Xuân tung hâi kố, mâu kăn teăng mâ Kuô̆k hô̆i tơpui tơno a hngêi hôp kân ‘na tơdroăng tơkêa bro luât tê mơdró tiô troăng điê̆n tưh (‘mâi rơnêu) ƀă tơdroăng tơkêa bro luât yă (‘mâi rơnêu). Hdrối mê, kơxê lơ 10/11, Kuô̆k hô̆i hiăng têk kŏng tơbleăng ăm pêi pro Pơkâ ‘na Pơkâ mơnhông mơdêk cheăng kâ – rêh ối pơlê pơla hơnăm 2023. Tơtrŏng má môi cho tơdroăng Kuô̆k hô̆i pơkâ teăm tơdrêng tơleăng tâi tâng tơdroăng ôh tá bê tŭm pơkeăng, ôh tá tŭm tơmeăm khăm pơlât, tơmeăm xúa tung khăm pơlât.

Xiâm kối dêi tơdroăng ôh tá bê pơkeăng, tơmeăm khăm pơlât, tơmeăm xúa tung ngăn pơkeăng ƀă khăm pơlât tối nhên xiâm kối cho ôh tá bê tơmâng cho ki xiâm. Mê cho tơdroăng tơkŭm pro yă la hrá châ pêi pro; tá hâi kơtăng tung tơpui tơno yă pơkeăng tơtro ƀă kơchơ mơdró; hrá pơkâ hâi khế kĭ pơkeăng ƀă hía hé.

Tiô mâu kăn teăng mâ, môi tung mâu xiâm kối chiâng ai tơdroăng kố tơdjâk troh troăng pơkâ pêi, troăng hơlâ, pơkâ dêi luât. Xua mê, kal pơ’lêh teăm tơdrêng troăng hơlâ vâ tah lôi pá puât, ôh tá ăm ai tơdroăng tá bê pơkeăng, tơmeăm khăm pơlât.