Pơtối rôh hôp má 4, kơxo lơ 26/10, mâu kăn tơpui a tôh ‘na Tơdroăng vâ Pơkâ ‘na mơnúa ăm phêp rah xo xúa kơxô̆ ô tô ing tơdroăng tơbleăng yă ƀă tơdroăng chêh tung Pơkâ ‘na mơnúa pêi pro a mâu luât, luât tŏng kum ‘na mơnhông mơdêk pơlê kong kơdrâm Ƀuôn Ma Thuột, kong pơlê Dak Lak.

Pôa Nguyễn Chí Dũng, Ngế xiâm pơkuâ Khu xiâm Pơkâ ƀă ‘no liăn cheăng tơbleăng tơdroăng chêh ‘na Pơkâ ki mơnúa pêi pro mâu luât, luât tŏng kum mơnhông pơlê kong kơdrâm Ƀuôn Ma Thuột, kong pơlê Dak Lak

Mâu tơdroăng tối vâ môi tuăn kal ai pơkâ ‘na mơnúa pêi pro mâu luât, luât tŏng kum mơnhông pơlê kong kơdrâm Ƀuôn Ma Thuột, xua mê cho pơlê kong kơdrâm ki xiâm dêi kơpong Tây Nguyên, tơdjêp ƀă mâu Tíu xiâm mơnhông mơdêk dêi Peăng hdroh Tơdế tơnêi têa, Peăng mâ hâi Lo pa Hdroh tơnêi têa ƀă pái kơpong mơnhông cheăng kâ dêi Lếo, Việt Nam, Kul. Mơdêk tơƀrê lâp lu tơbleăng cheăng kâ, túa lĕm tro, ƀă ai tíu xiâm ki kal tung cheăng kâ rêh ối, ‘na cheăng lêng, kring vế tơniăn kơpong Tây Nguyên ƀă tung lâp tơnêi têa.

Pôa Lê Ngọc Hải, khu kăn kong pơlê Dak Lak tối nhên, nôkố Ƀuôn Ma Thuột xuân ôh tá tŭm ƀă ối lot hên tơdroăng malối ‘na tơmeăm khoăng, xua mê tơdroăng chêh tung hlá mơ-éa Pơkâ kal po rơdâ luât pơkâ, pêi tơƀrê vâ tơ’mot kơxô̆ liăn ‘no ăm kơpong kố.