Pêi pro tơdroăng ‘’Lâp tơnêi têa tơdjuôm ivá kum mơngế kơtiê – Ôh tá lôi kơbố parŏng” xua Ngế pro xiâm hnê ngăn Chin phuh mơhnhôk pêi pro, Hngêi arak liăn kum rêh ối pơlê pơla kong pơlê Lâm Đồng tơrŭm ƀă mâu khu tơrŭm cheăng kal kí – rêh ối pơlê pơla tung kong pơlê tơkŭm po Măng tĭng pơtroh liăn kơdĭng tơdjuôm ivá kum mơngế kơtiê hơnăm 2023. Klêi kơ’nâi mơhnhôk, Lâm Đồng hiăng mơhnhôk rơpâu ngế krê, tơkŭm po tung kong pơlê ing mơhnhôk kơxô̆ liăn châ tơdah tung hâi apoăng tâk troh lối 64 rơtal liăn. Măng tĭng pơtroh liăn kơdĭng tơdjuôm ivá kum mơngế kơtiê dêi kong pơlê Lâm Đồng ton troh sap hâi lơ 31/1 troh tâi hâi lơ 7/2.

Kố cho hơnăm má 3 Tơdroăng pơtroh kơxô̆ liăn kơdĭng tơdjuôm kum mơngế kơtiê châ pêi pro a Lâm Đồng ƀă mơhnhôk rế hía rế hên tơdroăng ki veăng, mơhnhôk môi tuăn ing kuăn pơlê.