‘Na mâu hnoăng cheăng pêi ki xiâm tung khế 2, Kăn xiâm hnê ngăn Kuô̆k hô̆i pơkâ thế mâu kơ koan tơkŭm hbrâ rơnáu krâu ăm Rôh hôp dêi Vi ƀan pơkuâ Kuô̆k hô̆i (tiô tối hdrối kô ton tung pơla 4 hâi); tơdrêng a mê hlối séa ngăn Tơdroăng Pêi pro dêi Đảng đoàn Kuô̆k hô̆i pêi pro Pơkâ Hneăng hôp kân Đảng lâp tơnêi têa rôh má 13. Môi tơdroăng kal ki ê nếo mê cho Rôh hôp lâp tơnêi têa mơgêi hnoăng cheăng Hô̆i đong hnê ngăn mâu kong pơlê, pơlê kong kân ối tung tơnêi têa (tiô tối hdrối kô po a Quảng Ninh).

‘Na mâu tơdroăng cheăng pêi pơla sap ing khế 1 troh khế 3 ƀă plâ hơnăm, pôa Vương Đònh Huệ, Kăn xiâm hnê ngăn Kuô̆k hô̆i pơkâ thế Vi ƀan Luât pơkuâ chêh bro Tơdroăng mơjiâng luât, luât hơnăm 2024, ‘mâi rơnêu Tơdroăng mơjiâng luât, luât pơkâ hơnăm 2023, mâu kơ koan ki ê hbrâ rơnáu tơrŭm ƀă mâu kơ koan tơrŭm cheăng pơkâ mơ’no mâu tơdroăng tơkêa vâ pơtroh ăm Vi ƀan pơkuâ Kuô̆k hô̆i, Kuô̆k hô̆i tiô hnoăng pơkuâ.

Krê ‘na tơdroăng tơkêa Luât Tơnêi tơníu ki ‘mâi hơ’lêh, Kăn xiâm hnê ngăn Kuô̆k hô̆i pơkâ thế mâu kơ koan séa ngăn tung tơdroăng pơkâ dêi Vi ƀan pơkuâ Kuô̆k hô̆i ‘na xo rơkong tơpui tối dêi kuăn pơlê, tung tơdroăng mơ-eăm a kơlo ki lâi, pêi klêi ƀă pơtroh ăm Vi ƀan pơkuâ Kuô̆k hô̆i tung khế 3.

Tơdjâk troh hnoăng cheăng séa ngăn, pôa Vương Đình Huệ, Kăn xiâm hnê ngăn Kuô̆k hô̆i pơkâ:

“Tơbleăng mâu tơdroăng séa ngăn dêi hơnăm kố, 4 tơdroăng séa ngăn tơdroăng ki kal, môi tiah: on tơhrik, hlá mơ-éa hriâm, tơdroăng ki hnê tiô hlá mơ-éa hriâm; 3 tơdroăng pơkâ dêi tơnêi têa; mâu tơdroăng ‘na khăm pơlât; tâi tâng mâu tơdroăng kố pơrá xơpá ƀă cho tơdroăng ki trâm hên nôkố; đi đo mơdêk séa ngăn ‘na tơdroăng cheăng ki kân, mâu tơdroăng ‘na liăn ngân, chứng khoán, ‘na tơdroăng ki tê mơdró hngêi trăng tơnêi tơníu;

Tơdroăng ki tê, roê kơtâ phĭu khu mơdró kâ. Hô̆i đong Hdroâng kuăn ngo, mâu Vi ƀan hriăn ngăn va rah xo mâu tơdroăng ki kal vâ tơkŭm tơpui tối leăng, êng tiâ mơnhên mâu tơdroăng ki dế trâm nôkố, môi tiah mơ’no séa ngăn cho mâu tơdroăng ki dế pá puât nôkố. Mâu tơdroăng kố, tâng tơkôm a Kuô̆k hô̆i êng mê kô hrá, athế pêi pro tơdrêng hlối.  

Xua mê, Hô̆i đong hdroâng kuăn ngo, mâu kơ koan Kuô̆k hô̆i rah xo mâu tơdroăng ki pơxúa kal, ai khât tung rêh ối, ôh ti xê pêi klêi, mê lôi a mê, xuân pôi tá bro ăm kuăn pơlê tơpui tối hên. Tơdroăng tâng trâm ki nếo mê pin athế ai mâu troăng pơkâ ki nếo”.

Tiô pơkâ, Vi ƀan pơkuâ Kuô̆k hô̆i tối, Kuô̆k hô̆i kô kơ-êng vâ séa ngăn mâu tơdroăng ki ai tung tơdroăng rêh ối, Kăn xiâm hnê ngăn Kuô̆k hô̆i pơchân kal pơkâ mơ’no rah xo mâu tơdroăng athế tro, ai pơxúa xuân môi tiah pơtối hriăn ngăn vâ hơ’lêh nếo túa pơkâ ƀă túa kơ-êng.

“Kơ-êng ôh ti xê tơdroăng ki pro pá ăm ngế xiâm pơkuâ, ngế pơkuâ kơvâ cheăng mê athế rơtế ƀă dêi rơpó pêi pro nhên mâu tơdroăng vâ pơkâ tơleăng mâu tơdroăng ki ai khât tung rêh ối. Tơbleăng tơdrăng, pêi pro nhên mâu tơdroăng, vâ tăng hlo troăng hơlâ pơkâ tơleăng mâu tơdroăng xơpá.

‘Na hnoăng cheăng hbrâ rơnáu mâu tơdroăng ki kal séa ngăn tung hơnăm kơ’nâi, tiô á, pin athế séa ngăn tơdroăng ki pêi pro mâu pơkâ ‘na tơdroăng ‘mâi mơnhông mơdêk cheăng kâ, mâu tơdroăng tơkêa ki kal dêi tơnêi têa, mâu tơdroăng pơkâ dêi Tíu xiâm Tơnêi têa, Pơkâ dêi Kuô̆k hô̆i, klêi mê Chin phuh hiăng pơkâ mâu tơdroăng pêi pro túa pơkâ vâ tơkŭm pêi pro; séa ngăn tơdroăng pêi pro hnoăng cheăng séa ngăn hlá mơ-éa ‘na luât pơkâ dêi Hô̆i đong hdroâng kuăn ngo, mâu Vi ƀan ‘na tơbleăng hnoăng cheăng séa ngăn ki tiô pơkâ hnê mơhno dêi khu pơkuâ Kuô̆k hô̆i ƀă Hô̆i đong hnê ngăn rêm râ, lơ cho mâu tơdroăng ki ‘no liăn cheăng tơdjuôm tung la ngiâ kal séa ngăn tâi tâng, vâ tăng hlo tơdroăng ki tiah lâi hmâ ối hrá tiah mê”.

Hơnăm kố, Kuô̆k hô̆i kô tơkŭm po xo phĭu pôk xua Kuô̆k hô̆i pôk ƀă pơkâ, xua mê, Kăn xiâm hnê ngăn Kuô̆k hô̆i tối nhên, hnoăng cheăng hbrâ rơnáu vâ mâu kăn Kuô̆k hô̆i mơnhên tối tro kơlo ki pôk ƀă mâu ngế xuân cho hnoăng cheăng ki kal dêi Hô̆i đong hdroâng kuăn ngo, mâu Vi ƀan pơkuâ Kuô̆k hô̆i, Rôh hôp khu kăn Kuô̆k hô̆i hơnăm ối nếo lâp plâi tơnêi xua tơnêi têa pin tơkŭm po.