A rôh hôp tơpui tơno ‘na cheăng kâ rêh ối pơlê pơla ƀă liăn ngân tơnêi têa hâi lơ 27/10, mâu kăn pơkâ thế ai troăng hơlâ tơtro ví tơdroăng ki mâu thái cô lo ing tíu pêi cheăng tơdjuôm lăm pêi a tíu pêi cheăng krê. Kuô̆k hô̆i mơnhên tối khât ivá mơ-eăm dêi kơvâ ngăn hnê hriâm ƀă tơdroăng ki tơmâng ngăn dêi Đảng ƀă Tơnêi têa ƀă mâu thái cô tối tơdjuôm. Laga, tung 2 hơnăm tơdế pơla kố nah ƀă lối 14 rơpâu ngế thái cô, tung mê, ki hên cho cô yăo hnê mầm non ƀă thái cô hnê râ má pái lo ing tíu ki hnê tơdjuôm, kal athế mơnhên tối ki ivá rơkê nếo ai troăng hơlâ tơtro.

Mâu kăn Kuô̆k hô̆i tơpui tơno a hngêi hôp kân ‘na cheăng kâ rêh ối pơlê pơla

Tiô mâu kăn tối, sap ing nôkố troh hơnăm 2026 tiô tối hdrối ối kal 107 rơpâu ngế thái cô. Kơxô̆ ki kố kal châ tơmiât nhên, tơbêng ăm tơdroăng ki hnê ƀă hriâm tiah hmâ ƀă vâ pêi pro mâu tơdroăng pơkâ hơ’lêh nếo ƀă mơdêk ki rơkê plĕng tung hnê ƀă hriâm. Pôa Nguyễn Kim Sơn, Ngế xiâm ngăn hnê hriâm ƀă hnê mơjiâng tuăn ngoâ rơkê tối ‘na tơdroăng ki ối kal thái cô, pơtê cheăng ƀă pơ’lêh tơdroăng cheăng. ‘Na troăng hơlâ, pôa Nguyễn Kim Sơn tối nhên: Khu xiâm pơkuâ tơdroăng kal kí hiăng kĭ pơkâ 65 rơpâu ngế, troh nôkố Khu ngăn hnê hriâm ƀă hnê mơjiâng tuăn ngoâ rơkê ƀă Khu ngăn kong pơlê ƀă hnoăng cheăng dêi mâu kăn ƀô̆ mâu kong pơlê dế pơxiâm rah xo thái cô.