeăm tung kơdâm tơnêi; tơdroăng rah xo iâ tê mơngế pêi cheăng ăm tơnêi têa, kơdroh ƀiên chế ƀă hía hé....

Tơbleăng a rôh séa ngăn, Kăn hnê ngăn Vi ƀan rak liăn ngân dêi Kuô̆k hô̆i- pôa Nguyễn Phú Cường khĕn kơdeăn khât hnoăng cheăng pêi dêi kong pơlê Gia Lai tung tơbleăng pêi mâu tơdroăng cheăng dêi kong pơlê Gia Lai tung tơbleăng pêi pro kơdĭng liăn, mơdât hriê liăn hmâng vâ.

Pakĭng mê, pơkâ thế kong pơlê pơtối mơdêk pêi pro tơ-brê tơdroăng cheăng  mê; luât pơkâ pêi tơrêm tíu pêi cheăng, kong pơlê, mơdêk séa ngăn, tí tăng ngăn tơmâng hnê mơhno tơbleăng mâu tơdroăng tơkêa pro ki ối hrá; ai troăng pêi pro nhên ƀă mâu tơdroăng tơkêa ki hiăng pơkâ la hâi pêi, malối mâu tơdroăng tơkêa bro ki hrá pêi; ai troăng rơhlâ rak ngăn, tí tăng hriăn pêi, xúa tơmeăm khoăng tơtro ƀă tơdroăng pơkâ ƀă hía hé...

Pôa Nguyễn Phú Cường, Ngế xiâm Vi ƀan ngăn Liăn ngân Kuô̆k hô̆i  xuân pơkâ thế Kăn xiâm hnê ngăn Vi ƀan kong pơlê Gia Lai hnê mơhno mâu tíu pêi cheăng, khu râ ki tơdjâk troh tơmâng xo hên mâu tơdroăng veăng hnê tối dêi khu kăn séa ngăn; potối tơ’nôm, pê klêi hlá mơ-éa tơbleăng vâ tối ăm khu kăn séa ngăn tung la ngiâ. Khu kăn xuân tơmâng xo tŭm tơdroăng  veăng hnê tối, pâ thế dêi kong pơlê ƀă kong pơlê kô tơkŭm tâi tâng mâu tơdroăng tối tơbleăng ƀă Vi ƀan pơkuâ cheăng Kuô̆k hô̆i tung la ngiâ.

VOV Tây Nguyên chêh

Gương tơplôu ƀă tơbleăng