Hlo tơdroăng tro hơ-ôu kế kâ rế hên tung lâp lu ƀă hên túa tro hơ- ôu, pôa Nguyễn Minh Tâm, khu kăn Quảng Bình pâ thế Chin phuh, Kuô̆k hô̆i pơtối pê klêi mâu luât pơkâ tŏng kum vâ pro xiâm ki tro luât ‘na rak ngăn tơnêi têa ‘na tơniăn krúa kế kâ malối cho kế kâ ki tê nô̆ng drô troăng kơphô̆. Tung tơdroăng tơpâ on chếo, kế pơtôu, pôa Nguyễn Minh Tâm tối: ‘Na tơdroăng “Khu kăn pơkuâ hiăng xêk xêng, la kuăn pơlê ối  tơngôu” tung tơdroăng pêi pro séa ngăn tơdroăng mê:

“Rôh hôp má 5, Ngế xiâm pơkuâ ngăn mơjiâng tơmeăm khoăng tối kô rơtế ƀă Khu xiâm kŏng an vâ pro tơniăn ‘na hbrâ mơdât, tơpâ on chếo. Rôh hôp má 6 hên mâu kăn tối tô tuăn hên tơdroăng cheăng ‘na hbrâ mơdât, tơpâ on chếo. Chin phuh xuân hiăng tơhrâ ƀă xuân hiăng hnê mơhno nhên khât tơdroăng séa ngăn ‘na hbrâ mơdât, tơpâ on chếo ki malối a mâu kơphô̆ kân la mâu rôh on chếo hlâ hên mơngế hdrối kô nah ăm hlo pin ôh tá kâi, tá ai ivá vâ tơpâ ƀă on. Púi vâ mâu khu râ kơvâ cheăng a cheăm bêng tơring kong pơlê pêi rơdêi tơdroăng cheăng, pêi teăm tơdrêng, vâ tơkâ luâ tơdroăng Khu kăn pơkuâ hiăng xêk xêng, la kuăn pơlê ối tơngôu vâ mâu luât pơkâ dêi Chin phuh châ hnê pêi teăm tơdrêng vâ kâi mơdât mâu tơdroăng sĭng khéa, hlâ mơngế xua on chếo, kế pơtôu  tung la ngiâ’’.

Tung tơdroăng hnê hriâm, pôa Trần Đình Gia, Kăn Kuô̆k hô̆i Hà Tĩnh tối tiah kố, klêi pêi pro pơ’lêh tơdroăng hnê hriâm, hlá mơ-éa hriâm phôh thong, hên tơmeăm xúa tung hnê ƀă hriâm hâi châ ‘no liăn rôe tơxâng ƀă tơdroăng vâ hnê ƀă hriâm, hnê mơjiâng tuăn ngôa rơkê, ăm hriâm tơ’nôm mâu thái cô hnê mâu môn tích hợp hlo ối hên xơpá tung hnê hriâm... ‘Na rak ngăn tơdroăng hnê tơ’nôm, hriâm tơ’nôm, pôa Trần Đình Gia tối:

“Hnê hriâm tơ’nôm, hriâm tơ’nôm cho tơdroăng kal vâ dêi kuăn pơlê tâng châ rak ngăn, hnê tơƀrê la mâu tơdroăng hnê rak ngăn, tơkŭm po hnê tơ’nôm, hriâm tơ’nôm pa kong hngêi trung kơdroh, chiâng ai mâu hngêi trung ki ‘nâ po hnê xêh chiâng tơdroăng ki tơdjâk troh kơvâ hnê. Tơdroăng kố, kơvâ ngăn hnê hriâm kal thế ai tơdroăng hnê tối nhên’’.

Tơpui tơno a rôh hôp ‘na tơdroăng pâ thế kal ‘no liăn mơjiâng pro, rôe tơmeăm xúa khăm pơlât, pơkeăng pơlât a hngêi pơkeăng cheăm, tơring, pôa Nguyễn Lân Hiếu, khu kăn Bình Định tối; tâng pêi pro tiô tơdroăng ton nah hên, ôh tá tơƀrê ƀă thế tăng trăng rơhlâ:

“Á pâ thế tung pơla nôkố kal ‘no liăn rôe tơmeăm khoăng pơkeăng xúa tung khăm pơlât a tơring xua tíu kố tơmeăm khăm pơlât hiăng tơ’nhiê hên tơmeăm ôh tá chiâng xúa tung pơlât, tá kuăn mơngế tá tơmeăm khăm pơlât. Mơngế châi ta mo tâng ai liăn lăm pơlât râ kơpêng, mâu ngế ki ối pơlât xêh amê to mâu kơtiê xơpá, châi ta mo râ, tá ai liăn, tá pơkeăng pơlât, thăm pá puât tâ nếo xua luât pơkâ hngêi pơkeăng pơkuâ pêi pro dêi’’.

Tối ki pơxúa khât dêi tơdroăng mơjiâng thôn pơlê nếo pro ăm tơdroăng rêh ối cheăng kâ - pơlê pơla xông tơƀrê, la pôa Nguyễn Văn Huy khu kăn Thái Bình tối tô tuăn tơdroăng oh tá vâ tơmâng khât ‘na túa lĕm tro ton nah. Hên tơmeăm khoăng cho tơmeăm kơnía ton nah, túa lĕm tro, tơdroăng tơkŭm mơdĭng, xah hêi lĕm tro tơkŭm hôp dêi kuăn pơlê rế pá hlo ai; mâu tơdroăng ki ai tuăn ‘mêi ôh tá tro hiăng ƀă dế tơdjâk troh, pro tơdroăng rêh ối dêi kuăn pơlê kơpong thôn pơlê ôh tá tơniăn ƀă hên ki ê.

“Vâ veăng pơtối mơhnhôk rĕng mơnhông thôn pơlê nếo, pê klêi mâu pơkâ ‘na mơhno túa lĕm tro tung mơjiâng thôn pơlê nếo tối krê, á pâ thế Chin phuh tơkŭm tăng ‘nâi plĕng pâ thế mơjiâng mâu luât ‘na mơhno túa lĕm tro, mâu tơdroăng xơpá ‘na liăn ‘no mơjiâng pro hiăng tơdjâk troh tơdroăng mơnhông túa lĕm tro, pâ thế Chin phuh tơmâng tí tăng ngăn, hnê vâ pơkâ nhên tâ nếo, tro khâp ‘na thôn pơlê nếo, malối mâu pơkâ ki tơdjâk troh túa lĕm tro’’.

Xuân tung măng tĭng kố nah, Kuô̆k hô̆i hiăng tơkŭm tơpui ‘na tơdroăng cheăng kâ - rêh ối ƀă liăn ngân tơnêi têa hơnăm 2023 ƀă mâu khế apoăng hơnăm kố. Mâu kăn tối, cheăng kâ dêi tơnêi têa pơtối tâk hên, cheăng kâ kân tơniăn tung pơla lâp plâi tơnêi ai hên tơdroăng ôh tá tơniăn. Tối nhên ki tơƀrê tơxâng hâk mơnê cho kơpong pêi chiâk deăng pơtối mơhno ki rơdêi ‘na cheăng kâ, mâu kăn xuân pâ thế séa ngăn, tăng ngăn tơdroăng vâ po rơdâ cheăng kâ, tơmâng khât troh tơdroăng tê mơdró tung tơnêi têa ki ai 100 rơtuh ngế kuăn pơlê; hlối mơdêk xing xoăng râ, hnoăng pơkuâ ngăn ăm mâu cheăm tơring kong pơlê vâ pơtối rak vế ki hbrâ rơnáu, rơkê plĕng ƀĕng ƀeăn, hriăn plĕng  tơdroăng ki nếo.